فوتو: اشىق دەرەككوز
بيىلعى جەتى ايدا جولداردا 25 مىڭنان استام تەكسەرۋ جۇرگىزىلىپ, قوزعالىس قاۋىپسىزدىگىنە قاۋىپ توندىرەتىن مىڭداعان اقاۋلار انىقتالعان. قاداعالاۋدىڭ جاڭا ادىستەرى ەنگىزىلىپ, درونداردان باستاپ اۆتوماتتى تىركەۋ كامەرالارىنا دەيىنگى تەحنولوگيالار پايدالانىلىپ جاتىر. سونىڭ ناتيجەسىندە رەسپۋبليكالىق ماڭىزى بار تراسسالاردا جول اپاتتارىنان كوز جۇمعاندار سانى 12%-عا ازايعان.
قر ىشكى ىستەر ءمينيسترى ەرجان سادەنوۆتىڭ ايتۋىنشا, جىل باسىنان بەرى جولداردا 8,5 ميلليون جول قوزعالىسى ەرەجەسىن بۇزۋ دەرەگىنىڭ جولى كەسىلگەن. ونىڭ ىشىندە 14 مىڭنان استام ماس كۇيدە كولىك جۇرگىزۋ فاكتىلەرى بار.
«بۇل شارالار اۋىر زارداپتاردىڭ الدىن الۋعا مۇمكىندىك بەردى. بۇگىندە تسيفرلىق شەشىمدەر قارقىندى تۇردە ەنگىزىلۋدە. ماسەلەن, قۇقىق بۇزۋشىلىقتى تىركەۋ كامەرالارى, ءموبيلدى «جاسىرىن» پاترۋلدىك جۇيەلەر, دروندار, قاۋىپتى جۇرگىزۋشىلەردى انىقتاۋعا ارنالعان «قورعاۋ» جۇيەسى. اۆتوجولداردا ورتاشا جىلدامدىقتى باقىلاۋ جۇيەسى ەنگىزىلدى, بۇل وسى ايماقتارداعى اپاتتىق جاعدايلاردى ازايتتى. جول ينفراقۇرىلىمىنا باقىلاۋ كۇشەيتىلدى», دەدى ەرجان سادەنوۆ
