زاعيپ جاندار ونى وبلىستىق كىتاپحانادا جانە ارنايى كىتاپحانادا وقي الادى. وسىلايشا, ەلىمىزدە كوزى كورمەيتىن جانە ناشار كورەتىن ازاماتتاردىڭ ءوز قۇقىقتارىن قورعاۋعا, زاڭنامالىق ساۋاتىن جەتىلدىرۋگە, مۇمكىندىكتەرىن كورسەتۋگە تاماشا مۇمكىندىك جاسالىپ وتىر.
س.تورايعىروۆ اتىنداعى وبلىستىق كىتاپحانادا كونستيتۋتسيانىڭ 30 جىلدىعىنا ارنالعان ءىس-شارا ءوتىپ, وندا كونستيتۋتسيا كىتابىنىڭ برايل شريفىمەن باسىلىپ شىققان جاڭا نۇسقاسى تانىستىرىلدى. كىتاپ اتاۋلى مەرەيتويعا وراي جوعارعى سوتتىڭ تاپسىرماسىمەن جارىق كورگەن.
ء«بىزدىڭ قولىمىزدا كونستيتۋتسيانىڭ بىرنەشە نۇسقاسى بار: جالپاق باسپا فورماتىندا, برايل قارپىندە جانە فلەشكاعا جازىلعان MP3 اۋديو نۇسقاسىندا. كوپشىلىگى جۇمىسقا كەلگەندە نەمەسە قاجەت بولعاندا قاجەتتى باپتارىن تاۋىپ الىپ وقيدى. ماسەلەن, 28-باپتا ازاماتتارعا ەڭ تومەنگى جالاقى مەن الەۋمەتتىك تولەمدەردىڭ مەملەكەت تاراپىنان كەپىلدەندىرىلەتىنى جازىلعان. بۇل بارشامىز ءۇشىن ماڭىزدى», دەدى تۇساۋكەسەرگە قاتىسقان قازاق زاعيپتار قوعامىنىڭ توراعاسى دۇيسەنبى قابدۋلوۆ.
ۇيىمداستىرۋشىلار اتاپ وتكەندەي, بۇل يگى باستاما – كوزى كورمەيتىن جانداردىڭ ەلدىڭ باستى قۇجاتىمەن ەركىن تانىسىپ, ازاماتتىق قۇقىعىن تەرەڭ ۇعىنۋىنا مۇمكىندىك بەرەتىن تىڭ قادام. زاعيپ جاندار بۇل كىتاپ ارقىلى وزدەرىنىڭ قوعامداعى تولىققاندى مۇشەسى ەكەنىن تاعى ءبىر مارتە سەزىنەتىن بولادى.
پاۆلودار وبلىسى
