سۋرەتتى تۇسىرگەن – جانگەلدى ابدىعالىم
كەشەن Jet A-1 ءتيپتى اۆياوتىندى قابىلداۋ, ساقتاۋ جانە قۇيۋعا ارنالعان جوعارى تەحنولوگيالى نىسان بولماق. سونىمەن بىرگە قاراعاندى اۋەجايىنىڭ الەۋەتى ارتىپ, ورتالىق ازياداعى اۆياتسيالىق قىزمەت كورسەتۋ ورتالىعىنىڭ قاتارىنا قوسىلادى. جوبا ءۇش كەزەڭنەن تۇرادى. 2025 جىلدىڭ سوڭىنان باستاپ, 2026 جىلدىڭ باسىنا دەيىنگى ارالىقتا تەحنولوگيالىق جابدىقتار جوبالانىپ, مونتاجدالادى. ەكىنشى كەزەڭدە (2026 جىلدىڭ سوڭىنا دەيىن) كولەمى 2 000 تەكشە مەتر بولاتىن رەزەرۆۋار مەن قىزمەت كورسەتۋ كەشەنى سالىنادى. ءۇشىنشى كەزەڭدە (2027 جىلدىڭ III توقسانى) قويما كولەمى ەكى ەسە ءوسىپ, اۋماق الاڭى 4 مىڭ تەكشە مەترگە جەتەدى.
«جوبانىڭ جۇزەگە اسۋى قوس ەل اراسىنداعى ستراتەگيالىق ىنتىماقتاستىقتى جاڭا بەلەسكە كوتەرىپ, وبلىستىڭ ترانزيتتىك الەۋەتىن ايتارلىقتاي ارتتىرادى. ناتيجەسىندە, ايماق ەكونوميكاسى وركەندەپ, ەلدەر اراسىنداعى ءوزارا بايلانىس بۇرىنعىدان دا نىعايا تۇسەدى», دەيدى ءوڭىر باسشىسى ەرماعانبەت بولەكپاەۆ.
قازىر اۋەجاي جىلىنا 50 مىڭ تونناعا دەيىن جۇك تاسىمالداي الادى. جوبا تولىق ىسكە قوسىلعاندا بۇل كورسەتكىش 200 مىڭ تونناعا دەيىن ارتادى. مۇنداي كوشەلى كورسەتكىش ءوڭىردىڭ لوگيستيكالىق مۇمكىندىگىن ءتورت ەسە ارتتىرىپ, ءوڭىردى قىتاي – ەۋروپا باعىتىنىڭ باستى ترانزيتتىك بەكەتىنە اينالدىرۋعا جول اشادى. ءۇرىمشى قالاسى حالىقارالىق قۇرلىق پورتى جانە ەكونوميكالىق اۋەجاي سەرۆيسى بيۋروسى باسشىسىنىڭ ورىنباسارى تسزيۋي حۋەي جوبا حالىقارالىق دەڭگەيدەگى تاسىمالدى ءوزارا ءتيىمدى ەتىپ, سەرىكتەستىكتى جاڭا دەڭگەيگە شىعارادى, دەپ وتىر.
كەشەننىڭ قۇرىلىسى ەۋروپانىڭ JIG, EI جانە AFQP ستاندارتتارىنا ساي جۇرگىزىلەدى. جوباعا الەمدىك ەنەرگەتيكا نارىعىندا كوشباسشىلاردىڭ ءبىرى – قىتايلىق «Petro China» كومپانياسى ستراتەگيالىق سەرىكتەس رەتىندە قاتىسادى.
كەزدەسۋ بارىسىندا ەكى ەلدىڭ اۆياتسيا جانە لوگيستيكا سالاسىن ىلگەرىلەتۋگە باعىتتالعان بىرقاتار قۇجاتقا قول قويىلدى. ماڭىزدى مامىلەلەر تىزبەگىندە «Petro China Kazakhstan Ltd» مەن «Silk Aviation Airport Development» اراسىنداعى اۆياوتىن جەتكىزۋ تۋرالى كەلىسىم بار.
ء«بىز جاڭا كەشەن ارقىلى قازاقستان مەن قىتاي اراسىنداعى ەكونوميكالىق بايلانىستاردى نىعايتۋمەن قاتار, ەكولوگيالىق جاۋاپكەرشىلىكتى دە باستى ورىنعا قويامىز. كەلەشەك ۇرپاققا تازا جانە قاۋىپسىز ينفراقۇرىلىم قالدىرۋعا باعىتتالعان جوبا تولىق ستاندارتتارعا ساي بولۋى قاجەت», دەيدى «Jet Fuel Service» كومپانياسىنىڭ نەگىزىن قالاۋشى ەرلان وسپانوۆ.
قاراعاندى وبلىسى
