ەندى الاتاۋ بوكتەرىنە تەك ەۋروپانىڭ عانا ەمەس, الەمگە داڭقى جايىلعان گراند كلۋبتار ات بايلايدى. «رەال مادريد», پسج, «مانچەستەر سيتي», «بارسەلونا», «باۆاريا», «ليۆەرپۋل», «ينتەر», «بورۋسسيا» سىندى ازۋ ءتىسى التى قارىس تەگەۋرىندى كوماندالاردىڭ قايسىسى «قايراتپەن» ءبىر توپقا تۇسەتىنى بۇگىن انىقتالادى. قالاي بولعاندا دا الماتىنىڭ «ورتالىق ستاديونى» قوڭىر كۇزدە الەم نازارىن وزىنە قاراتادى.
چەمپيوندار ليگاسىنىڭ ىرىكتەۋ كەزەڭىندەگى ماتچ جونىندە بىرەر ءسوز. «قايرات» پەن «سەلتيك» تارتىسى تۋرالى تاڭدى تاڭعا جالعاپ ايتۋعا بولادى. سىرتتاعى ويىندا دا, ءوز الاڭىمىزداعى دودادا دا جىگىتتەر بارىن سالدى. ارينە, داستان ساتباەۆتىڭ گلازگودان سارى قاعاز «ارقالاپ قايتۋى» الامان الدىندا جانكۇيەرلەردىڭ كوڭىلىن تۇسىرگەنى دە راس. دەگەنمەن دە بىلىكتى مامان راديكتىڭ ۇلى رافاەل ۋرازباحتين الماتىلىق كوماندانى اسقان جاۋاپكەرشىلىكپەن سايىسقا سالعانى كوزگە ۇرىپ تۇردى. راس, ەكسترا تايمنىڭ سوڭعى مينۋتتارى سىرعىپ جاتقاندا «سەلتيك» ويىنشىلارى كادىمگىدەي قىسپاققا الدى, ءتىپتى الاڭىنان ورتا تايلى-تاياعىمەن الىپ شابۋىلعا كوشتى. بىرنەشە جويقىن سوققىنى «قايرات» قاقپاشىسى تەمىرلان اناربەكوۆ (ماتچتىڭ باس قاھارمانى) قايتارىپ وتىردى. 21 جاستاعى قازاق ۇلانىنىڭ پەنالتي تويتارۋداعى ابجىلدىگى الەمنىڭ نازارىندا قازىر. اتىراۋدا تۋىپ, الماتىدا شىڭدالعان قاقپاشى تەمىرلان اناربەكوۆ 14 جاسىندا «قايرات» فۋتبول اكادەمياسىنا اۋىسىپ كەلدى. 2022 جىلى نەگىزگى قۇرامعا ءوتتى. ال بىلتىر «جەڭىس» كلۋبىنا جالعا بەرىلدى. جاراتقان جۇلدىزىڭدى جاعىپ, ماڭدايىڭدى جارقىراتام دەسە, ءاپ-ساتتە عانا. «قايراتتىڭ» سەنىم ارتار نەگىزگى قاقپاشىسى الەكساندر زارۋتسكي جاراقاتتانىپ, الاڭعا اناربەكوۆ العاشقى مينۋتتان شىقتى. ءوزىنىڭ قارىمى مەن قابىلەتىن پاش ەتەتىن شاقتى تالانتتى قاقپاشى قالت جىبەرگەن جوق. ەۋروكۋبوكتىق ماتچتاردا تالاي مايدان كورىپ, ابدەن ىسىلعان, توپتىق كەزەڭىنە دە كەرۋەن تارتقان شوتلانديالىق كلۋبتىڭ ايبارىنان ىققان دا, ساسقان دا جوق. پەنالتي سەرياسىن باستاعان ادام ايدانىڭ بۇرىشتى كوزدەي تەپكەن سوققىسىن قايتاردى. ودان كەيىن ليۋك ماككوۋەننىڭ, دايدزەن مايەدانىڭ دا تەپكەن دوبىن توقتاتتى. ارنە ەنگەلس پەن كاللۋم ماكرەگوردىڭ گولىن تويتارا المادى دەپ تەمىرلاندى سوگۋ استە قيسىنسىز. ەۋروكۋبوكتىق الامانعا جاڭا ارالاسىپ, بويىن ۇيرەتە باستاعان جاس قاقپاشى ءۇشىن ءبىر ەمەس, ءۇش پەنالتيدى قايتارۋ – وراسان جەتىستىك. «سەلتيكتىڭ» تاجىريبەلى قاقپاشىسى تالاي دۋدى كورگەن ويىنشى. دانيا ۇلتتىق قۇراماسىنىڭ قاقپاسىن قورىپ ەكى رەت الەم چەمپيوناتىنا, ەۋروپا بىرىنشىلىگىنە قاتىسقان ساڭلاق. تاجىريبەلى قاقپاشى وزىنەن 17 جاس كىشى تەمىرلاننىڭ تالانتىمەن شەندەسە العان جوق.
الماتىلىق «قايرات» ساپىنان ۆالەري گرومىكونىڭ سوققىسى قاقپا ماڭدايشاسىنان قايتسا, الەكساندر مارتىنوۆيچ, وفري اراد, ەگور سوروكيننىڭ تەپكەن پەنالتيىنە كاسپەر شمەيحەل ەش قاۋقار تانىتا المادى.
تارتىستان كەيىن «سەلتيكتىڭ» باس باپكەرى برەندان رودجەرس ويىنعا كوڭىلى كونشىمەيتىنىن دە ايتتى. ء«بىزدىڭ جىگىتتەر راس, وتە سىلبىر وينادى. ءبىز اپتا بۇرىن ءوز الاڭىمىزدا وتكىزگەن تارتىستا گول سوعىپ, جەڭىستى جاقىنداتا ءتۇسۋىمىز كەرەك ەدى, بۇيىرمادى. چەمپيوندار ليگاسىنىڭ توپتىق كەزەڭىندە ويناعىمىز كەلدى, بىراق بۇل جولى ءبىزدىڭ باعىمىز دا جانبادى, بابىمىز دا كەمشىن سوقتى. «قايرات» كومانداسىن جەڭىسىمەن قۇتتىقتايمىن, الداعى تارتىستا ساتتىلىك تىلەيمىن. وتە تەگەۋرىندى ۇجىم. جانكۇيەرلەرگە ايرىقشا قۇرمەت بىلدىرەمىز, ءبىز ءۇشىن ات ارىتىپ كەلىپ قولداۋ كورسەتتى. ولاردى قۋانتقىمىز كەلگەن, بىراق چەمپيوندار ليگاسىنىڭ دەڭگەيى, تالابى وتە جوعارى, سوعان ساي ويىن ورنەگىن كورسەتە المادىق.
«قايرات» فۋتبول كلۋبىنىڭ باس باپكەرى رافاەل ۋرازباحتين كوماندانىڭ نەگىزگى ماقساتىنىڭ ءبىرى چەمپيوندار ليگاسىنىڭ توپتىق كەزەڭىنە شىعۋ ەكەنىن دە جاسىرمادى. «دەسە دە ءبىز ءدال مۇنداي تاڭعاجايىپ جەڭىسكە جەتەمىز دەپ كۇن بۇرىن قۋانعامىز جوق. ءتىپتى بولماعاندا ۋەفا كونفەرەنتسيا ليگاسىندا سىنعا ءتۇسۋدىڭ ءوزى ولجا دەدىك. بىراق جىگىتتەر قايرات تانىتتى. ولارعا ماقساتىمىزدىڭ ورىندالعانىن ايتىپ قۇتتىقتادىم. الدىن الا تون ءپىشىپ, بولجام جاساعىم كەلمەيدى. دەگەنمەن دە بۇل اسۋ بىزگە – الەمنىڭ تاڭداۋلى كلۋبتارىنا قارسى ويناۋعا وراسان مۇمكىندىك تۋدىرىپ وتىر. «سەلتيككە» قارسى ماتچ الدىندا توپتىق كەزەڭدە وينايتىن ەۋروپانىڭ ازۋلى كلۋبتارىنىڭ سۋرەتىن شىعارىپ, كيىم اۋىستىراتىن بولمەگە ءىلدىردىم, بۇل مەنىڭ يدەيام ەدى. جىگىتتەر كورسىن, ءبىر بەلدەن اسساق الدىمىزدا قانداي نىعمەت تۇرعانىن سەزىنسە دەدىم. جەڭىستەن كەيىن ويىنشىلارعا ايتتىم «ال ەندى دايىن بولىڭدار» دەپ. بىزگە قانداي كلۋبتار قارسىلاس اتانسا دا جانكۇيەرلەردى قۋانتۋعا بارىمىزدى سالامىز», دەدى ر.ۋرازباحتين.
سەيسەنبىدەن سارسەنبىگە اۋعان تۇندە الداسپان اقىن ءابدىلدا تاجىباەۆتىڭ دا رۋحى شات بولعان شىعار.
«قايراتىم» دەپ مەن ءجۇرمىن,
قايرات قىلماي سەن ءجۇرسىڭ...
شىنىمەن-اق بولماي ما,
مەن قۋانار جەڭىسىڭ؟» دەپ قامشىلاپ ەدى كەزىندە فۋتبولشىلاردى. الماتىلىق كلۋب ەل قۋانار جەڭىسىمەن بارشا جانكۇيەرلەرىن جەلپىندىردى.
راس, ىشكى چەمپيوناتتا باسەكە كۇشەيىپ, تارتىس ارتپاي كوماندالاردىڭ ءوسىپ, ەۋروپالىق كلۋبتارىمەن شەندەسە الماسى ايدان انىق. دەيتۇرعانمەن دە ەل فۋتبولىنىڭ جىلناماسىندا جاڭا پاراق اشىلدى. ەركىن تاپالوۆ سىندى ساڭلاقتاردى سۇيەنىش تۇتىپ ەندى «قايرات» فۋتبول اكادەمياسىنىڭ تۇلەكتەرى داستان ساتباەۆ, تەمىرلان اناربەكوۆ, دامير قاسابولات, رامازان باعدات, ولجاس بايبەك سىندى جاس وعلاندار «سانتياگو بەرنابەۋ» («رەال مادريد»), «كامپ نوۋ» («بارسەلونا»), «اليانتس ارەنا» («باۆاريا»), «ەتيحاد» («مانچەستەر سيتي»), «پارك دە پرەنس» (پسج) سىندى الەمنىڭ تاڭداۋلى ستاديوندارىندا جاسىن ويناتادى.
«قايرات» فۋتبول كلۋبى چەمپيوندار ليگاسىنىڭ توپتىق كەزەڭىنە وتكەنى ءۇشىن 18,62 ميلليون ەۋرو (11, 7 ملرد تەڭگە) سىياقى الادى. الدا ءار ماتچتا جەڭىسكە جەتسە – 2,1 ميلليون, تەڭ ويناسا, 750 مىڭ ەۋرو مولشەرىندە سىياقى اۋدارىلادى.
