قوس كوماندا اراسىنداعى ەكى ماتچ تا 0:0 ەسەبىمەن اياقتالدى. ال شەشۋشى ساتتە «قايراتتىڭ» قاقپاشىسى تەمىرلان اناربەكوۆ شەبەر ويىنىمەن كوزگە ءتۇسىپ, ءۇش پەنالتيدى قايتارىپ, كومانداسىنا تاريحي جەڭىس سىيلادى.
تاريحي جەڭىس پەن قوماقتى تابىس
بۇل جەڭىس الماتىلىق كلۋبقا تەك سپورتتىق جەتىستىك ەمەس, قارجىلاي تابىس تا اكەلدى. چەمپيوندار ليگاسىنىڭ توپتىق كەزەڭىنە جولداما العان بارلىق كلۋبتار ءتۋرنيردىڭ اۋقىمدى جۇلدە قورىنان ءوز ۇلەسىن الادى.
«قايرات» كەم دەگەندە 18,62 ميلليون ەۋروعا, ياعني شامامەن 11,7 ميلليارد تەڭگەگە يە بولادى. بۇعان قوسىمشا, توپتىق كەزەڭدەگى ءار جەڭىس ءۇشىن — 2,1 ميلليون ەۋرو, تەڭ ويىن ءۇشىن — 750 مىڭ ەۋرو كولەمىندە سىياقى تاعايىندالعان.
سالىستىرا كەتسەك, ەۋروكۋبوكتاردىڭ ىرىكتەۋ كەزەڭىنە تۇراقتى قاتىسىپ جۇرگەن قازاقستاندىق كلۋبتاردىڭ جىلدىق بيۋدجەتى 4 ميلليارد تەڭگەدەن اسپايدى. دەمەك, بۇل – وتاندىق فۋتبول ءۇشىن ەلەۋلى جەتىستىك.
ەۋروپانىڭ ازۋلى كلۋبتارىمەن ويىن
2025 جىلدىڭ كۇزىنەن باستاپ 2026 جىلدىڭ قاڭتارىنا دەيىن «قايرات» توپتىق كەزەڭدە ەۋروپانىڭ ەڭ ۇزدىك سەگىز كومانداسىمەن كەزدەسەدى. جەرەبە تارتۋ ءراسىمى جۇما كۇنى وتەدى.
قارسىلاستار قاتارىندا ءتۋرنيردىڭ قازىرگى جەڭىمپازى — فرانتسيانىڭ «پاري سەن-جەرمەنى», الەمدەگى ەڭ تيتۋلدى كلۋب — مادريدتىك «رەال», يسپانيا چەمپيونى — «بارسەلونا», سونداي-اق اپل الىپتارى — «ليۆەرپۋل», «مانچەستەر سيتي», «ارسەنال» جانە باسقا دا تانىمال كلۋبتار بولۋى مۇمكىن.
توپتىق كەزەڭدەگى سەگىز ماتچتىڭ تورتەۋى الماتىدا وتەدى. چەمپيوندار ليگاسىنداعى نەگىزگى ويىندار 2025 جىلعى 16 قىركۇيەك پەن 2026 جىلعى 28 قاڭتار ارالىعىندا ۇيىمداستىرىلادى.
