2008 جىلى «مەكتەپكە جول» قازىرگى وقۋ-اعارتۋ مينيسترلىگىنىڭ شەشىمىمەن رەسپۋبليكالىق مارتەبەگە يە بولدى. ال 2009 جىلدان بەرى قاراي وڭىردە جىل ون ەكى اي بويى اتقارىلاتىن الەۋمەتتىك مانگە يە ماڭىزدى ءىس-شارانىڭ بىرىنە اينالدى.
«مەكتەپكە جول» اكتسياسى وبلىس كولەمىندە جىل بويى جۇزەگە اسىرىلىپ كەلەدى. ال جاڭا وقۋ جىلى قارساڭىندا وتەتىن بەلسەندى قايىرىمدىلىق ءىس-شارالارى تامىزدىڭ بىرىنەن باستالدى. ءبىز وڭىردەگى كاسىپورىندارعا, مەتسەناتتارعا, جەكەلەگەن قالتالى ازاماتتارعا اتالعان اكتسيانىڭ باستالعانى تۋرالى حابار جىبەردىك. بۇگىنگە دەيىن 665 بالاعا كومەك كورسەتىلدى. جومارت جاندار بالالاردىڭ سپورت كيىمدەرىن, مەكتەپ فورماسىن, اياقكيىم, سىرت كيىم, سومكەسىن ساتىپ الىپ بەرىپ جاتىر. قىركۇيەككە دەيىن شامامەن 10 مىڭ وقۋشىعا وسىنداي كومەك كورسەتۋ جوسپاردا بار», دەيدى وبلىستىق ءبىلىم بەرۋ باسقارماسىنىڭ ءباسپاسوز حاتشىسى اننا لازارەۆا.
مۇنىڭ سىرتىندا, جاڭا وقۋ جىلى باستالار الدىندا مۇقتاج وتباسىلارعا جاپپاي وقىتۋ قورىنان قارجىلاي كومەك كورسەتىلەدى. ماسەلەن, وڭىردە وتكەن جىلى 10 مىڭنان استام بالا اتالعان قوردىڭ كومەگىن العان.
«سوڭعى جىلدارى بالانىڭ اتا-اناسىنىڭ شوتىنا جاپپاي وقىتۋ قورىنان اقشالاي كومەك جىبەرەتىن بولدىق. اتا-انا وسى قاراجاتقا بالاسىن كيىندىرىپ, مەكتەپكە كەرەگىن ءوزى تۇگەندەپ الادى. مىسالى, 2024 جىلى مۇقتاج وتباسىلارعا اتالعان قوردان 5,8 ملرد تەڭگە ءبولىندى. بۇل ءبىزدىڭ وبلىستىق ءبىلىم باسقارماسىنا بولىنەتىن جالپى بيۋدجەتتىڭ 5,2 پايىزىن قۇرايدى. بىلتىر وبلىس كولەمىندە 10 756 ادامنىڭ جەكە ەسەپشوتىنا 470 ملن تەڭگە ءتۇستى. ونىڭ ىشىندە اتاۋلى الەۋمەتتىك كومەك الاتىن, كۇنكورىس دەڭگەيى تومەن, سۋ تاسقىنى كەزىندە قيىن جاعدايعا دۋشار بولعان وتباسىلار, اتا-انا قامقورلىعىنان ايرىلعان بالالار بار. بۇل قاراجاتقا مەكتەپ فورماسى, كيىم, اياقكيىم, كەڭسە تاۋارلارى ساتىپ الىندى», دەيدى وبلىستىق ءبىلىم باسقارماسى باسشىسىنىڭ ورىنباسارى داناگۇل سۇيىندىكوۆا.
بيىل جاپپاي وقىتۋ قورىنان 11 مىڭعا جۋىق بالاعا 506 ملن تەڭگە ءبولىنىپ وتىر. بۇگىنگە دەيىن بۇل قاراجاتتىڭ دەنى اتا-انالاردىڭ جەكە ەسەپشوتىنا اۋدارىلعان. قانداي دا ءبىر كەدەرگى تۋىنداعان جاعدايدا, كومەككە مۇقتاج اتا-انا ءوزى تۇرىپ جاتقان ەلدى مەكەندەگى ءبىلىم بەرۋ مەكەمەسىنە جۇگىنە الادى.
«ازاماتتاردىڭ ءوتىنىشى بويىنشا جەدەل ارەكەت ەتۋ ءۇشىن «21» شۇعىل جەلىسى ىسكە قوسىلدى. ءبىز وڭىردەگى ەرىكتىلەردى, كاسىپكەرلەردى, مەتسەناتتاردى, مەكەمەلەردى «مەكتەپكە جول» قايىرىمدىلىق اكتسياسىنا ءالى دە بولسا بەلسەنە اتسالىسۋعا شاقىرامىز. مۇنداي كوڭىل قۋانتارلىق ىزگى امالدار بۇلدىرشىندەردىڭ بولاشاققا دەگەن سەنىمىن ارتتىراتىنى ءشۇباسىز. مەكتەپكە كوڭىلى توق, قۋانىپ بارعان بالا ساباقتى جاقسى وقيدى», دەيدى ب.سۇيىندىكوۆا.
«مەكتەپكە جول» اكتسياسى جاڭا وقۋ جىلىنىڭ باستاپقى كەزەڭىنە دەيىن جالعاسادى.
قوستاناي وبلىسى
