وقيعا 25 تامىز كۇنى الماتى حالىقارالىق اۋەجايىنىڭ ىشكى رەيستەر تەرمينالى – ت1-دە بولعان. بۇل تۋرالى اۋەجايدىڭ ءباسپاسوز قىزمەتى حابارلادى.
«پوليتسيا قىزمەتكەرلەرى مەن اۆياتسيالىق قاۋىپسىزدىك قىزمەتىنىڭ جەدەل ارەكەتتەرىنىڭ ارقاسىندا ءورت دەر كەزىندە ءسوندىرىلدى, ەر ادامعا العاشقى مەديتسينالىق كومەك كورسەتىلىپ, اۋرۋحاناعا جەتكىزىلدى. قازىرگى تاڭدا بۇل ىسكە قاتىستى تەرگەۋ جۇمىستارى قۇقىق قورعاۋ ورگاندارى تاراپىنان جۇرگىزىلىپ جاتىر. اتالعان جاعداي اۋەجاي قىزمەتىنە قاتىسى جوق جانە ونىڭ جۇمىس تارتىبىنە اسەر ەتپەدى. الماتى حالىقارالىق اۋەجايى قالىپتى رەجيمدە جۇمىس ىستەپ تۇر», دەلىنگەن حابارلامادا.
پوليتسيا مەن اۋەجايدىڭ قاۋىپسىزدىك قىزمەتى ءورتتى دەرەۋ ءسوندىرىپ, جەدەل جاردەم شاقىرعان. ەر ادام قالالىق اۋرۋحاناعا جەتكىزىلگەن.
اتالعان فاكتى بويىنشا كولىك پوليتسياسى باسقارماسى قىلمىستىق ءىس قوزعادى. الدىن الا مالىمەت بويىنشا, ەر ادامنىڭ مۇنداي ارەكەتكە بارۋىنا ازاماتتىق جۇبايىمەن بولعان جەكە جانجالى سەبەپ بولعان.
الماتى قالاسىنىڭ قوعامدىق دەنساۋلىق ساقتاۋ باسقارماسى حابارلاعانداي, ناۋقاس جەدەل جاردەم بريگاداسىمەن №4 قالالىق كلينيكالىق اۋرۋحاناعا جەتكىزىلىپ, جانساقتاۋ بولىمىنە جاتقىزىلعان.
«جاعدايى اۋىر. دەنساۋلىق ساقتاۋ مينيسترلىگىنىڭ كلينيكالىق حاتتاماسىنا سايكەس تولىق كولەمدە ەم قابىلداپ جاتىر», دەلىنگەن حابارلامادا.
