رەجيسسەردىڭ ايتۋىنشا, فيلم ءۇشىن ارنايى ش.قالداياقوۆتىڭ 13 ءانى سيمفونيالىق وركەستر سۇيەمەلىمەن جازىلىپ, ساۋندترەك رەتىندە ۇسىنىلادى. تۋىندىنىڭ شىعارماشىلىق توبىنا كومپوزيتوردىڭ ۇلى مۇحتار قالداياقوۆ پەن كەلىنى بوتاگوز قالداياقوۆا دا قولداۋ كورسەتكەن. ايتا كەتەيىك, اتالعان ميۋزيكل – رەجيسسەردىڭ دەبيۋتى.
«باقىت قۇشاعىندا» ميۋزيكلىندە ءشامشىنىڭ شىعارماشىلىعى, قازاقتىڭ ءتىلى, ونەرى مەن استانانىڭ سۇلۋلىعى كورسەتىلەدى.
«جالپى, نەگىزگى باستى ماقساتىمىز, نەگىزگى يدەيامىز – ەلوردامىزدى, مادەنيەتىمىزدى كورسەتۋ. ويتكەنى سوڭعى تولىقمەتراجدى فيلم استانادا 15 جىل بۇرىن تۇسىرىلگەن. باستى يدەيام, ماقساتىم – ەلىمىزگە, مۇمكىن بۇكىل الەمگە ءبىزدىڭ ەلوردامىزدى, مادەنيەتىمىزدى تانىتۋ», دەيدى سانات شاپاشوۆ.
ايتا كەتەيىك, دجۋكبوكس ميۋزيكل دەگەنىمىز – تانىمال اندەردى پايدالاناتىن ساحنالىق قويىلىم نەمەسە مۋزىكالىق فيلم.
«كاستينگ وتە اۋقىمدى ءوتتى. ەكى مىڭ ءبيشىنىڭ ىشىنەن 50-ءى عانا تاڭدالدى. ۇزدىكتەردىڭ ۇزدىگى, ادەمىلەردىڭ ادەمىسى عانا قاتىستى. ويتكەنى بۇل – ميۋزيكل. ءۇش جانردى قامتيدى: اكتەرلىك, بي جانە ءان», دەيدى حورەوگراف ۋاليتبەك سيازبەك.
تۋىندىنىڭ باستى رولدەرىن داۋرەن سەرعازين, ءاليا انۋاربەك, شاحمۇرات ورداباەۆ, ازامات ساتىبالدى, ايگۇل يمانباەۆا, اينۇر يلياسوۆا سومدايدى.
