فوتو: Shutterstock
حاينان پروۆينتسياسىنىڭ مەتەورولوگيالىق ستانتسياسى تاراتقان دەرەكتەرگە سايكەس, ءىرى تايفۋن شامامەن ساعاتىنا 20 شاقىرىم جىلدامدىقپەن ۆەتنامنىڭ سولتۇستىك جانە ورتالىق جاعالاۋلارىنا قاراي جىلجىپ بارادى. جەكسەنبى كۇنى تايفۋن ورتالىعىنا جاقىن ايماقتا جەلدىڭ ماكسيمالدى جىلدامدىعى بوفورت شكالاسى بويىنشا 14 باللعا جەتىپ, سەكۋندىنا 45 مەتردى قۇراعان.
اپاتتىڭ الدىن الۋ ءۇشىن حاينان پروۆينتسياسىندا 20 مىڭنان استام تۇرعىن ەۆاكۋاتسيالانعان. سونداي-اق 30 مىڭنان استام بالىق اۋلاۋ كەمەلەرى پورتتارعا ورالدى نەمەسە قاۋىپسىز ايماقتارعا جاسىرىنعان. سانيا قالاسىنداعى مەكتەپتەردە ساباقتار ۋاقىتشا توقتاتىلعان. سونىمەن قاتار كاسىپورىندار مەن ساۋدا نىساندارىنىڭ جۇمىسى توقتاپ, قوعامدىق كولىك قوزعالىسى مەن تەڭىز قاتىناسى شەكتەلگەن.
ۆەتنامنىڭ ورتالىق پروۆينتسيالارىندا دا بيلىك بارلىق تەڭىز كولىكتەرىنە تەڭىزگە شىعۋعا تىيىم سالعان. مامانداردىڭ بولجامىنشا, 25 تامىز كۇنى تايفۋن ۆەتنامنىڭ ورتالىق جاعالاۋىنا جاقىنداعان كەزدە ونىڭ قۋاتى 11–12 باللعا دەيىن جەتىپ, جەل ەكپىنى 15 باللعا دەيىن (ساعاتىنا 167–183 شاقىرىم) كۇشەيۋى مۇمكىن.
