اكىمدىكتىڭ مالىمەتىنشە, قازىرگى تاڭدا قالادا 32 اۆتوگاز قۇيۋ ستانتسياسى جۇمىس ىستەپ تۇر. كەزەكتەر نەگىزىنەن تاڭەرتەڭگى جانە كەشكى ۋاقىتتاردا بايقالادى.
«قالاداعى سۇيىتىلعان گازعا سۇرانىستىڭ ارتۋى ىشكى ءتۋريزمنىڭ وسۋىمەن, سونداي-اق وزگە وبلىستاردان كەلەتىن اۆتوكولىك سانىنىڭ كوبەيۋىمەن بايلانىستى. بۇدان بولەك, دەمالىس كۇندەرى اۋدان تۇرعىندارىنىڭ مەكتەپكە قاجەتتى قۇرال-جابدىقتاردى الۋ ءۇشىن قالاعا اعىلۋى دا كولىكتەر سانىن ارتتىرادى», – دەپ ءتۇسىندىردى اكىمدىكتەگىلەر.
سونىمەن قاتار, گاز تاپشىلىعى جوق ەكەنى اتاپ ءوتىلدى. قالا اكىمدىگى جاعداي باقىلاۋدا ەكەنىن حابارلادى.
«كۇنىنە ەكى رەت اۆتوگاز قۇيۋ ستانتسيالارىنىڭ جۇمىسىنا مونيتورينگ جۇرگىزىلەدى. قالا ماڭىندا جانە تراسسالاردا كەزەك بايقالمايدى», – دەدى اكىمدىكتە.
مالىمەتكە سايكەس, اقتاۋعا كۇن سايىن «قازگپز» جشس تاراپىنان ورتا ەسەپپەن 170–180 توننا سۇيىتىلعان گاز جەتكىزىلەدى. ال 22–23 تامىز كۇندەرى «انپز» جشس 160 توننا كولەمىندە وتىن جونەلتتى. شىلدەمەن سالىستىرعاندا جەتكىزىلىم كولەمى وسكەن: وتكەن ايدا «انپز» 217,6 توننا گاز جىبەرسە, تامىزدا بۇل كورسەتكىش 320 تونناعا جەتتى.
اكىمدىكتىڭ ايتۋىنشا, جازعى ماۋسىمدا تۋريستەردەن بولەك, قالا تۇرعىندارىنىڭ دا بەلسەندىلىگى ارتىپ, ولاردىڭ ءجيى ساپارعا شىعۋى جالپى وتىن تۇتىنۋ كولەمىنە اسەر ەتەدى.
