كولىك ۆيتسە-ءمينيسترى ماقسات قالياقپاروۆ اۆتوجولدىڭ ساپاسىن ارتتىرۋ بويىنشا قابىلدانىپ جاتقان شارا تۋرالى باياندادى. بيىل 13 مىڭ كم جول قامتىلماق. ونىڭ قاتارىندا رەسپۋبليكالىق 2 مىڭ كم استام جول رەكونسترۋكتسيالانىپ, وبلىس ورتالىقتارى اراسىنداعى 6,6 مىڭ كم جول جوندەلمەك, ال جەرگىلىكتى جەرلەردە 4,1 مىڭ كم جول جاڭارتۋعا جاتادى. بيىل رەسپۋبليكالىق ماڭىزى بار جولداردىڭ نورماتيۆتىك جاي-كۇيىن 94%-عا, جەرگىلىكتى جولداردىڭ نورماتيۆتىك جاي-كۇيىن 91%-عا جەتكىزۋ جوسپارلانعان.
زاڭنامالىق دەڭگەيدە بىرقاتار تۇزەتۋ قابىلداندى. سونىڭ نەگىزىندە ساپا ورتالىعىنىڭ ەسكەرتۋلەرىن جويماي, نىسانداردى پايدالانۋعا قابىلداۋعا تىيىم سالىندى, ال 2023 جىلدان بەرى بارلىق ورتاشا جوندەۋ جوبالارى جوبالىق شەشىمدەردىڭ جانە ولاردىڭ قۇنىنىڭ دۇرىس قولدانىلۋىنا قاتىستى ۆەدومستۆولىق ساراپتامادان وتۋگە مىندەتتى.
جۇرگىزىلىپ جاتقان جۇمىس شەڭبەرىندە وتكەن 7 ايداعى قورىتىندى دا ساپاسىز جول-قۇرىلىس ماتەريالدارى مەن اقاۋلار سانىنىڭ 2%-عا تومەندەگەنى, جەرگىلىكتى جولداردى قيىرشىق تاستان اسفالتبەتون توسەمىنە اۋىستىرۋ 14%-عا وسكەنى بايقالدى. جوبالىق شەشىمدەردى وڭتايلاندىرۋ 1 ملرد تەڭگەدەن استام قارجى ۇنەمدەۋگە مۇمكىندىك بەردى, ال جەرگىلىكتى جولداردى دياگنوستيكامەن قامتۋ 50%-عا جەتتى.
جول-قۇرىلىس ۇدەرىسىنە قاتىسۋشىلار جاۋاپكەرشىلىگىن ارتتىرۋ ماقساتىندا جۇمىستىڭ بارلىق كەزەڭىندە ساراپتامانى اۆتوماتتاندىرۋدىڭ تسيفرلىق جۇيەلەرى مەن تەتىكتەرى ەنگىزىلدى, 384 اسفالتبەتون زاۋىتىنا كەشەندى تەكسەرۋ جۇرگىزىلدى.
«قازجولعزي» اق پرەزيدەنتى ارمان الىباەۆا جول سالاسىنا تسيفرلىق تەحنولوگيالاردى ەنگىزۋ تۋرالى حاباردار ەتتى. كەيىنگى 5 جىلدا ينستيتۋت اۆتوجولداردى سالۋ مەن جوندەۋ تەحنولوگيالارىن جەتىلدىرۋگە باعىتتالعان 20-دان استام عىلىمي-زەرتتەۋ جۇمىستارىن جۇرگىزگەن. بۇگىندە ەلىمىزدە بىرنەشە تسيفرلىق جوبالار جۇزەگە اسىرىلىپ كەلەدى. جوبالاۋ ساپاسىن ارتتىرۋ ماقساتىندا جول-قۇرىلىس ماتەريالدارىنىڭ بىرىڭعاي بازاسى مەن ناقتى كليماتتىق جاعدايلارعا جانە قوزعالىس قارقىندىلىعىنا ماتەريالداردى ءدال تاڭداۋ ەسەبىنەن بەرىك جانە سەنىمدى جول توسەمدەرىن پايدالانۋعا باعىتتالعان Superpave تەحنولوگياسى ەنگىزىلدى.
پرەمەر-مينيستر ولجاس بەكتەنوۆ ەلىمىزدەگى جولدار جەلىسىن ودان ءارى دامىتۋ قاجەتتىگىن ايتتى. 2030 جىلعا دەيىن 4 مىڭ كم جۋىق اۆتوجول قايتا جاڭعىرتىلادى. بيىل بىرقاتار نەگىزگى جوبانى اياقتاۋ جوسپارلانۋدا, بۇل رەتتە جوبالىق قۇجاتتامانىڭ دايىندىعى جوعارى جاڭا جوبالاردى: «اقتوبە – ۇلعايسىن», «قاراعاندى – جەزقازعان», «اتىراۋ – دوسسور» جولدارى مەن سارىاعاش, پەتروپاۆل, رۋدنىي جانە قىزىلوردا قالالارىن اينالىپ ءوتۋ جولدارىن, سونداي-اق 2,5 مىڭ كم اۆتوجولدى ورتاشا جوندەۋ ماڭىزدى.
كولىك, قارجى مينيسترلىگىنە جانە «قازاۆتوجولعا» مەردىگەرلەردى قارجىلاندىرۋ مەن ايقىنداۋدى قامتاماسىز ەتۋ, ال ونەركاسىپ جانە قۇرىلىس, كولىك مينيسترلىگىنە «كىلتتى تاپسىرعانعا دەيىنگى» ءىرى جوبالاردى جەدەل جۇزەگە اسىرۋ ءۇشىن مەملەكەتتىك ساراپتاما مەن قۇرىلىس-مونتاجداۋ جۇمىستارىنىڭ قاتار ءوتۋ تەتىگىن ازىرلەۋ مەن بەكىتۋ تاپسىرىلدى.
مەردىگەرلەردىڭ كەپىلدىگىن قاداعالاۋ مەن ساپاسىز ماتەريالداردى پايدالانۋ ماسەلەلەرى اتاپ ءوتىلدى. مىسال رەتىندە, پاۆلودار تاسجولىنىڭ بەتون توسەمى كوتەرىلىپ جاتقانى ايتىلدى, سولتۇستىك قازاقستان وبلىسىندا تەكسەرىلگەن سىنامالاردىڭ 43%-ى ساپا ستاندارتتارىنا سايكەس كەلمەگەن. ەلدى مەكەندەردەگى تۇرعىندار تاراپىنان جول ساپاسىنا قاتىستى ەڭ كوپ سىن اتىراۋ مەن تۇركىستان وبلىسىندا تىركەلگەن. پرەمەر-مينيستر كەپىلدىك مەرزىمىن ۇلعايتۋدى جانە مەردىگەرلەردىڭ كەپىلدىك مىندەتتەمەلەرىن ساپاسىز ورىنداعانى ءۇشىن مەردىگەرلىك ۇيىمدار جاۋاپكەرشىلىگىن كۇشەيتۋدى جۇكتەدى.
جەرگىلىكتى جولدار جەلىسىن دامىتۋعا قاراجات جۇمساۋدىڭ تيىمدىلىگى مەن قارجىلاندىرۋ ماسەلەسىنە نازار اۋدارىلدى. ۇكىمەت باسشىسى ەداۋىر كولەمدە بيۋدجەت قاراجاتى بولىنگەنىنە قاراماستان, كەيبىر وڭىرلەردە ونى يگەرۋ باياۋ ءجۇرىپ جاتقانىن اتاپ ءوتتى. ماسەلەن, اباي وبلىسىندا – 42%, اقتوبەدە – 52%, اقمولادا 56% يگەرىلگەن.
«كورسەتىلگەن زاڭ بۇزۋشىلىقتاردى ەسكەرە وتىرىپ, كولىك مينيسترلىگى مەن ۇلتتىق ساپا ورتالىعىنا 1 قازانعا دەيىن بارلىق اۆتوجول جوبالارىنىڭ جۇزەگە اسىرىلۋىن تەكسەرۋدى تاپسىرامىن. ونىڭ قورىتىندىسىندا انىقتالعان كىنالىلەردى جازالاۋ بويىنشا ەسەپ پەن ۇسىنىستار ەنگىزىلسىن. كولىك جانە قارجى مينيسترلىكتەرىنە ۇلتتىق ساپا ورتالىعىنىڭ قىزمەتىن كۇشەيتۋ بويىنشا شەشىمدەر دايىنداۋدى تاپسىرامىن», دەدى و.بەكتەنوۆ.
