استانادا ەلىمىزدىڭ ءتۇرلى سالالارىندا قىزمەت ەتەتىن بەلسەندى ايەلدەردىڭ باستاماسىمەن قۇرىلعان «حالىقارالىق «EXPO&WOMEN» ۇيىمى» زاڭدى تۇلعالار بىرلەستىگىنىڭ العاشقى وتىرىسى بولىپ ءوتتى.
اتالمىش ۇيىمعا بيزنەس, ساياسات, يندۋستريالىق سەكتور, قوعامدىق قايراتكەرلەر جانە جۋرناليستەر كىرەتىن بولادى. ۇيىم پرەزيدەنتى سالتانات راقىمبەكوۆانىڭ ايتۋى بويىنشا, «EXPO&WOMEN»-نىڭ نەگىزگى مىندەتى مەملەكەتتىك ورگاندار, مەملەكەتتىڭ دامۋ ينستيتۋتتارى, بيزنەس پەن ايەلدەر ۇيىمدارى اراسىنداعى ىنتىماقتاستىق پەن ديالوگتى قامتاماسىز ەتۋ بولىپ تابىلادى. ول, سونىمەن قاتار, الدىنا ايەلدەردى «قازاقستان-2050» ستراتەگياسى مەن «نۇرلى جول» باعدارلاماسىن, ەكسپو-2017 جوباسىن جۇزەگە اسىرۋعا بەلسەنە قاتىسۋعا جۇمىلدىرۋدى, سونىمەن قاتار ولاردىڭ جۇمىسپەن قامتىلۋ دەڭگەيىن جوعارىلاتۋدى ماقسات ەتىپ قويىپ وتىر. بۇگىنگى تاڭدا ۇيىم بىرنەشە حالىقارالىق ۇيىم الەۋمەتتىك جوبالاردى جۇزەگە اسىرۋعا اتسالىسىپ كەلەدى. ولاردىڭ اراسىندا تاۋار ءوندىرۋشىلەرگە ارنالعان «حالىق ماركاسى-2015» ۇلتتىق كونكۋرسى, EXPO scheber, International Trade Programm, ايەلدەر كاسىپكەرلىگىن قولدايتىن Design & Art جوباسى جانە تاعى باسقالار بار. س.راقىمبەكوۆانىڭ پىكىرىنشە, الداعى ۋاقىتتا وتەتىن حالىقارالىق ەكسپو-2017 «بولاشاقتىڭ ەنەرگياسى» كورمەسىنىڭ ءساتتى ءوتۋى پرەزيدەنتىمىز نۇرسۇلتان نازارباەۆتىڭ ححI عاسىرداعى تۇراقتى دامۋ فورمۋلاسى رەتىندە ۇسىنىلعان ەنەرگوەكولوگيالىق باستامالارىن الەم حالقى بىرىگىپ بەلسەندى تۇردە جۇزەگە اسىرۋىنا بايلانىستى. سونىمەن بىرگە, حالىقارالىق ۇيىمدار مەن وتاندىق دامۋ ينستيتۋتتارىنىڭ عالامدىق G-Global جوباسى اياسىندا قوعام قايراتكەرلەرى مەن نوۆاتورلاردى بىرىكتىرۋدە الەۋەتتى مۇمكىندىكتەر تۋدىرادى. قازاقستاننىڭ «نازىك جاندارى» وسىنداي ماڭىزدى ماسەلەلەردى شەشۋدە بەيتاراپ ۇستانىمدا بولا المايدى. بەلسەندى ايەلدەردىڭ باستامالارىنا پارلامەنت سەناتىنىڭ دەپۋتاتى, G-Global حالىقارالىق حاتشىلىعىنىڭ جەتەكشىسى سەرىك نوگەربەكوۆ قولداۋ كورسەتىپ, عالامدىق ماقساتتارى بار جاڭا ۇيىمعا كوزدەگەن ماقساتتارىنا قول جەتكىزۋ جولىنداعى سەرپىندى جوعالتپاۋلارىن تىلەدى. – ءبىز الەمدىك جانە وتاندىق ينتەللەكت قاۋىمداستىقتارىمەن, سونىڭ ىشىندە ءتيىمدى يننوۆاتسيالىق جوبالارىنا رەسۋرستارىن سالاتىن ينۆەستورلارمەن تىكەلەي ديالوگ جۇرگىزۋگە مۇمكىنشىلىكتەر تۋعىزاتىن G-Global كوممۋنيكاتيۆتىك تۇعىرناماسىنىڭ الەۋەتتى مۇمكىنشىلىكتەرىن بارىنشا قولدانۋعا تىرىسۋدامىز. بۇگىنگى كۇنى G-Global تۇعىرناماسىندا «ەكسپو-2017 ۆيرتۋالدى كورمەسىمەن» تانىسۋعا بولادى, ال ءبىزدىڭ باستامالارىمىز بەن جوبالارىمىز عالامدىق وقيعالارعا قىزىعۋشىلىقتى ارتتىرىپ, قازاقستاندىقتاردا جاڭا ويلاۋ ۇدەرىسى «تەحنولوگيالىق» ويدى قالىپتاستىرۋدا قولعابىس بولادى, – دەدى س.نوگەربەكوۆ وسى ورايدا. سونىمەن قاتار, وتىرىستا ۇيىمعا مۇشە بولۋ, استانا مەن ميلاندا وتەتىن ءىس شارالار, جانە قازاقستان مەن باسقا مەملەكەتتەردەگى وكىلدىكتەر تۋرالى سۇراقتار تالقىلاندى.
ساكەن مايلىباي.
