«سوڭعى جىلدارى رۋحاني بايلانىستى جانداندىرۋ ءۇشىن كوپتەگەن ءىس-شارا اتقارىلدى. بىلتىر استانادا قۇرمەتتى پرەزيدەنتپەن بىرگە ايكول ماناستىڭ ەسكەرتكىشىن اشتىق. بۇگىن بىشكەكتە باۋىرلاستىعىمىزدىڭ تاعى ءبىر نىشانى – «دوستىقتىڭ التىن كوپىرى» ەسكەرتكىشىن اشامىز. مەن مۇنى قىرعىز ەلىنىڭ قازاق حالقىنا دەگەن ايرىقشا قۇرمەتى دەپ بىلەمىن. قۇرمەتتى پرەزيدەنتكە جانە بارشا قىرعىز حالقىنا العىس ايتامىن», دەدى مەملەكەت باسشىسى.
پرەزيدەنت توقاەۆتىڭ سوزىنشە, بىلتىرعى قىرعىزستان پرەزيدەنتىنىڭ قازاقستانعا ساپارى اياسىندا ەكى ەل جاستارىن جاقىنداستىراتىن بىرقاتار ۋاعدالاستىققا قول جەتكىزىلگەن. سونىڭ ناتيجەسىندە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وش قالاسىنداعى فيليالى اشىلىپ جاتىر. سونىمەن قاتار قازاقستان ۇكىمەتى قىرعىز ستۋدەنتتەرىنە 50 گرانت بولگەن.
«كەلەسى جىلدان باستاپ گرانت سانىن 60-قا دەيىن كوبەيتەمىز دەپ شەشتىك», دەدى ول.
ساپار اياسىندا بىشكەكتە قازاقستاننىڭ كينو كۇندەرى مەن ءۇشىنشى جاستار فورۋمى ءوتىپ جاتىر.
كەزدەسۋ بارىسىندا تۋريزم جانە سپورت سالاسىنداعى ىنتىماقتاستىق ماسەلەلەرى دە تالقىلاندى.
«كەلەسى جىلى قىرعىز ەلىندە VI دۇنيەجۇزىلىك كوشپەندىلەر ويىندارى وتەدى. ءدۇبىرلى دودانىڭ تابىستى وتۋىنە تىلەكتەسپىز, ءبىزدىڭ جاقتان قولداۋ كورسەتۋگە دايىنبىز», دەدى پرەزيدەنت.
