ينفراقۇرىلىمدىق جوبالاردىڭ يگىلىگى

مەملەكەت باسشىسىنىڭ ايتۋىنشا, كەيىنگى ۇرپاققا جوعارى ساپالى اۆتو جانە تەمىرجولداردى قالدىرۋ كەرەك. سونداي-اق ءتيىمدى جۇمىس ىستەيتىن اۋە حابتارىن, تەمىرجول بەكەتتەرى مەن تەڭىز پورتتارىن سالۋ دا – ماڭىزدى مىندەت. پرەزيدەنتتىڭ وسىناۋ ىرگەلى تاپسىرماسىن ورىنداۋ ماقساتىندا كوپتەگەن جوبا قارقىندى جۇرگىزىلىپ جاتىر. قازىرگى ۋاقىتتا تەمىرجول سالا­­سىندا جالپى ۇزىندىعى 1 300 شا­قىرىمنان اساتىن 4 ءىرى جوبا قولعا الىنعان. ولاردىڭ قاتا­رىن­دا دوستىق – مويىنتى, الماتى قالاسىنىڭ اينالما تەمىر­جولى, داربازا – ماقتاارال جانە باقتى – اياگوز بار. بيىل الماتى قالاسىنىڭ اينالما تەمىر­جولى مەن دوستىق – مويىنتى ۋچاسكەسىنىڭ ەكىنشى جولىنىڭ قۇرىلىسى اياقتالادى. بۇل جۇك تاسىمالى كولەمىن 5 ەسە ارتتىرۋعا مۇمكىندىك بەرمەك.

ال ترانسقازاقستاندىق تە­مىر­جول ءدالىزى جوباسى شەڭ­بەرىن­­دە 5 جىل­دا 16 مىڭ شاقىرىم تەمىر­جول سالىنىپ, جوندەلۋگە ءتيىس. 125 تەمىرجول ۆوكزالى اۋقىمدى جاڭعىرتۋدان ءوتىپ جاتىر. بۇل – ءابسوليۋتتى رەكوردتىق كورسەت­كىش. جولاۋشىلار ۆاگوندارى پار­كىن جاڭارتۋ دا جالعاسىن تاپتى: بيىل پارك 175 جاڭا ۆاگونمەن تولىعادى, ونىڭ ىشىندە 51 بىرلىگى – «شتادلەر» كومپانياسىنىڭ ءونىمى.

دامۋ باعىتىنىڭ ايقىندالۋى سوڭعى گەوساياسي داعدارىسپەن تۇسپا-تۇس كەلگەن ترانسكاسپي حالىقارالىق كولىك ءدالىزىنىڭ بولاشاعىن دا اسا جوعارى دەپ باعالايدى ماماندار. مۋلت­­­مودالدى باعىت رەتىندە سي­پات­­تالاتىن بۇل كولىك مارش­رۋتى­نىڭ الەۋەتىن ارتتىرۋ ماقساتىندا قازىر اقتاۋ جانە قۇرىق پورتتارىنىڭ جۇكتەمە الەۋەتى ارتتىرىلىپ جاتىر. جاڭعىرتۋدان كەيىن اتالعان ەكى پورتتىڭ جۇك قابىلداۋ, جۇك جەتكىزۋ مۇمكىندىكتەرى ەسەلەپ كوبەيمەك. بۇل – تاراپتار ءۇشىن قولايلى مۇمكىندىك. جۋىردا قىتاي تاراپىمەن بىرلەسىپ اقتاۋ پورتىندا كونتەينەرلىك تەرمينال ىسكە قوسىلدى. سيان قالاسىندا ءبىزدىڭ قۇرعاق پورت تابىستى جۇمىس ىستەپ جاتىر. سەلياتينو, سۆيسلوچ جانە بۋداپەشت ما­ڭىندا دا جاڭا تەرمينالدار بوي كوتەرمەك. ماۋ­سىم ايىندا گرۋ­زيانىڭ پوتي پورتىندا ەلىمىزدىڭ العاشقى مۋلتيمودالدى تەرمينالى اشىلدى.

الماتى, قىزىلوردا, شىمكەنت قالالارىندا جاڭا جو­لاۋ­­شىلار تەرمينالدارى اشى­­لىپ, پرەزيدەنت نازار اۋدار­­عاننان كەيىن ارقالىق اۋە­جايى­نىڭ جۇمىسى قالپىنا كەل­تىرى­لۋدە. كاتونقاراعاي, زايسان, كەندىرلى تۇرعىندارىنىڭ دا جاڭا اۋەجاي قىزمەتىن پايدالاناتىن كۇنى الىس ەمەس.

جۇك تاسىمالىن ارتتىرۋ جانە اۆياتسيالىق حابتاردى دامىتۋ ءۇشىن 6 اۋەجاي انىقتالدى. ولاردى دامىتۋعا جەكە ينۆەستيتسيا تارتۋ جوسپارلانعان. بيىل 36 جاڭا حالىقارالىق اۋە باعىتى اشىلىپ, 8 شەتەلدىك اۋە كومپانياسى قازاقستاندىق نارىققا كىردى. ىشكى باعىتتاردا 61 مارشرۋت بويىنشا اپتاسىنا 850 رەيس ورىندالادى.

پرەزيدەنت جولداۋدا اۆتوكولىك جولدارىنىڭ دا جاي-كۇيىنە توقتالىپ: «بيىل ەلىمىزدە 12 مىڭ شاقىرىمعا جۋىق جول سالىنىپ, جوندەلىپ جاتىر. قازاقستاندا مۇنداي اۋقىمدى جۇمىس بۇرىن-سوڭدى بولماعان. استانا – الماتى, اقتوبە – اتىراۋ – استراحان, تالدىقورعان – وسكەمەن باعىتىنداعى كۇرە جول­­دار­دى قايتا جاڭعىرتۋ جۇمىس­­تارى اياقتالىپ قالدى. 2,5 مىڭ شا­قىرىمعا سوزىلاتىن وبلىس­­ارالىق جانە اۋدانارا­لىق جولدار­دى ورتا دەڭگەيدە جوندەۋگە ارنال­عان باعدارلامانىڭ ءمان-ماڭى­زى زور. ءدال وسى جولدارمەن جۇرت وتە ءجيى جۇرەدى. سوندىقتان باعدار­لامانىڭ اۋقىمىن كەڭەيتىپ, وعان كەمىندە 10 مىڭ شاقىرىم جولدى قامتۋدى تاپسىرامىن», دەپ ناقتى مىندەت جۇكتەدى.

بيىل جول قۇرىلىسى مەن جوندەۋ جۇمىسىمەن 13 مىڭ شا­قىرىم جول قامتىلىپتى. ورتا­لىق – باتىس ءدالىزى قۇرى­لىسى باس­تالىپ, اقتوبە – ۇلعاي­سىن, قارا­عاندى – جەزقاز­عان ۋچاسكە­لەرىندە جانە سارىاعاش, رۋدنىي, شىمكەنت قالالارى­نىڭ اينالما جولدارىندا قۇرى­لىس قىزا ءتۇستى. قالباتاۋ – مايقاپ­شاعاي جولى دا اياقتالۋعا جاقىن. جۇك كولىك­تەرىنىڭ شامادان تىس جۇكتەمەسىن باقىلاۋ ءۇشىن 2025 جىلعا دەيىن 220 اۆتومات­تاندىرىلعان ولشەۋ ستانساسىن ورناتۋ جوسپارلانعان.