زاۋىت وكىلدەرىنىڭ ايتۋىنشا, تسيفرلى جۇيەلەر قاۋىپسىزدىكتى, تيىمدىلىكتى, ورنىقتىلىقتى ارتتىرۋعا مۇمكىندىك بەرەدى جانە ەڭ باستىسى, ەڭبەك جاعدايلارىن قولايلى ءارى قاۋىپسىز ەتۋگە سەپتەسەدى.
«تسيفرلاندىرۋ ماسەلەلەرى اقسۋ فەرروقورىتپا زاۋىتى ءۇشىن كۇن تارتىبىنەن ءتۇسىپ كورگەن ەمەس. بىزدە بارلىق نەگىزگى وندىرىستىك بولىمشەلەر اۆتوماتتاندىرىلعان جۇيەلەرمەن جابدىقتالعان, شيكىزاتتىڭ كەلىپ تۇسۋىنەن باستاپ, وڭدەۋ جانە دايىن ءونىمدى جىبەرۋگە دەيىنگى بارلىق كەزەڭ تسيفرلانعان. وندىرىستە تسيفرلىق تەحنولوگيالاردى ەنگىزە وتىرىپ, وتاندىق شەشىمدەردى قولدانۋدى ارتتىرىپ, شەتەلگە تاۋەلدىلىكتى ازايتۋدى ماقسات ەتىپ وتىرمىز», دەيدى كاسىپورىن ديرەكتورى مۇسابەك ماقاشەۆ.
مۇندا تەمىرجول كولىگىن باسقارۋعا ارنالعان «Dispatch» دەپ اتالاتىن جۇيە بار. ءوندىرىس ورنىندا تەمىرجول ۆاگوندارىنىڭ قوزعالىسى مەن ورنالاسۋىن قاداعالاۋعا قاتىستى قاجەتتىلىك بۇرىننان قالىپتاسقان. سەبەبى زاۋىت اۋماعىنا تاۋلىگىنە 900 ۆاگونعا دەيىن كىرىپ-شىعۋى مۇمكىن. جاڭا جوبا جەتەكشىسى دميتري رودىگيننىڭ سوزىنشە, بۇرىن ءبارى قولمەن اتقارىلاتىن. دامىتۋشىلار كومانداسى قىسقا مەرزىمدە «Dispatch» ۆەب-قوسىمشاسىن جاساپ شىعاردى. ەندى ول ءار ۆاگوننىڭ ناقتى ۋاقىتتاعى ورنىن كورسەتە الادى.
قابىلداۋشىلار ەلەكتروندى جول پاراقتارىن تولتىرىپ, حابارلاندىرۋلار الادى. نەبارى 2-3 مينۋتتىڭ ىشىندە ەسەپ جاسايدى. ال بۇرىن بۇل ءۇردىستى جۇزەگە اسىرۋعا 40 مينۋت جۇمسالاتىن. ەندى بارلىعى بىردەن بازاعا تىركەلەدى. سونىڭ ناتيجەسىندە تەمىرجولشىلار جۇيەدەن ۆاگوندار تۋرالى بارلىق مالىمەتتى كورىپ, ۋاقىت ۇنەمدەيدى. الداعى ۋاقىتتا بۇل جوبانى ERG-ءدىڭ بارلىق كاسىپورىندارىنا تاراتۋ جوسپارلانعان.
تسيفرلاندىرۋدىڭ تاعى ءبىر اۋقىمدى جوباسى – MES ERG. بۇل – وندىرىستىك ۇدەرىستەردى جەدەل باسقارۋ جۇيەسى. بۇگىندە ول ارقىلى بارلىق 26 پەشتە جۇمىس ىستەيتىن ەلەكتروندى پەش جۋرنالىن جۇرگىزۋ مۇمكىندىگى بار. بۇل اگرەگاتتاردىڭ جۇمىسىن باقىلاۋعا مۇمكىندىك بەرەدى. جۇيە پەشتەردىڭ اۋىسىم نەمەسە تاۋلىك بويى قالاي جۇمىس ىستەگەنىن تولىق كورسەتەدى. تاعى ءبىر جاڭاشىلدىق – فەرروقورىتپا پەشتەرى ەلەكترودتارىنىڭ جۇمىسىن باقىلاۋ ءۇشىن MES جۇيەسىندە بىرنەشە فۋنكتسيونالدى ەكران ازىرلەنگەن. ەلەكترود ماسساسىن سالۋ ۇدەرىسى اۆتوماتتى تۇردە باقىلانادى. وسى قۇرالدار مەتاللۋرگتەرگە ءوندىرىستىڭ ۇزدىكسىز جۇمىسىن قامتاماسىز ەتۋگە كومەكتەسەدى.
تسيفرلاندىرۋ اقسۋ فەرروقورىتپا زاۋىتىنداعى مەتالل بالقىتۋدى دا قامتىعان. وندىرىستەگى قۇيۋ ماشينالارىن اۆتوماتتاندىرۋ جۇيەسى ەنگىزىلىپ, جۇيە بالقىتۋ ۇدەرىسىن اۆتوماتتى تۇردە باسقارۋعا جول اشادى. ءشومىشتىڭ كولبەۋ بۇرىشىن, كونۆەيەر جىلدامدىعىن, سۇيىق فەرروقورىتپا اعىنىنىڭ قيماسىن, تەمپەراتۋرانى ولشەپ, رەتتەيدى. بۇل مەتاللۋرگتەردىڭ جۇمىسىن ايتارلىقتاي جەڭىلدەتتى.
زاۋىت وكىلدەرى اۆتوماتتاندىرىلعان مەديتسينالىق تەكسەرۋلەر ەنگىزىلگەنىن دە اتاپ ءوتتى. ەندى مەتاللۋرگتەردىڭ اۋىسىم الدىنداعى جانە اۋىسىمنان كەيىنگى تەكسەرۋدەن وتۋىنە بىرنەشە مينۋت قانا ۋاقىت كەتەدى. جابدىقتار قان قىسىمىن, تامىر سوعىسى, دەنە قىزۋىن, تىنىس الۋدا شىعارىلاتىن اۋاداعى الكوگول دەڭگەيىن ولشەيدى. ناتيجەلەر بىردەن كورپوراتيۆتىك «qollab» قوسىمشاسىنا جانە «ەۋرازيا» مەديتسينا ورتالىعىنا تۇسەدى. ەگەر كورسەتكىشتەر نورمادان اۋىتقىپ كەتسە, دارىگەرلەرگە جەدەل حابارلاما كەلىپ, ولار دەرەۋ ءىس-شارالار قابىلداي الادى. بۇل جوبا وندىرىستەگى قاۋىپ-قاتەردى ازايتىپ, اۋرۋلاردى ەرتە كەزەڭدە انىقتاۋعا سەپ.
پاۆلودار وبلىسى,
اقسۋ قالاسى
