ء«بىز 1998 جىلى كونكۋرسقا قاتىسىپ, ساياباقتى مەنشىگىمىزگە الدىق. ول كەزدە مۇندا 5 اتتراكتسيون عانا بار ەدى. ساياباقتا قورشاۋ, جارىق جوق, اللەيادا سۋسىعان قۇم جاتاتىن. قيىن كەزەڭ ەدى عوي. قىسقاسى, ساياباق ەشكىمگە كەرەكسىز كۇيدە قالعان. ول جىلدارى يەلىگىمدە جاستىق شىعاراتىن تسەح بار ەدى. سول تسەحتى ساۋدالاپ, وسى ساياباقتى الدىق. قاراجات تاپشى كەزدە قيىنشىلىقتى كوپ كوردىك. مۇندا ءتىپتى دارەتحانا دا بولمادى. جۇمىسشىلار ءازىل-شىنىن ارالاستىرىپ: «ەگەر ءسىز دارەتحانا سالساڭىز, سىزگە ەسكەرتكىش قويامىز», دەدى. سىزگە وتىرىك, ماعان شىن, دارەتحانانىڭ ماسەلەسىن ايتىپ, سول كەزدەگى اكىم بولات جىلقىشيەۆقا باردىم. ول كىسى: «دۇرىس ماسەلە كوتەرىپ وتىرسىز. تەك زاڭ اياسىندا ىستەڭىز», دەدى. ال زاڭ رۇقسات بەرمەيدى. سول جىلدارى قوعامدىق ورىندا دارەتحانا دەگەنىڭىز جەر استىندا بولۋى كەرەك ەكەن. ماسەلەنىڭ ۋشىعىپ تۇرعانىن اكىمگە قايتا جەتكىزگەن سوڭ عانا رۇقسات الدىم», دەيدى ورتالىق ساياباقتىڭ يەسى اسان قوشمامبەتوۆ سول جىلدارى تۋىنداعان قيىندىقتاردى ەسكە الىپ.
قازىر قاراساڭىز, تۇرار رىسقۇلوۆ اتىنداعى ساياباق توتىداي تارانىپ تۇر. مۇنداعى جانعا جايلى اتموسفەرا بارشانى وزىنە شاقىرىپ تۇراتىنداي كورىنەدى. بيىك تالداردىڭ ساياسىندا تىنىعۋدى قالاعان جۇرت وسى جاققا اعىلىپ جاتادى. ونداعان اتتراكتسيونعا قىزىققان جۇرت بالالارىن وسىندا اكەلەدى. جۇمىسشىلار ساياباقتىڭ ءسانىن كەلتىرۋ جولىندا الا تاڭنان قارا كەشكە دەيىن تىنىمسىز ەڭبەك ەتىپ جاتىر.
«يەلىگىمىزگە العان جىلى ساياباقتا تالدار قۋراپ جاتتى. ايتىپ-ايتپاي نە كەرەك, جەدەل ىسكە كىرىستىك. 6–8 جاسار ەكى قىزىم 5–10 سانتيمەتر سايىن تال كوشەتىن ەكتى. ولارعا بۇل جۇمىس وڭاي سوققان جوق. قىزدارىم: «اكە, ەلدىڭ بالالارى ويناپ ءجۇر عوي», دەيتىن. قىنا اعاشتىڭ ورنىنا مالبا وتىرعىزدىق. ايتساڭ, ماقتانعانداي بولاسىڭ. دەگەنمەن ەل اۋماعىنداعى كوپتەگەن ساياباقتى ارالاپ كوردىك. سوندا سان ءتۇرلى اتتراكتسيونى ەڭ كوپ, ءتۇرلى تالى مەن گ ۇلى جايقالىپ تۇرعان ساياباق بىزدىكى ەكەنىنە كوزىمىز انىق جەتتى. سوندىقتان 30 جىلعا جۋىق ۋاقىت بويى اتقارعان ەڭبەگىمىزبەن ماقتانۋعا بولاتىن سەكىلدى. بارىمىزدى وسى ساياباققا سالدىق», دەيدى اسان قوشمامبەتوۆتىڭ جارى ايدينا نۇرلىبەكقىزى.
ساياباقتاعى سۋسىعان قۇمنان اسپانعا كوتەرىلگەن شاڭ جۇرتتىڭ مازاسىن كەتىرەتىن. 90-جىلدارى كەلگەن جۇرت پىستە شاعىپ, دەمالىس ورنىن قوقىسقا تولتىراتىن. سول ولقىلىقپەن كۇرەسۋ ماقساتىندا ساياباق باسشىسى اۋماقتى قورشاۋعا بەل بۋدى. قولعا العان ءىستى ساتىمەن اياقتادى. اۋەلى مۇندا بار بولعانى 5 اتتراكتسيون ورنالاسسا, ا.قوشمامبەتوۆ ساياباقتى مەنشىگىنە العان سوڭ, مۇنداعى اتكەنشەكتەر مەن اتتراكتسيوندار سانى قىرىقتان اسىپتى.
«ساياباق ىشىندە سالىنعان دالاداعى ساحنانى كەلۋشىلەرگە تەگىن بەرەمىز. مۇندا 702 ورىن بار. تسيرك كەلسە دە, كونتسەرت قويامىز دەگەن انشىلەرگە دە تەگىن ۇسىنامىز. تەك تازالىقپەن اينالىساتىن ازاماتتارعا تيەسىلى اقىنى تولەسە بولعانى. ساحنانى ايگىلى يۋرمالاداعى جوبا نەگىزىندە جاسادىق. وندا 1 500 ورىندىق بولسا, ءبىزدىڭ ساياباقتاعى ساحنادا 702 ورىن بار. ايىرماشىلىق سول عانا. مۇندا سەبەزگى بولمەسى دە, دارەتحانا دا بار. 100 ادامعا ارنالعان كيىم اۋىستىرۋ بولمەسى دە قاراستىرىلعان», دەيدى ا.قوشمامبەتوۆ.
تاۋەلسىزدىكتىڭ العاشقى جىلدارىندا قانداي دا ءبىر ءىستى باستاۋدىڭ ماشاقاتى كوپ ەدى. ودان بولەك, ساياباقتاعى قىزمەتكەرلەردىڭ جالاقىسىن ۋاقتىلى وتەۋ دە وڭاي شارۋا ەمەس. تابىس تابۋ جولىندا ۋاقىت سۇرانىسىنا ساي ىسكەر بولۋىڭ كەرەك. جۇمىسشىلارعا جاقسى ەڭبەكاقى تولەۋ ءۇشىن ساياباق باسشىسى جاڭا قادامعا بارۋدى ءجون دەپ تاپقان. ول قىزمەتكەرلەرىمەن اقىلداسا كەلە, «كۇلكى بولمەسىنە» قاجەتتى «قيسىق اينا» شىعارۋعا تاۋەكەل ەتىپتى. وسىلايشا, تابىستى ەسەلەۋگە دەن قويعان مەنەدجەر ا.قوشمامبەتوۆ كەيىننەن ارتىنا شاعىن ۆاگوندار تىركەلگەن تراكتور قۇراستىرىپ, ونى دا نارىققا شىعارىپتى.
قيىن-قىستاۋ كەزەڭدە ا.قوشمامبەتوۆتىڭ وتباسى ءۇشىن نەسيە الۋ دا وڭايعا سوقپادى. زايىبى ايدينا نۇرلىبەكقىزىنىڭ ايتۋىنشا, اۋەلى انالارىنا تيەسىلى ءۇيدى كەپىلگە قويىپ, اتتراكتسيون الىپتى. كەيىننەن سول اتتراكتسيونداردى تاعى دا كەپىلگە قويىپ, جاڭا اتتراكتسيوندار الۋ ارقىلى ساياباققا كەلۋشىلەردىڭ سانىن ارتتىرعان. وسىلايشا, ءار ەكى-ءۇش جىل سايىن ساياباقتى تۇرلەندىرىپ وتىرعان. ساپاعا ءمان بەرگەن باسشىلىق بارلىق قيىندىققا قاراماستان, باعاسى 100 مىڭ دوللاردان اساتىن رەسەيلىك اتكەنشەكتەردى اكەلىپ ءجۇردى. ايتۋلارىنشا, تەك ءبىر عانا اتتراكتسيون قىتايدىكى ەكەن.
«العان اتتراكتسيونداردىڭ ەڭ قىمباتىنىڭ باعاسىن 50 ميلليون دەپ ەسەپتەيىكشى. ول كەزدە بيلەتتىڭ باعاسى – 200–300 تەڭگە. شىعىندى قايتارۋ ءۇشىن قانشا ادام كەلۋى كەرەك؟ اتتراكتسيون ءوز-ءوزىن مۇلدە اقتامايدى. ويتكەنى حالىق ماۋسىم-قىركۇيەك ارالىعىندا عانا كەلەدى. سوندىقتان قىزمەتكەرلەرمەن اشىق ديالوگ ورناتتىم. تابىس ارتقان كەزدە ولار دا كوپ تابىس تاپتى. قانشا قاراجات تۇسكەنىن وزدەرى ەسەپتەپ, ەلەكتريككە قانشا جالاقى, باسقاعا قانشا ايلىق تولەيتىنىمىزدى سولار شەشتى. بيۋدجەتتى وزدەرى رەتتەگەن سوڭ, ماعان ايلىق تولەۋ ماسەلەسى جەڭىل بولدى. جۇمىسشىلاردىڭ الدىندا ادال بولعانىمنان ۇتىلعان جوقپىن. ولار ماعان قاي كەزدە دە سەنىم ارتادى.
اشىقتىق دەگەنىمىز سول, وزىمە كولىك الۋ ءۇشىن دە قىزمەتكەرلەر-دەن رۇقسات سۇرادىم. ويتكەنى پاندەميا كەزىندە كولىگىمدى ساتىپ, جاياۋ قالعان ەدىم. ولارعا اشىق بولساڭ, قۇرمەتتەسەڭ, قىزمەتكەرلەر دە سەنى قادىرلەيدى. جۇمىسقا كەلە جاتقانىمدا قىزمەتكەرلەرىم قانداي تالاپ قويادى دەپ قايمىعىپ وتىرامىن. باسشى جۇمىسشىلارىمەن ەسەپتەسكەندە عانا جۇمىس جۇيەلى جۇرەدى», دەيدى ا.قوشمامبەتوۆ.
قازىردە تۇرار رىسقۇلوۆ اتىنداعى ساياباققا كەلۋشىلەر سانى از ەمەس. اسىرەسە بالدىرعاندار مۇنداعى «ايمەر» اسپالى ارقاندى اتتراكتسيونىنا قاتتى قىزىعادى. سونداي-اق «Rollglider», «مانەج», «پەتۋشوك», «گينگانت» اتتراكتسيوندارى مەن ساياباق ىشىندەگى ءتۇرلى ۇيىرمە بالالاردى وزىنە شاقىرىپ تۇرادى. ا.قوشمامبەتوۆتىڭ ءوز قولىنان شىققان ءتۇرلى بۇيىم دا بالدىرعانداردى قىزىقتىرادى.
قالاي دەسەك تە, تاۋەكەلگە بەل بۋىپ, توزعان ساياباقتى يەلىگىنە الىپ, تۇلەتۋگە, تۇرلەندىرۋگە نيەت ەتكەن ا.قوشمامبەتوۆتىڭ ىسكەرلىگى كوپكە ۇلگى. بۇگىندە ساياباق باسشىسى 32 ادامدى تۇراقتى جۇمىسپەن قامتىپ وتىر. ساياباققا كەلۋشىلەر سانى ارتقان جاز مەزگىلىندە تاعى دا قوسىمشا قىزمەتكەرلەر الادى. 32 ادامعا جىل ون ەكى اي جالاقى تولەۋ وڭايعا سوقپاسا دا, ىسكەر ازامات بىلىكتى مامانداردان ايىرىلىپ قالماۋ جولىندا جانىن سالىپ ەڭبەك ەتىپ جاتىر.
تاراز
