ءىس-شاراعا قازاقستان سىرتقى ىستەر ءمينيسترىنىڭ ورىنباسارى ەرمۇحامبەت قونىسپاەۆ, قىرعىزستان سىرتقى ىستەر ءمينيسترىنىڭ ءبىرىنشى ورىنباسارى اسەين يساەۆ, قىرعىزستان پرەزيدەنتىنىڭ وش وبلىسىنداعى وكىلەتتى وكىلى ەلچيبەك دجانتاەۆ, وش قالاسىنىڭ مەرى جەنيشبەك توكتورباەۆ, سونداي-اق قىرعىز قوعامىنىڭ جانە ىسكەر توپتارىنىڭ وكىلدەرى قاتىستى.
ءىس-شاراعا قاتىسۋشىلارعا ارناعان سوزىندە ە.قونىسپاەۆ اتالعان وڭىردە قر باس كونسۋلدىعىنىڭ اشىلۋى ەكى ەل اراسىنداعى تاتۋ كورشىلىك پەن باۋىرلاستىق قاتىناستاردىڭ بەرىك ءارى مىزعىماس سيپاتىن ايقىندايتىن ەرەكشە ماڭىزدى وقيعا ەكەنىن اتاپ ءوتتى.
«قازاقستان مەن قىرعىزستان – كورشىلەر عانا ەمەس, ورتاق قۇندىلىقتار مەن ورتالىق ازياداعى بەيبىتشىلىك, تۇراقتىلىق پەن وركەندەۋگە ۇمتىلىس بىرىكتىرگەن ەڭ جاقىن سەرىكتەستەر جانە وداقتاستار. بۇگىندە قازاق-قىرعىز ىنتىماقتاستىعى جان-جاقتى ءوزارا ءىس-قيمىلدىڭ جوعارى قارقىنىمەن سيپاتتالادى. مەملەكەت باسشىلارىمىزدىڭ ساياسي ەرىك-جىگەرىنىڭ جانە جوعارى ءارى بيىك دەڭگەيدەگى تۇراقتى بايلانىستاردىڭ ارقاسىندا ەكى ەل اراسىندا مەملەكەتارالىق ءوزارا ءىس-قيمىلدىڭ ۇلگىلى مودەلى قالىپتاستى», دەدى ءمينيستردىڭ ورىنباسارى.
وسىعان وراي ە.قونىسپاەۆ وش قالاسىندا قر باس كونسۋلدىعىنىڭ اشىلۋى ەلدەر مەن حالىقتار اراسىنداعى باۋىرلاستىق قاتىناستاردى ودان ءارى نىعايتۋعا تىڭ سەرپىن بەرەتىن تاعى ءبىر ماڭىزدى قادام بولاتىنىنا سەنىم ءبىلدىردى.
ءوز كەزەگىندە ا.يساەۆ قازاقستاننىڭ وش قالاسىندا باس كونسۋلدىعىنىڭ اشىلۋى – ەكى باۋىرلاس ەل اراسىنداعى وداقتاستىق قاتىناستاردىڭ تەرەڭدەي تۇسكەنىن كورسەتەتىن ماڭىزدى دالەل ەكەنىن جانە بۇل قادام ەكىجاقتى جان-جاقتى ىنتىماقتاستىقتى ودان ءارى نىعايتىپ, كەڭەيتۋگە جاڭا سەرپىن بەرەتىنىن اتاپ ءوتتى.
وش قالاسىنىڭ مەرى ج.توكتورباەۆ ءوز سوزىندە ۇلى قازاق اقىنى ءارى ويشىلى اباي قۇنانباي ۇلىنىڭ 180 جىلدىق مەرەيتويىنا وراي قالاداعى كوشەلەردىڭ بىرىنە ونىڭ ەسىمى بەرىلەتىنىن جەتكىزدى.
قازاقستان باس كونسۋلدىعىنىڭ كونسۋلدىق وكرۋگىنە وش, جالال-اباد جانە باتكەن وبلىستارى كىرەدى. اتالعان وڭىرلەردە شامامەن 3 مىڭعا جۋىق قازاقستان ازاماتى تۇرادى.
500 مىڭعا جۋىق حالقى بار وش قالاسى – قىرعىزستاننىڭ وڭتۇستىك وڭىرىندە اكىمشىلىك, ەكونوميكالىق جانە مادەني ورتالىق رەتىندە ماڭىزدى ءرول اتقاراتىن ەلدىڭ ەكىنشى ءىرى قالاسى.
