ەنەرگەتيكا ءمينيسترى ەرلان اقكەنجەنوۆتىڭ ايتۋىنشا, نەگىزگى ماقسات – ەلدىڭ ەكونوميكالىق ءوسىمى مەن ازاماتتاردىڭ ءال-اۋقاتىنا بەرىك نەگىز بولاتىن سەنىمدى ءارى زاماناۋي ەنەرگەتيكالىق جۇيە قالىپتاستىرۋ.
«ەلەكتر ەنەرگەتيكاسى مەن جىلۋمەن جابدىقتاۋداعى باستى مىندەت — قۋات كوزدەرىن ارتتىرۋ جانە سەنىمدى ينفراقۇرىلىم قۇرۋ ءۇشىن جۇيەلى تۇردە جاڭعىرتۋ جۇمىستارىن جۇرگىزۋ», دەدى مينيستر.
پرەزيدەنتتىڭ تاپسىرماسىنا سايكەس, الداعى بەس جىلدا جالپى قۋاتى 14 گۆت جاڭا ەنەرگيا كوزدەرى ىسكە قوسىلادى. سونىڭ ىشىندە سوڭعى ەكى جىلدا 1,3 گۆت قۋات پايدالانۋعا بەرىلدى.
بيىل تاعى 622 مۆت قوسۋ جوسپارلانسا, 2026 جىلعا قاراي شامامەن 2 700 مۆت ىسكە قوسىلادى.
قازىر تۇركىستان وبلىسىندا قۋاتى 1000 مۆت بولاتىن ەلەكتر ستانساسى سالىنىپ جاتىر. سونىمەن قاتار, قىزىلوردا قالاسىندا 240 مۆت جاڭا جىلۋ ەلەكتر ورتالىعىنىڭ قۇرىلىسى باستالدى.
