Tesla كومپانياسىنىڭ نەگىزىن قالاۋشى, الەمدەگى ەڭ باي ادامداردىڭ ءبىرى يلون ماسك بۇعان دەيىن «America Party» اتتى جاڭا ساياسي پارتيا قۇراتىنىن جاريالاعان ەدى. ول ەكى ۇلكەن پارتياعا بالاما كۇش رەتىندە 2026 جىلعى سايلاۋعا قاتىسۋدى كوزدەگەن.
الايدا ءىرى كاسىپكەر بۇل جوسپارىن كەيىنگە ىسىرىپ, باستى نازارىن ءوز بيزنەسىنە اۋدارۋدى شەشتى. بۇعان قوسا, ماسك رەسپۋبليكالىق پارتيامەن ارا-قاتىناستى بۇزعىسى كەلمەيدى. سەبەبى ول دونالد ترامپتىڭ سەرىگى, قازىرگى ۆيتسە-پرەزيدەنت دجەي دي ۆەنستى 2028 جىلعى پرەزيدەنتتىك سايلاۋدا نەگىزگى ۇمىتكەر رەتىندە قولداۋعا دايىن.
جۋرناليستەردىڭ جازۋىنشا, سوڭعى اپتالاردا ماسك پەن ۆەنس بىرنەشە مارتە كەزدەسكەن. ماسك ەندى ءوز بايلىعىن جاڭا پارتياعا ەمەس, ۆەنستىڭ ساياسي بولاشاعىنا جۇمساۋدى ءجون كورىپ وتىر.
ايتا كەتەيىك, 2024 جىلى ماسك دونالد ترامپتىڭ سايلاۋالدى ناۋقانىنا جۇزدەگەن ميلليون دوللار بولگەن بولاتىن. بىراق ەكەۋىنىڭ اراسىندا كەيىن كەلىسپەۋشىلىكتەر تۋىندادى.
ال ساراپشىلار قازىردىڭ وزىندە دجەي دي ۆەنستى ترامپتىڭ ورنىن باساتىن باستى ۇمىتكەر دەپ سانايدى. سوڭعى ساۋالنامالاردا ول 2028 جىلعى رەسپۋبليكالىق پارتيا اتىنان سايلاۋعا قاتىسۋشىلاردىڭ كوشباسىندا تۇر.
