فوتو: ءماجىلىستىڭ ءباسپاسوز قىزمەتى
جەرگىلىكتى تۇرعىندارمەن كەزدەسۋدەن سوڭ يۋليا كۋچينسكايا ورتالىق جانە جەرگىلىكتى اتقارۋشى ورگاندار وكىلدەرىنىڭ قاتىسۋىمەن اقمولا وبلىسىنداعى سۋمەن جابدىقتاۋ ماسەلەلەرىنە ارنالعان كەڭەس وتكىزدى. 2025 جىلدىڭ سوڭىنا دەيىن حالىقتى ساپالى اۋىز سۋمەن قامتاماسىز ەتۋ – مەملەكەت باسشىسى مەن «AMANAT» پارتياسىنىڭ سايلاۋالدى باعدارلاماسىنداعى باستى مىندەتتىڭ ءبىرى.
«ساپالى اۋىز سۋعا قول جەتكىزۋ – ءاربىر ازاماتتىڭ زاڭدى قۇقىعى, بۇل ارتىقشىلىق ەمەس, ومىرلىك قاجەتتىلىك. ەگىندىكول اۋدانىندا كوپ جىلدان بەرى قوردالانعان ماسەلە پارتيامىز بەن مەملەكەتتىك ورگانداردىڭ جۇيەلى جۇمىسىنىڭ ارقاسىندا شەشىمىن تابۋدا. ءبىزدىڭ باستى مىندەتىمىز – ماسەلەنى ۋاقتىلى شەشىپ, ءاربىر اۋىل مەن ءاربىر ءۇيدى ساپالى اۋىز سۋمەن قامتاماسىز ەتۋ», دەدى دەپۋتات.
وبلىستىڭ ءۇش اۋدانىن اۋىز سۋمەن قامتىپ وتىرعان نۇرا توپتىق سۋ قۇبىرىنىڭ جاي-كۇيىنە ەرەكشە نازار اۋدارىلدى. بۇل نىسان جىلدار بويى حالىقتى ابىگەرگە سالعان باستى ماسەلەنىڭ ءبىرى بولىپ وتىر. تۇرعىنداردىڭ «AMANAT» پارتياسىنا جاساعان وتىنىشىنەن كەيىن قۇبىردىڭ قايتا جاڭعىرتىلۋى ەرەكشە باقىلاۋعا الىندى. 2023 جىلى اۋقىمدى جۇمىس قولعا الىنىپ, 2024 جىلدىڭ شىلدەسىندە ونىڭ ماڭىزدى كەزەڭى اياقتالدى. ناتيجەسىندە سابىندى اۋىلىنان ەگىندىكولگە دەيىنگى 68,5 شاقىرىمدىق بولىك قايتا قالپىنا كەلتىرىلدى. بۇل اۋداننىڭ ەداۋىر بولىگىن سۋمەن قامتۋعا مۇمكىندىك بەردى.
بيىلعى جىلى سۋ نىساندارىن جوندەۋگە, سورعىلاردى, ىسىرمالاردى جانە سۋ وتكىزەتىن قۇبىرلاردى اۋىستىرۋعا, ەسەپتەگىش قۇرالداردى ورناتۋعا قاراجات ءبولىندى. ەگىندىكول جانە پولتاۆكا اۋىلدارىندا سۋ مۇنارالارى جوندەلمەك. ال اباي, جۇلدىز جانە جالمانقۇلاق اۋىلدارىندا سۋدى تازارتۋعا ارنالعان بلوك-مودۋلدەر ورناتىلادى. بۇل شارالار حالىققا سانيتارلىق تالاپتارعا ساي قاۋىپسىز اۋىزسۋ جەتكىزۋگە مۇمكىندىك بەرەدى.
2025 جىلى كەمىندە 80 اۋىلدى اۋىز سۋمەن قامتۋ جوسپارلانعان. وسىلايشا جالپى سانى 148 اۋىل تازا اۋىز سۋعا قول جەتكىزەتىن بولادى. سونىمەن قاتار كوكشەتاۋ, قوسشى, ماكينسك جانە ەرەيمەنتاۋ قالالارىندا جانە اۋىلدىق وكرۋگتەردە جوبالار ىسكە اسىرىلۋدا. بۇل جۇمىستارعا رەسپۋبليكالىق بيۋدجەتتەن, ارنايى مەملەكەتتىك قوردان جانە وبلىستىق بيۋدجەتتەن قارجى بولىنگەن. تەك 2024–2025 جىلدارى ءارتۇرلى قارجى كوزدەرىنەن 20 ملرد تەڭگەدەن استام قاراجات قاراستىرىلدى. قازىرگى تاڭدا اقمولا وبلىسىندا ورتالىقتاندىرىلعان سۋمەن قامتۋدىڭ كورسەتكىشى قالالاردا – 99%, اۋىلداردا – 96,6%-دى قۇراپ وتىر.
ايتا كەتەيىك, جۋىردا قابىلدانعان سۋ كودەكسىن ازىرلەۋگە ماجىلىستەگى «AMANAT» پارتياسى فراكتسياسىنىڭ دەپۋتاتتارى باستاماشى بولدى. كودەكس سۋ شارۋاشىلىعى كەشەنىن جاڭعىرتۋدى, رەسۋرستاردى ءتيىمدى پايدالانۋدى جانە بارلىق قازاقستاندىقتاردى ساپالى اۋىز سۋمەن قامتاماسىز ەتۋدى كوزدەيدى. سونداي-اق قۇجات قوسىمشا باقىلاۋ تەتىكتەرىن ەنگىزىپ, جۇمىستىڭ بەلگىلەنگەن ۋاقىتىندا اياقتالماۋى مەن ساپاسىز ورىندالۋى ءۇشىن لاۋازىمدى تۇلعالاردىڭ جاۋاپكەرشىلىگىن كۇشەيتەدى.
