مينيستر «Kazakhmys Smelting» جشس جەزقازعان مىس قورىتۋ زاۋىتىندا كاتودتى مىس, التىن, كۇمىس, قورعاسىن جانە كۇكىرت قىشقىلى وندىرىلەتىن مىس كونتسەنتراتتارىن وڭدەۋدىڭ وندىرىستىك تسيكلىمەن تانىستى.
كاسىپورىننىڭ قۋاتتىلىعى ەلەكتر بالقىتۋ تەحنولوگيالارىن قولدانۋ ارقىلى جىلىنا 600 مىڭ توننا شيحتانى (200 مىڭ توننا مىس) وڭدەۋگە مۇمكىندىك بەرەدى.
مىس قورىتۋ زاۋىتى قالا قۇراۋشى كاسىپورىن رەتىندە وبلىستىڭ جانە مەتاللۋرگيا ونەركاسىبىنىڭ الەۋمەتتىك-ەكونوميكالىق دامۋىندا شەشۋشى ءرول اتقارادى.
2025 جىلعى جەتى ايدا زاۋىت 92 مىڭ توننا كاتودتى مىس قورىتتى. سونداي-اق جەرگىلىكتى جەتكىزۋشىلەر مەن وندىرۋشىلەردەن قوسالقى ماتەريالداردى ساتىپ الۋ ۇلەسىن ارتتىرۋ مۇمكىندىكتەرى قاراستىرىلدى.
مينيسترگە «جەزقازعانرەدمەت» رمك-دا شيكىزات پەن سيرەك مەتالداردى وڭدەۋدىڭ تەحنولوگيالىق ۇدەرىسى تانىستىرىلدى. بيىل زاۋىتتا ەكى جىلدىق جاڭعىرتۋ باستالدى, بۇل كىرىستى 2,6 ەسەگە, ءونىم شىعارۋدى 2,7 ەسەگە ارتتىرىپ, حالىقارالىق ستاندارتتارعا سايكەس كەلەتىن ساپاعا قول جەتكىزۋگە جانە ءوندىرىس بويىنشا الەمدە ەكىنشى ورىنعا شىعۋعا مۇمكىندىك بەرەدى.
ە.ناعاسپاەۆ جەكە قورعانۋ قۇرالدارىن, ونىڭ ىشىندە رەسپيراتورلار مەن اۋىستىرىلاتىن سۇزگىلەرى بار جارتىلاي ماسكالار شىعارۋعا ماماندانعان «Ulytau Industrial Company» جشس جاڭا زاۋىتىندا دا بولدى.
جوبانىڭ قۇرىلىسى 2024 جىلدىڭ مامىر ايىندا, ءوندىرىس سول جىلدىڭ جەلتوقسان ايىندا باستالدى. ءونىمنىڭ العاشقى تاپسىرىس بەرۋشىسى «قازاقمىس» كورپوراتسياسى بولدى, ونىمەن ۇزاق مەرزىمدى وفتەيك كەلىسىمشارتى جاسالدى.
زاماناۋي وندىرىستىك جەلىلەر بىزگە حالىقارالىق ساپا مەن قاۋىپسىزدىك ستاندارتتارىنا تولىعىمەن سايكەس كەلەتىن جىلىنا 6 ملن-عا دەيىن رەسپيراتور شىعارۋعا مۇمكىندىك بەرەدى. بولاشاقتا جەكە قورعانىس قۇرالدارىنىڭ 10 تۇرىنە دەيىن ءونىم جەلىسىن كەڭەيتۋ, سونداي-اق اۋىستىرىلاتىن سۇزگىلەرى بار جارتىلاي ماسكالار شىعارۋ جەلىسىن ىسكە قوسۋ جوسپارلانۋدا.
ساپار سوڭىندا ەرسايىن ناعاسپاەۆ وبلىستىڭ ونەركاسىپتىك الەۋەتىن نىعايتۋ ءۇشىن وندىرىستىك قۋاتتاردى جاڭعىرتۋدىڭ جانە قوسىلعان قۇنى جوعارى ءونىم شىعارۋدى كەڭەيتۋدىڭ ماڭىزدىلىعىن اتاپ ءوتتى.
ۇلىتاۋ وبلىسى
