ۇلان-عايىر جەرىمىزدىڭ شەكاراسى ون ءۇش مىڭ شاقىرىمنان اسادى. ونىڭ ىشىندە تەك وزبەكستانمەن اراداعىسى 2300 شاقىرىمدى قۇرايدى. بۇل – قىراعىلىقتى, سەرگەكتىكتى تالاپ ەتەتىن اۋقىمدى اۋماق. ءاربىر كۇن, ءاربىر ساعات سايىن شەكارا بويىندا جاۋىنگەرلەرىمىز كىرپىك قاقپاي قىزمەت اتقارادى.
پولكوۆنيك اسقار بولاتوۆ باسقارمانىڭ وزبەكستانمەن شەكتەسەتىن ەكى ءجۇز شاقىرىمعا جۋىق اۋماقتى كۇزەتەدى. ونىڭ ءجۇز وتىز شاقىرىمى قۇرلىقپەن, جەتپىس شاقىرىمى وزەن بويىمەن وتەدى. بۇل اۋماقتا اۆتوموبيلدىك, تەمىرجولدىق وتكىزۋ پۋنكتتەرى مەن جۇك تاسىمالىنا ارنالعان بەكەتتەر ورنالاسقان.
ء«بىزدىڭ قاتارعا كەلگەن جىگىتتەردىڭ ءبارى ەلگە دەگەن پاتريوتتىق سەزىممەن قىزمەت ەتەدى. بۇل – اتا-بابامىزدان اماناتقا قالعان جەر. نايزانىڭ ۇشىمەن, بىلەكتىڭ كۇشىمەن قورعاپ كەتكەن وتاندى ءبىز سەنىممەن كۇزەتىپ وتىرمىز. ءار سالانىڭ قيىنشىلىعى بولادى عوي, شەكاراشىلاردا بۇل مىندەتتىڭ جۇگى ءتىپتى اۋىر. بىراق ءبىزدىڭ ساربازدار سوعان توتەپ بەرىپ, قىزمەتىن ابىرويمەن اتقارىپ ءجۇر», دەيدى پولكوۆنيك.
ونىڭ سوزىنەن ءاربىر اسكەريدىڭ بويىنداعى ماقتانىش پەن جاۋاپكەرشىلىكتى اڭعارۋعا بولادى. اسقار بولاتوۆ تۋعان جەرىنىڭ ءوزى شەكاراعا جاقىن بولعاندىقتان, بالا كەزدەن وفيتسەر بولۋدى ارمانداعان. بۇگىندە سول ارمانى ورىندالىپ, ۇلكەن ۇجىمعا باسشىلىق ەتىپ وتىر.
ا.بولاتوۆتىڭ باسقاراتىن اۋماعى تاۋلى-شاتقالدى بولعاندىقتان, ساربازداردىڭ ءبىر توبى ەل شەبىن اتپەن كۇزەتەدى. كانىگى كەيكى مەرگەندەر سەكىلدى ولار دا پيعىلى جامان دۇشپانعا قاپيادا قارسى تۇرادى. تاڭنىڭ اتىسى, كۇننىڭ باتىسى تۇلپاردىڭ تۇياعى تىنبايدى, كۇزەت شەبى ۇزىلمەيدى. ساربازدار توبەنىڭ تاساسى مەن ءار سايدىڭ ىعىنا مۇقيات نازار اۋدارادى. اۋىلدا وسكەن, اتقا ۇيرەنگەن جىگىتتەر ءۇشىن مۇنىڭ ءبارى – ۇيرەنشىكتى جۇمىس
ال سىرداريا بويىنداعى «بىرلىك» زاستاۆاسىندا قۇرلىقپەن بىرگە وزەن دە باقىلاۋدا ۇستالادى. ارنايى كاتەرلەر ارقىلى شەكاراشىلار تاۋلىگىنە بىرنەشە مارتە وزەندى شولىپ شىعادى. مۇندا كەلىسىمشارت نەگىزىندە تاجىريبەلى ماماندار ەڭبەك ەتەدى.
وسىلايشا, اسقار بولاتوۆ باسقارعان بولىمشەلەردىڭ ءجىتى ەڭبەگىنىڭ ارقاسىندا ەلىمىزدىڭ كۇڭگەي بەتىنە كولەڭكە ءتۇسىپ تۇرعان جوق. شەكاراشىلار تاۋلىك بويى كىرپىك قاقپاي كۇزەتتە تۇرادى. ءبىز شىرت ۇيقىدا جاتقاندا ولاردىڭ ءاربىر قادامى ەل قاۋىپسىزدىگىنە كەپىل بولىپ وتىر.
ءيا, بۇل جۇيەلى جۇمىس وڭاي قالىپتاسىپ كەتكەن جوق. شەكارامىزدىڭ شەگەندەلۋى –بىرنەشە ديپلوماتيالىق كەلىسىمدەردىڭ ناتيجەسىندە. ەڭ العاش 1992 جىلدىڭ 18 تامىزىندا قازاقستان شەكارا اسكەرلەرى قۇرىلعان ەدى. كەيىن ءتۇرلى كەزەڭدەردەن ءوتىپ, 1999 جىلى ۇقك قۇرامىنداعى شەكارا قىزمەتى بولىپ قايتا جاساقتالدى. 2013 جىلى «مەملەكەتتىك شەكارا تۋرالى» زاڭ قابىلدانىپ, قۇقىقتىق نەگىزى نىعايدى. بۇگىندە ەلىمىزدىڭ شەكاراسى – الەمدەگى ەڭ ۇزىن قۇرلىقتىق مەجەلەنگەن اۋماقتىڭ ءبىرى.
وسى اۋقىمدى اۋماقتى قورعاپ وتىرعان ساربازدار مەن وفيتسەرلەردىڭ ەڭبەگى – ەل تىنىشتىعىنىڭ كەپىلى. پولكوۆنيك اسقار بولاتوۆ ايتقانداي, اتا-بابامىز امانات ەتكەن جەردى كۇزەتۋ – ءاربىر شەكاراشىنىڭ جۇرەگىندەگى سەرت بولىپ قالا بەرمەك.
