مينيستر بۇل مەرەكەنىڭ ماقساتى – سالاۋاتتى ءومىر سالتىن ناسيحاتتاۋ, بۇقارالىق سپورتتى دامىتۋ جانە حالىق دەنساۋلىعىن نىعايتۋ ەكەنىن اتاپ ءوتتى.
«سپورت – بۇل تەك فيزيكالىق بەلسەندىلىك ەمەس, ول – ەرىك-جىگەردىڭ, ماقساتقا ۇمتىلىستىڭ, دوستىق پەن بىرلىكتىڭ كورىنىسى. مەملەكەت باسشىسى قاسىم-جومارت توقاەۆتىڭ قولداۋىمەن ەلىمىزدەگى سپورتتىق مۇمكىندىكتەر جىل سايىن كەڭەيىپ كەلەدى», – دەدى مينيستر.
ەربول مىرزابوسىنوۆتىڭ ايتۋىنشا, سوڭعى جىلدارى ەلىمىزدە بىرقاتار ماڭىزدى قادامدار جاسالدى:
- جاڭا سپورت نىساندارى وڭىرلەردە اشىلىپ جاتىر;
- قازاقستاندىق سپورتشىلار حالىقارالىق ارەنالاردا تابىستى ونەر كورسەتۋدە;
- 2025 جىلدان باستاپ سپورت سالاسىنداعى زاڭناماعا ەلەۋلى وزگەرىستەر ەنگىزىلدى;
- پاراسپورت پەن بۇقارالىق سپورتتى قولداۋعا ەرەكشە كوڭىل ءبولىندى;
- ۇلتتىق سپورت تۇرلەرىن دامىتۋعا قارجى باعىتتالدى.
مينيستر قازاقستاننىڭ سپورتتاعى بەدەلى ارتىپ كەلە جاتقانىن اتاپ ءوتتى.
«بيىلدىڭ وزىندە ەلىمىزگە جيىرماعا جۋىق حالىقارالىق سپورت ۇيىمدارىنىڭ وكىلدەرى كەلدى. ولاردىڭ جارتىسىن مەملەكەت باسشىسى جەكە قابىلدادى. بۇل – قازاقستاننىڭ سپورتتاعى ابىرويىنىڭ وسكەنىن دالەلدەيدى», – دەدى ول.
سونىمەن قاتار 2025 جىلى ەلىمىزدە بىرنەشە ءىرى حالىقارالىق تۋرنير ۇيىمداستىرىلعانىن, قازاقستاندىق سپورت نىساندارىنىڭ قازىرگى زامان تالابىنا ساي ەكەنىن جەتكىزدى.
ەربول مىرزابوسىنوۆ بارلىق قازاقستاندىقتاردى مەرەكەمەن قۇتتىقتاپ, دەنساۋلىق, سەرگەكتىك جانە جاڭا جەڭىستەر تىلەدى.
«بۇگىنگى جەتىستىكتەر – جاتتىقتىرۋشىلاردىڭ, سپورت ارداگەرلەرىنىڭ, جانكۇيەرلەردىڭ جانە بارشا سپورت سۇيەر قاۋىمنىڭ ورتاق ەڭبەگى», – دەدى مينيستر.
