سپورت كۇنى قارساڭىندا وبلىستىق دەنە شىنىقتىرۋ جانە سپورت باسقارماسىنىڭ باسشىسى باقبەرگەن ءسابيتوۆ وڭىردە سالاۋاتتى ءومىر سالتىن ۇستانۋ, بۇقارالىق سپورتتى دامىتۋ جانە جاستاردى سپورتقا تارتۋ باعىتىندا جاسالىپ جاتقان جۇمىستار جايلى ايتىپ بەرگەن ەدى.
باقبەرگەن مارات ۇلىنىڭ ايتۋىنشا, وبلىستا 45 939 بالا سپورتپەن قامتىلعان. «بۇل ءار ءۇش بالانىڭ بىرەۋى سپورتپەن شۇعىلدانادى دەگەن ءسوز, مۇنىڭ ءوزى بولاشاق ۇرپاقتىڭ دەنى ساۋ, بەلسەندى ازامات بولىپ قالىپتاسۋىنا ۇلكەن نەگىز» دەيدى ول.
سونداي-اق وڭىردە ۇلتتىق سپورت تۇرلەرىمەن – 31 250 ادام (10,9%) اينالىسسا, مۇمكىندىگى شەكتەۋلى ازاماتتار اراسىندا 2 856 ادام (24,7%) سپورتتى وزىنە سەرىك ەتكەن. جالپى وبلىس حالقىنىڭ 1000 ادامىنا شاققانداعى سپورتتىق ينفراقۇرىلىممەن قامتاماسىز ەتىلۋ دەڭگەيى – 65,8%.
باتىس قازاقستان وبلىسىندا حالىقتىڭ باسىم كوپشىلىگىن وزىنە باۋراعان سپورتتىق ويىندار ءجيى وتەدى. جاقىندا عانا ورال قالاسىندا وتكەن ءداستۇرلى وبلىستىق «اق بيداي» دوداسىنا 12 اۋداننان 1104 سپورتشى قاتىستى. ءتورت كۇنگە سوزىلعان, ءتورت جىلدا ءبىر وتكىزىلەتىن «اق بيداي» وبلىستىق VIII اۋىل سپورتى ويىندارى وتە قىزىقتى, تارتىستى ءوتتى. سپورتتىڭ 15 تۇرىنەن وتكەن جارىستا اقجايىق اۋدانى 1-ورىن, ءبورلى اۋدانى – 2-ورىن, شىڭعىرلاۋ اۋدانى – 3-ورىن يەلەندى. وبلىستىق دەنە شىنىقتىرۋ جانە سپورت باسقارماسى, سپارتاكيادانى ۇيىمداستىرۋ كوميتەتى, جايىق ارەنا سپورت كەشەنى ۇجىمىنا, «ورال» سپورت كلۋبى ۇجىمى, دەركول كەنتى اكىمدىگى, تورەشىلەر كورپۋسى جۇمىلىپ, اسقان ۇيىمشىلدىق كورسەتتى.
- بۋرابايدا وتكەن ۇلتتىق قۇرىلتايدىڭ 4-ءشى وتىرىسىندا پرەزيدەنتىمىز قاسىم-جومارت كەمەل ۇلى توقاەۆ: «سپورتتى ناسيحاتتاۋ, ونى اسىرەسە بالالار مەن جاسوسپىرىمدەر اراسىندا دارىپتەۋ – ۇلت ساۋلىعىنىڭ كەپىلى. سوڭعى جىلدارى مەملەكەت قولداۋىنىڭ ناتيجەسىندە بالالار سپورتى قارقىندى دامي باستادى, - دەپ سپورتتىڭ دامۋىنا باسا نازار اۋدارعان بولاتىن. وسى ورايدا وڭىرىمىزدە سپورتتىڭ دامۋىنا جان-جاقتى جاعداي جاسالىپ كەلەدى. وبلىستىڭ بارلىق اۋدان ورتالىعى زاماناۋي دەنە شىنىقتىرۋ-ساۋىقتىرۋ كەشەنىمەن قامتىلدى. سونىمەن قاتار, مەملەكەت باسشىسىنىڭ وڭىرگە جۇمىس ساپارى بارىسىندا بەرگەن تاپسىرماسىنا سايكەس وتكەن جىلى ورال قالاسىندا - «جايىق ارەنا» كوپ فۋنكتسيونالدى سپورت كەشەنى ەل يگىلىگىنە بەرىلدى, – دەگەن ەدى وبلىس اكىمى ناريمان تورەعاليەۆ. قازىر اۋىل وكرۋگتەرىندە دە جاپپاي سپورت عيماراتتارى اشىلىپ جاتىر. ءوڭىر باسشىسى جاقىن ارادا وبلىستىڭ ءىرى اۋىلدارىندا 14 سپورت نىسانى پايدالانۋعا بەرىلەتىنىن ايتتى.
كوپ ارىگە بارماي-اق, سوڭعى كۇندەرى عانا سپورت سالاسىندا وڭىردە بولعان جاڭالىقتارعا توقتالىپ وتەيىك:
كوگالداعى حوككەيدەن جاسوسپىرىمدەر اراسىنداعى قازاقستان رەسپۋبليكاسىنىڭ چەمپيوناتى ورال قالاسىندا ءوتتى. وعان 150-گە جۋىق سپورتشى قاتىستى. اقتاۋ, الماتى, شىمكەنت سەكىلدى ءىرى قالالاردان كەلگەن كوماندالار تارتىستى ويىن كورسەتتى.
قىزىلوردا قالاسىندا اۋىر اتلەتيكادان وتكەن حالىقارالىق تۋرنيردە باتىس قازاقستان وبلىسىنىڭ سپورتشى قىزدارى – ەلەمەس ايىمگۇل (69 كگ) جانە ەپبولوۆا جانسايا (77 كگ) – التىن مەدال جەڭىپ الدى. بۇل – ورالدىق سپورتشىلاردىڭ حالىقارالىق دەڭگەيدەگى تابىسى.
سەمەي مەن قاراۋىل توبەسى اراسىنداعى 180 شاقىرىمدىق ۋلترامارافوندا ورالدىق باۋبەك ءيلياسوۆتىڭ مارەگە 19 ساعات 9 مينۋت 45 سەكۋندتا جەتىپ, دارا كەلگەنىن بۇكىل قازاق حالقى كوردى عوي. بۇل – ۇلكەن توزىمدىلىكتىڭ, ەرىك-جىگەردىڭ ناتيجەسى.
سونداي-اق دزيۋدودان ارداگەرلەر اراسىنداعى قازاقستان چەمپيوناتى ورال قالاسىندا ءوتتى. بقو سپورت قايراتكەرى قازبولات ساعىنعالي ۇلى كۇرماشەۆتىڭ قۇرمەتىنە ارنالعان بۇل جارىسقا ەلىمىزدىڭ 12 وبلىسىنان 250-گە جۋىق سپورتشى قاتىستى.
وبلىستىڭ سپورتتىق ءومىرى وسىنداي جاڭالىقتارعا تولى. سپورت كۇنىنە وراي دا سالا قىزمەتكەرلەرى اراسىندا توعىزقۇمالاق, دويبى جانە شاحمات ويىندارىنان, جاسوسپىرىمدەر اراسىندا فلوربولدان, جاسوسپىرىمدەر جانە ەرلەر كوماندالارى اراسىندا جاعاجاي ۆولەيبولىنان ءتۇرلى جارىستار ءوتتى. مۇمكىندىگى شەكتەۋلى جاندارعا ارنالعان دەنە شىنىقتىرۋ جانە ساۋىقتىرۋ كەشەنى اشىلدى.
«اتقارىلعان جۇمىستار مەن جەتكەن جەتىستىكتەر وبلىسىمىزدا سپورت سالاسى دامىپ, بۇقارالىق سپورتتىڭ كەڭ ەتەك العانىن كورسەتەدى. بۇل باعىتتاعى جۇمىس الداعى ۋاقىتتا دا جالعاسىپ, سپورت مادەنيەتىن كوتەرۋ جولىندا جۇيەلى ءىس-شارالار جۇزەگە اسادى», دەيدى باقبەرگەن ءسابيتوۆ.
باتىس قازاقستان وبلىسى
