ورالدا قازاق حاندارى بەينەلەنگەن داپتەرلەر شىعارىلدى

ورال. 5 تامىز. باتىس قازاقستان وبلىسىنىڭ ورتالىعى – ورال قالاسىندا قازاق حاندىعىنىڭ 550 جىلدىعىنا وراي «جايىق پرەسس» جشس باسپاحاناسىنان قازاق حاندارى بەينەلەنگەن داپتەرلەر باسىلىپ شىقتى. بۇل تۋرالى «قازاقپاراتقا» سىلتەمە جاساعان egemen.kz ءتىلشىسى حابارلادى. سەرىكتەستىكتىڭ باس ديرەكتورى جانتاس ءسافۋلليننىڭ ايتۋىنشا, «نۇر وتان» پارتياسى باستاۋىش ۇيىمىنىڭ باستاماسىمەن مۇنداي يگى ءىس وسىدان ءۇش-ءتورت جىل بۇرىن قولعا الىنعان بولاتىن. بۇدان دەيىن باتىرلار رايىمبەك, سىرىم, يساتاي, ماحامبەت, كۇيشىلەر قۇرمانعازى, دينا, اقىندار اباي, عۇمار قاراش, الاش قايراتكەرى جاھانشا دوسمۇحامەدوۆتىڭ سۋرەتتەرى مەن قىسقاشا ءومىرباياندارى باسىلعان داپتەرلەر باسىلىپ شىققان. مۇنداي تىڭ باستامانىڭ ماقساتى – سىرتقى مۇقاباسىنا ادامنىڭ باس سۇيەگى, جارتىلاي جالاڭاش دەنەلەرى سياقتى سوراقى سۋرەتتەر سالىنعان شەتەلدىك داپتەرلەردىڭ ورنىن تاربيەلىك ماڭىزى بار وتاندىق ونىمدەرمەن تولتىرۋ, سوعان جەرگىلىكتى كاسىپكەرلەردىڭ نازارىن اۋدارۋ. قازاق حاندىعىنا ارنالىپ باسىلعان داپتەرلەردە كەرەي مەن جانىبەك حانداردىڭ, ابىلاي مەن ابىلقايىردىڭ سۋرەتتەرى جاريالانىپ, ءومىرباياندارى جازىلعان. حانداردىڭ سۋرەتتەرىن داپتەرگە لايىقتاپ قايتا سالعان باتىسقازاقستاندىق بەلگىلى قىلقالام شەبەرى بەكجان جۇماباەۆ, ديزاينەرى ارمان داۋىلباەۆ. ال ءومىربايان دەرەكتەرىن جازۋعا تاريح عىلىمدارىنىڭ دوكتورى, پروفەسسور ابىلسەيىت مۇقتار سىندى بەلدى عالىمدار اتسالىستى. «مۇنداي جۇمىستار الداعى ۋاقىتتا دا جالعاسادى. مىسالى, بيىل تۋعانىنا 140 جىل تولاتىن عۇمار قاراشتىڭ سۋرەتى بەينەلەنگەن كۇندەلىك شىعارۋ كوزدەلۋدە. نەگىزى وقۋ قۇرالدارى مەن داپتەرلەردىڭ تاربيەلىك ءمان-ماڭىزىن ارتتىرۋ ماقساتىندا ءبىلىم جانە عىلىم مينيسترلىگى باس بولىپ ارنايى كوميسسيا قۇرىپ, وسى ءىستى ءبىر ىزگە تۇسىرسە, ءتىپتى جاقسى بولار ەدى», دەيدى جانتاس سافۋللين. تەمىر قۇسايىن. دەرەك, سۋرەت: «قازاقپارات».