كاناداداعى اۆتور كلاۋديا اراندا جازعان "الەم – ونىڭ كيىز ءۇيى: ديماش جانە پولياريزاتسيالانعان الەمدەگى مادەني ديالوگ ارحيتەكتۋراسى" اتتى ماقالادا قازاقستاندىق ءانشىنىڭ مادەنيەتتەر اراسىنداعى كوپىر رەتىندەگى ءرولى تالدانادى.
اۆتور ديماشتىڭ شىعارماشىلىعى گەوساياسي قاقتىعىستار مەن مادەني الالاۋشىلىقتاردان جوعارى تۇرىپ, كورەرمەندەردى بىرىكتىرەتىنىن اتاپ وتەدى. ونىڭ داۋسى – ءتۇرلى تىلدەر مەن داستۇرلەردى توعىستىراتىن بەيرەسمي ديپلوماتيانىڭ قۇرالى رەتىندە سيپاتتالعان.
- ونىڭ قازاقستاننان شىققان تەگى جاي عانا ومىرباياندىق دەرەك ەمەس – ول ەكى ىرعاقپەن تىنىستايتىن ونەردىڭ تەرەڭ تامىرى: مىڭجىلدىق ءداستۇر مەن جاھاندىق زاماناۋيلىقتىڭ توعىسى. عاسىرلار بويى اۋىزشا پوەزيامەن, ەپوستىق جىرلارمەن, كوشپەلى اۋەندەرمەن نارلەنگەن قازاق مادەنيەتى ونىڭ ۇنىندە ءتىرى مۇراعاتتاي ساقتالعان. ءاربىر اۋەن – جولداردىڭ, يمپەريالار مەن وركەنيەتتەردىڭ قيىلىسى بولعان گەوگرافيانىڭ جادى. ول ۇرپاقتان ۇرپاققا اۋىزشا تاراعان داستۇرلەر مەن مادەني ارالاسۋدىڭ ارقاسىندا بۇگىنگە جەتتى, – دەيدى ول.
ماقالادا قازاق مادەنيەتىنىڭ تامىرى مەن جاھاندىق زاماناۋيلىقتىڭ ۇيلەسىمى ديماشتىڭ ونەرىندە ايقىن كورىنىس تاباتىنى ايتىلعان. ءانشى تەك جانرلاردى تۇرلەندىرۋشى ەمەس, مادەنيەتتەردى توعىستىرۋشى تۇلعا رەتىندە باعالانادى.
