كەزدەسۋ بارىسىندا ەاەو ەلدەرىنىڭ ەكونوميكالىق الەۋەتىن نىعايتۋ, حالىقتىڭ ءومىر ءسۇرۋ دەڭگەيىن جاقسارتۋ, ءوزارا ساۋدانى دامىتۋ, وداق نارىعىنداعى كەدەرگىلەردى جويۋعا جانە باسقا دا ماسەلەلەرگە نازار اۋدارىلدى.
ەۇاك كەڭەيتىلگەن قۇرامداعى وتىرىسىنا بەلارۋس رەسپۋبليكاسىنىڭ پرەمەر-ءمينيسترى الەكساندر تۋرچين, قىرعىز رەسپۋبليكاسى پرەزيدەنتى اكىمشىلىگىنىڭ باسشىسى مينيسترلەر كابينەتىنىڭ توراعاسى ادىلبەك قاسىماليەۆ, رەسەي فەدەراتسياسى ۇكىمەتىنىڭ توراعاسى ميحايل ميشۋستين, ارمەنيا رەسپۋبليكاسىنىڭ ۆيتسە-پرەمەرى مگەر گريگوريان, باقىلاۋشى ەلدەردەن – يران رەسپۋبليكاسىنىڭ ءبىرىنشى ۆيتسە-پرەزيدەنتى مۇحاممەد-رەزا ارەف, وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ, كۋبا رەسپۋبليكاسىنىڭ پرەمەر-ءمينيسترى مانۋەل ماررەرو كرۋز (بەينەكونفەرەنتسيا ارقىلى), سونداي-اق ەۋرازيالىق ەكونوميكالىق كوميسسيا القاسىنىڭ توراعاسى باقىتجان ساعىنتاەۆ قاتىستى.
ساۋدا-ەكونوميكالىق, كولىك-لوگيستيكالىق, مۇناي-گاز جانە تسيفرلىق سالالار, سونداي-اق كەدەندىك جانە بيرجا قىزمەتى, مەديتسينا مەن فارماتسەۆتيكا, ەڭبەك نارىعى جانە باسقا دا سالالارداعى ءوزارا ءىس-قيمىل قارالدى.
ولجاس بەكتەنوۆ ىنتىماقتاستىقتى دامىتۋدىڭ باسىم باعىتتارىن اتاپ ءوتتى. ءوزارا ساۋدانى دامىتۋعا جانە سىرتقى ەكونوميكالىق بايلانىستاردى ارتتىرۋ جونىندەگى بىرلەسكەن شارالارعا نازار اۋدارىلدى.
كولىك جانە لوگيستيكا سالاسىندا ءوڭىردىڭ بارلىق مەملەكەتتىڭ مۇددەلەرىن ەسكەرە وتىرىپ, بالامالى باعىتتار قۇرۋدىڭ وزەكتىلىگى ايقىندالدى. بۇگىندە كەلەشەگى زور كولىك باعىتتارىنىڭ ءبىرى – وتكىزۋ قابىلەتى 10 ملن تونناعا دەيىن جۇكتى قۇرايتىن «تۋرگۋندي-گەرات» تەمىرجولى جوباسى.
ساۋدا اعىندارىنىڭ تۇراقتى ءوسۋىن جانە ءارتاراپتاندىرىلۋىن قامتاماسىز ەتۋ ءۇشىن ەاەو-نىڭ ءۇشىنشى ەلدەر مەن ۇيىمدار اراسىنداعى ىنتىماقتاستىعىن كەڭەيتۋ ماڭىزدى. قازاقستان ءارتۇرلى فورماتتاعى سەرىكتەستەرمەن ءوزارا ءىس-قيمىلدى تەرەڭدەتۋدى جاقتايدى.
جيىن بارىسىندا قاتىسۋشىلار گاز, مۇناي جانە مۇناي ونىمدەرىنىڭ ورتاق نارىقتارىن, سونداي-اق تاۋارلاردىڭ بيرجا نارىعىن قالىپتاستىرۋعا قاتىستى باياندامالاردى تىڭدادى. بيرجالىق ساۋدا-ساتتىقتى دامىتۋ باعدارلاماسى بەكىتىلىپ, دارىلىك زاتتار مەن مەديتسينالىق بۇيىمداردىڭ ورتاق نارىعىن دامىتۋ تۇجىرىمداماسى ماقۇلداندى. بۇل قۇجاتتاردى ىسكە اسىرۋ ەاەو شەڭبەرىندە ارىپتەس ەلدەردىڭ ساپالى ءارى قاۋىپسىز ءونىمىن قامتاماسىز ەتۋگە باعىتتالعان.
قاتىسۋشىلار كليماتتىق كۇن ءتارتىبىن ىسكە اسىرۋ, كولىك دالىزدەرىن تسيفرلاندىرۋ, ەڭبەك نارىعىنداعى بىلىكتىلىك تالاپتارىنىڭ جاقىنداسۋى جانە باسقا دا ماسەلەلەرگە قاتىستى پىكىر الماستى. كەزدەسۋ قورىتىندىسى بويىنشا 10 قۇجاتقا قول قويىلدى. ەۇاك-تىڭ كەلەسى وتىرىسى بيىلعى 29-30 قىركۇيەكتە مينسك قالاسىندا وتەدى.
