ەلدىڭ قورعانىس قابىلەتىن ارتتىرۋدىڭ باستى تالابى – جاۋىنگەرلەردىڭ كاسىبي بىلىكتىلىگىن كوتەرۋ مەن زاماناۋي بەس قارۋىن سايلاۋ. ەگەمەندىگى مەن ەلدىگىن باياندى قىلۋدى ماقسات تۇتقان ءاربىر مەملەكەت بۇل ماسەلەگە اسا سەرگەك قارايدى. وسى ورايدا ەلىمىزدە 14 تامىز – جاۋىنگەرلىك دايىندىق ماماندارىنىڭ كۇنى اتالىپ وتەدى. بۇل – كاسىبي مەرەكە – اسكەر الەۋەتىن ارتتىرۋعا ايرىقشا كوڭىل ءبولىنىپ وتىرعانىنىڭ ءبىر بەلگىسى.
جالپى, قارۋلى كۇشتەرگە قابىلەتتى جاۋىنگەر دايارلاۋ ۇدەرىسى قالاي جۇرەدى جانە نەدەن باستالادى؟ ەڭ الدىمەن اسكەردىڭ بىلىكتىلىگىن كوتەرۋدىڭ العاشقى «الىپپەسى» – جەكە قۇرامدى وقىتۋدى ۇيىمداستىرۋ. جاۋىنگەرلىك دايىندىق جۇيەسى بولىمشەلەر مەن ۆزۆودتاردان باستاپ باتالون شتابتارى, اسكەري بولىمدەر مەن قۇرامالارعا دەيىنگى بارلىق اسكەري بولىمشەلەردى قامتيدى.
بۇگىندە قورعانىس مينيسترلىگى اسكەردى ساپالى دايارلاۋ ءۇشىن پوليگوندار مەن وقۋ-جاتتىعۋ ورتالىقتارىنىڭ ينفراقۇرىلىمىن بەلسەندى تۇردە دامىتىپ جاتىر. زاماناۋي مۋلتيمەديالىق سىنىپتارمەن, اتىس جانە تەحنيكا باسقارۋ ترەناجەرلارىمەن, اۆتوماتتاندىرىلعان باعالاۋ جۇيەلەرىمەن جابدىقتالعان جاڭا وقۋ-جاتتىعۋ كەشەندەرى بوي كوتەرىپ كەلەدى.
جىل سايىن قارۋلى كۇشتەرىمىزدىڭ قاتىسۋىمەن 300-دەن استام ءىرى وقۋ-جاتتىعۋ وتەتىنىن ەسكە سالا كەتەيىك. ولاردىڭ قاتارىندا «ايبالتا» ستراتەگيالىق, «قاراتاۋ», «باتىل تويتارىس» سياقتى جەدەل-تاكتيكالىق جانە كەشەندى وقۋ-جاتتىعۋلار بار. بۇلار قارۋلى كۇشتەردىڭ بارلىق ءتۇرى مەن اسكەر تەكتەرىنىڭ ءوزارا ءىس-قيمىلىن شىنايى جاۋىنگەرلىك جاعدايعا بارىنشا جاقىنداتىلعان جاعدايدا پىسىقتاۋعا مۇمكىندىك بەرەدى.
جاۋىنگەرلىك دايارلىق جۇيەسىنە قوس ماقساتتى ماماندىقتار بويىنشا وقىتۋ دا كىرەدى. بۇل ماماندىقتار ارميادا عانا ەمەس, ازاماتتىق سالادا دا جوعارى سۇرانىسقا يە.
جىل سايىن جاۋىنگەرلىك دايىندىق اياسىندا 15 مىڭنان استام كاسىبي مامان – وفيتسەر, سەرجانت, سارباز جانە تەحنيكالىق ساراپشى دايارلانىپ شىعادى. بۇل ءتاسىل اسكەري كادرلاردىڭ امبەباپتىعى مەن ولاردىڭ ازاماتتىق ومىردەگى باسەكەگە قابىلەتتىلىگىن قامتاماسىز ەتەدى.
قورعانىس مينيسترلىگى جۇزەگە اسىرىپ جاتقان ماڭىزدى جوبانىڭ ءبىرى – «Sarbaz 2.0» باعدارلاماسى. اتالعان باعدارلاما اياسىندا جاۋىنگەرلىك دايىندىقتا جوعارى ناتيجە كورسەتكەن اسكەري قىزمەتشىلەر ۇلتتىق بىرىڭعاي تەستىلەۋسىز جانە ەمتيحانسىز جوعارى وقۋ ورىندارىنا ءتۇسۋ مۇمكىندىگىنە يە بولادى.
قازاق ارمياسىنداعى جاۋىنگەرلىك دايىندىق جۇيەسىنىڭ نەگىزىن قالاعاندار قاتارىندا گەنەرال-مايورلار يۋري كۋرماتوۆ, دامير حاليكوۆ, نۇرلان جولامانوۆ, اسقان تاسبولاتوۆ, الماز اسەنوۆ, تالعات قويباقوۆ, ءالىمجان ەرنيازوۆ, تيمۋر ابىشەۆ, الماز جۇماكەەۆ, داۋلەت وسپانوۆ, پولكوۆنيكتەر كاميل ۋرمانوۆ, ۆلاديمير مەدۆەدەۆ, ءنىشانالى كۇزەرباەۆ, حايرۋللا يلياسوۆ, باسقا دا ەسىمدەرى ەلگە بەلگىلى اسكەري باسشىلاردى اتاۋعا بولادى. ەل ىرگەسىنىڭ بەرىك, اسپانىنىڭ اشىق بولۋى – وسىنداي قارىمدى قولباسشىلار مەن قابىلەتتى جاۋىنگەرلەردىڭ ارقاسى.
قازىرگى تاڭدا قارۋلى كۇشتەر باس شتابىنىڭ جاۋىنگەرلىك دايىندىق دەپارتامەنتىن گەنەرال-مايور اناتولي دوۆگانيۋك باسقارادى. بۇل سالا ماماندارىنىڭ تاجىريبەسى مەن وتان الدىنداعى ادالدىعى – ارميامىزدىڭ كەز كەلگەن جاعدايدا ءوز بورىشىن ابىرويمەن اتقارا الاتىنىنا كەپىل.
