سوزدىكتە سپورت رەپورتاجدارىندا قولدانىلاتىن تەرميندەر مەن ءالى قالىپتاسا قويماعان سپورتتىق ۇعىمدار قازاقشالانعان. نەمەسە قازاق ءتىلىنىڭ قولدانىسىنا بەيىمدەلگەن. وسى تاراپتا ءتىلشى-جۋرناليستەر, لينگۆيست عالىمدار مەن تەلەراديوكورپوراتسيا ماماندارى ءبىر جىل ەڭبەك ەتكەن. ناتيجەسىندە, ەفيردە ءجيى كورسەتىلەتىن باسكەتبول, بياتلون, بوكس, ۆولەيبول, گاندبول, گيمناستيكا, دزيۋدو, مانەرلەپ سىرعاناۋ, كۇرەس, كونكيمەن جۇگىرۋ, تەننيس, فۋتبول, فۋتزال, حوككەي جانە شورت-ترەك سياقتى 15 سپورت تۇرىنە قاتىستى 1200 تەرمين توپتاستىرىلىپتى. سوزدىك احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ عىلىمي كەڭەسىندە قارالىپ, ماقۇلداندى.
«بۇگىندە ەفيردە ءبىر سپورت ءتۇرىن بىرنەشە كوممەنتاتور جۇرگىزەتىندىكتەن جانە بەكىتىلگەن ورتاق تەرمينولوگيالىق بازا بولماعاندىقتان, ءبىر ۇعىمدى ءارتۇرلى سوزبەن جەتكىزۋ جاعدايى ءجيى كەزدەسەدى. بۇل ءبىر جاعىنان كورەرمەننىڭ اقپاراتتى قابىلداۋىنا قيىندىق تۋدىرسا, ەكىنشى جاعىنان تىلدىك تۇتاستىققا كەرى اسەرىن تيگىزەدى. جوبا وسى باعىتتا ايتىلىپ جۇرگەن سىن-ەسكەرتپەلەردى ەسكەرە وتىرىپ, قازاق تىلىندەگى كوممەنتاتورلىقتىڭ ساپاسىن ارتتىرۋ ماقساتىندا قولعا الىندى», دەدى «قازاقستان» رترك» باسقارما ءتورايىمى ءلاززات تانىسباي.
سوزدىكتى جاساقتاۋ بارىسىندا كاسىبي ماماندارمەن قاتار, قاراپايىم وقىرماندار ۇسىنعان تەرميندەر دە ەسكەرىلدى. وقىرماندار «Qazaqstan» جانە «Qazsport» تەلەارنالارىنىڭ الەۋمەتتىك جەلىلەرىندەگى رەسمي پاراقشالارىندا جاريالانعان سپورتتاعى ءتۇرلى جاعدايلار مەن ارەكەتتەردى, ءادىس-تاسىلدەردى كورسەتەتىن فوتو, ۆيدەوماتەريالداردىڭ ۇتىمدى سيپاتتاماسىن ءدال تابۋعا اتسالىستى. سونداي-اق «Qazaqstan» ارناسىنىڭ «تاڭشولپان» جانە قازاق راديوسىنىڭ «قايىرلى تاڭ, قازاق ەلى!» باعدارلاماسىنان اۋديو جانە ۆيدەوساۋالناما بەرىلىپ وتىردى. وسىنداي ءتۇرلى پلاتفورمالار ارقىلى جولدانعان سوزدەردى, ياعني, تەرميندەردى سپورت جۋرناليستەرى, كوممەنتاتورلار جانە ءتىل عالىمدارىنان قۇرالعان رەداكتسيا القاسى قاراپ, سايكەس دەپ تاپقاندارىن سوزدىككە ەنگىزگەن.
سوزدىك تۇسىندىرمە فورماتىندا جاسالعان. ءبىرىنشى باعاندا تەرمين, ەكىنشى باعاندا ونىڭ تۇسىندىرمەسى جازىلعان. كوپ جاعدايدا سوزدەر تەك قازاق تىلىندە بەرىلسە, كەي جەرلەردە شەت تىلىنەن ەنگەن تەرميندەردىڭ بالاماسى جاقشا ىشىندە كورسەتىلگەن.
«بۇل جيناقتى ازىرلەۋ بارىسىندا اۋىز ادەبيەتى, كوركەم پروزا, اۋدارما ادەبيەتتەر, كونەرگەن سوزدەر سوزدىگى مەن عىلىمي ەڭبەكتەر پايدالانىلعان. XX عاسىردان بەرگى سپورت تاقىرىبىنداعى ماقالالار, العاشقى كوممەنتاتورلار مەن بۇگىنگى ەفيردەگى تاجىريبەلى مامانداردىڭ تىلدىك قولدانىسى دا ەسكەرىلدى. ماسەلەن, سەيداحمەت بەردىقۇلوۆ, سۇلتانعالي قاراتاەۆ, ومىرزاق جولىمبەت, رابات جانىبەكوۆ, نەسىپ ءجۇنىسباي, امانگەلدى سەيىتحانوۆ جانە باسقا دا جۋرناليستەر مەن جازۋشىلاردىڭ ەڭبەكتەرى زەردەلەندى», دەيدى رەداكتسيا مۇشەلەرى.
