كەلەلى ءىس-شاراعا يران, قىتاي, بىرىككەن اراب امىرلىكتەرى, فيليپپين, شۆەتسيا, امەريكا قۇراما شتاتتارى, جاپونيا ەلدەرىنەن كەلگەن كىتاپحانا سالاسىنىڭ وكىلدەرى قاتىستى. قوناقتار زاماناۋي ۇردىستەر مەن تەحنولوگيالاردى تاريحپەن بايلانىستىرا تالقىلاپ, قولدانۋشىلارعا قىزمەت كورسەتۋ ساپاسىن جاقسارتۋعا اسەر ەتەتىن كىتاپحانا جۇمىسىنىڭ ءتيىمدى ستاندارتتارى توڭىرەگىندە وي ءبولىسىپ, ءوزارا پىكىر الماستى.
ۇلتتىق اكادەميالىق كىتاپحانا ديرەكتورى كۇمىس سەيىتوۆا ەلىمىزدىڭ كىتاپحانا سالاسىنداعى جۇمىسىن اتاپ ءوتتى.
– ۇلتتىڭ بىرەگەيلىگىن, ۇرپاقتار ساباقتاستىعىن جانە مادەني ديالوگتى ساقتاۋدا ەرەكشە ماڭىزدى بولىپ وتىرعان قازىرگى زامانعى كىتاپحانا كەڭىستىگى اياسىندا كىتاپحانالارىمىزدىڭ تاجىريبەسىمەن بولىسۋگە مۇمكىندىك بەرگەندەرىڭىز ءۇشىن العىسىمدى بىلدىرەمىن. پرەزيدەنت قاسىم-جومارت توقاەۆ: «كىتاپحانا – مەملەكەتتىڭ ۇلتتىق نەگىزگى جادى. ەلىمىز ءۇشىن قۇندى تاريحي دەرەكتەر مەن ماتەريالداردىڭ دەنى كىتاپحانادا ساقتالادى. سوندىقتان كىتاپحانا ءىسىن دامىتۋعا بەيجاي قاراۋعا بولمايدى. كىتاپ وقىرمانعا قولجەتىمدى بولۋى كەرەك. شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سول سەبەپتى كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەگەن بولاتىن. وزىندىك التىن ارقاۋى سوناۋ كونە داۋىرلەردەن باستاۋ الاتىن كىتاپحانالار بۇگىندە باسپا ونىمدەرىن, قۇندى كونە جازبالار مەن سيرەك كىتاپتاردى ساقتاۋمەن قاتار, ۇلتتىق امبەباپ اقپارات كوزدەرىن جيناقتاپ, جالپى وقىرمانعا ناسيحاتتايتىن بىردەن-ءبىر مادەنيەت وشاعىنا اينالىپ وتىر, – دەدى كۇمىس قارساقبايقىزى.
كەزدەسۋ اياسىندا اتالعان ماڭىزدى تاقىرىپتاردى قامتيتىن جيناقتاردى كوبەيتۋ, ينكليۋزيۆتى باعدارلاما جاساۋ جانە مەتسەناتتارعا ولكە تاريحىن زەرتتەۋگە كومەكتەسۋدە جاڭا تەحنولوگيالار ارقىلى ۇزدىك ۇلگىلەر ۇسىنۋ جولدارى قارىستىرىلدى. كوپمادەنيەتتى تاريحتى ساقتاۋ, گەنەالوگيالىق زەرتتەۋلەر ءۇشىن تسيفرلىق قۇرالداردى پايدالانۋ, قاۋىمداستىقتى تاريح جوبالارىنا تارتۋ جانە ءارتۇرلى شەجىرەلەردى ۇسىنۋداعى قيىندىقتاردى شەشۋ ستراتەگيالارى ايتىلدى.
–بۇگىنگى شارا ارقىلى ءبىز وزگە ەلدەردىڭ كىتاپحانا جۇيەسى قالاي جۇمىس اتقاراتىنىن بىلدىك, ولاردىڭ وزىق تاجىربيەسىن مەڭگەرە وتىرىپ, ءوز ءىسىمىزدى جاڭعىرتا الامىز. ماعان فيليپپين, قىتاي, امەريكا, ەۋروپا ەلدەرىنىڭ وقىرمانمەن بايلانىس, مۇراعات ساقتاۋ سىندى سالاداعى تىڭ تاجىربيەلەرى قىزىق, – دەدى گەرمانيا ەلىنەن كەلگەن قوناق تومسەن كۋكس.
18-22 تامىز ارالىعىندا وتەتىن كىتاپحانا ءىسى سالاسىنداعى ەڭ ءىرى جيىن سانالاتىن وسى باسقوسۋ الەمنىڭ 114 ەلىنەن كەلەتىن 1600-گە جۋىق دەلەگاتتى بىرىكتىرەتىنى ءمالىم ەتىلدى.
