وتباسىنداعى جاراسىمدىلىقپەن, قارىم-قابىلەتتەرىمەن ەرەكشەلەنىپ, ۇرپاقتار ساباقتاستىعىنىڭ قايتالانباس ۇلگىسىن كورسەتكەن 3 ۇزدىك وتباسى جۇزدەن جۇيرىك شىقتى.
تۇركىستان قالاسىندا وتكەن وبلىستىق كەزەڭىنىڭ جەڭىمپازدارىن ماراپاتتاۋ راسىمىندە وبلىس اكىمىنىڭ ورىنباسارى ەرتاي التاەۆ جەڭىمپازدارعا قۇرمەت كورسەتتى. «مەرەيلى وتباسى» بايقاۋى – تەك ۇزدىك وتباسىلاردى انىقتايتىن جارىس قانا ەمەس, بۇل – وتباسى قۇندىلىقتارىن ناسيحاتتاپ, ۇرپاق تاربيەسىنە, ۇلتتىق تاربيەگە ۇلكەن ۇلەس قوسىپ جۇرگەن وتباسىلاردىڭ ەڭبەگىن ەلگە تانىتاتىن ۇلكەن الاڭ. تۇركىستان وبلىسى 500 مىڭنان اسا وتباسى قونىستانعان ءوڭىر رەتىندە دەموگرافيالىق ءوسىمى ەڭ جوعارى ايماق بولىپ ەسەپتەلەدى. وسى وتباسىلاردىڭ ۇيىتقىسىنا اينالعان 187 مىڭنان اسا كوپبالالى انالارىمىزدى ماقتانىشپەن ايتا الامىز», دەدى ەرتاي كەنجەبەك ۇلى.
بايقاۋ قورىتىندىسىنا سايكەس 1 ملن تەڭگە قارجىلاي جۇلدەسىمەن I ورىن مولدابەكوۆتەر وتباسىنا (ساۋران اۋدانى) بۇيىردى. II ورىندى شيريمباەۆتار وتباسى (تۇلكىباس اۋدانى), III ورىندى رىسبەكوۆتەر وتباسى (كەلەس اۋدانى) يەلەندى.
جەڭىمپاز وتباسىنداعى نۇرماحان مولدابەكوۆ 90 جاستا. ساۋران اۋدانى, مايدانتال اۋىلدىق وكرۋگى, ىنتالى ەلدى مەكەنىندە دۇنيەگە كەلگەن. زەينەتكەر, تىل ارداگەرى. جۇبايى وڭلاسىن جۇسىپباەۆا زەينەتكەر, «التىن القا» يەگەرى. ۇلگىلى وتباسى 2 ۇل, 7 قىز, 35 نەمەرە, 23 شوبەرە ءسۇيىپ وتىر.
