216,8 ملرد تەڭگە كولەمىندە باعالانعان نىساننىڭ قۇرىلىسى بيىل 3 ناۋرىزدا باستالعان. جوبا تولىق ىسكە قوسىلعاندا جىلىنا 900 ميلليون تەكشە مەتر تابيعي جانە ىلەسپە گاز وندىرۋگە مۇمكىندىك بەرەدى. بۇل – ەلىمىز ءۇشىن ستراتەگيالىق ماڭىزى زور ءوندىرىس. قۇرىلىستى 2027 جىلعا دەيىن اياقتاۋ جوسپارلانىپ وتىر.
بۇگىندە زاۋىتتىڭ نەگىزگى ىرگەتاسى قالانىپ, سىرتقى ينجەنەرلىك جەلىلەر تارتىلعان. اۆتوتۇراق اۋماعىنا اسفالت توسەلىپ, قوسالقى ستانسادا جەرگە تۇيىقتاۋ جۇيەسىنىڭ العاشقى كەزەڭى اياقتالدى. ۋاقىتشا ەلەكترمەن قامتۋ جەلىسى ىسكە قوسىلىپ, اۆتوكولىك تارازىلارى ورناتىلدى جانە قويما ينفراقۇرىلىمى جابدىقتالدى.
«جاڭاوزەندەگى جۇمىس ىستەپ تۇرعان ەسكى قازاق گاز وڭدەۋ زاۋىتى 1973 جىلى پايدالانۋعا بەرىلگەن ەدى. وندىرىستىك قۋاتتى ارتتىرۋ ماقساتىندا سالىنىپ جاتقان بۇل جاڭا زاۋىت سۇيىتىلعان گاز تاپشىلىعىن جويادى. نىسان قۇرىلىس جۇمىستارى تالاپقا ساي جۇرگىزىلىپ, بەلگىلەنگەن مەرزىمدە اياقتالۋعا ءتيىس. بۇل – ءبىزدىڭ تۇراقتى باقىلاۋىمىزدا بولاتىن جوبا», دەدى دەپۋتات سامات مۇساباەۆ.
قازىر قۇرىلىس الاڭىندا زاۋىتتىڭ «نەگىزگى تەحنولوگيا» بولىمىنە قاتىستى كۇردەلى كەشەندەر جۇمىسى اتقارىلۋدا.
ماڭعىستاۋ وبلىسى – ەلىمىزدىڭ ىشكى نارىعىندا تابيعي گازدىڭ ەڭ ءىرى تۇتىنۋشىسى. سوڭعى جىلدارى ءوڭىردىڭ ينفراقۇرىلىمى قارقىندى دامىپ, تۇرعىن ءۇي مەن الەۋمەتتىك نىساندار سانى كوبەيگەن سايىن گازعا سۇرانىس تا ارتىپ كەلەدى. وسىعان وراي, سايلاۋالدى باعدارلاما اياسىندا ۇزىندىعى 506,5 شاقىرىم ماگيسترالدىق گاز قۇبىرلارىن سالۋ كوزدەلگەن. سونىمەن قاتار, ايماقتا وڭدەۋ ونەركاسىبى سالاسىندا 2,2 مىڭ جاڭا جۇمىس ورنىن اشۋعا مۇمكىندىك بەرەتىن 26 جوبا ىسكە اسىرىلادى.
