فوتولار: ۇكىمەت, تەلەگرام
جالپى جيناۋ الاڭى 23,6 ملن گەكتاردى قۇرايدى, ونىڭ ىشىندە 16 ملن گەكتارى – ءداندى جانە ءداندى-بۇرشاقتى داقىلدار. سوڭعى مالىمەتتەر بويىنشا, 1,1 ملن گەكتار ء(داندى داقىلدار ەگىسىنىڭ 6,6%-ى) ورىلىپ, 1,6 ملن توننا استىق باستىرىلعان, 17,4 مىڭ توننا مايلى داقىل, 363,5 مىڭ توننا كارتوپ, 1,3 ملن توننا كوكونىس جانە 1,6 ملن توننا باقشا ونىمدەرى جينالعان.
اۋىل شارۋاشىلىعى تاۋار وندىرۋشىلەرى توپىراققا 1,7 ملن توننا تىڭايتقىش قوسقان, بۇل جىلدىق جوسپاردىڭ (1,9 ملن توننا) 88%-ىن قۇرايدى. بارلىعى 1,8 ملن تونناعا كەلىسىمشارت جاسالعان, ال قالعان كولەمدى كۇزدە – كۇزگى جىرتۋ مەن پارلارعا ەنگىزۋ جوسپارلانىپ وتىر
اۋىل شارۋاشىلىعى ۆيتسە-ءمينيسترى ازات سۇلتانوۆتىڭ ايتۋىنشا, ەگىن جينايتىن تەحنيكالاردىڭ دايىندىق دەڭگەيى 93%-دى قۇرايدى, ال جاپپاي جيناۋ كەزەڭىندە ول 100%-عا جەتكىزىلەدى. جۇمىسقا 139 مىڭ تراكتور, 31 مىڭ كومباين, 17 مىڭ شاپقىش جانە 130 مىڭ بىرلىك باسقا دا تەحنيكا جۇمىلدىرىلماق.
ەگىن جيناۋ جۇمىستارىنا 402 مىڭ توننا ارزانداتىلعان ديزەل وتىنى بولىنگەن, ونىڭ 9,3 مىڭ تونناسى (جوسپاردىڭ 42%-ى) شارۋالارعا جەتكىزىلدى. جانارماي باعاسى نارىقتان 18–20%-عا تومەن.
جاڭا ءونىمدى قابىلداۋ ءۇشىن ەلەۆاتورلاردان ورىن بوساتۋ ماسەلەسى جەكە قارالدى. قازىرگى ۋاقىتتا ولاردىڭ جۇكتەمەسى 16%-دى قۇرايدى – بۇل جالپى سىيىمدىلىعى 30,7 ملن توننانىڭ (17,4 ملن تونناسى – اۋىل شارۋاشىلىعى تاۋار وندىرۋشىلەرىندە, 13,3 ملن تونناسى – ليتسەنزيالانعان استىق قابىلداۋ كاسىپورىندارىندا) 2,2 ملن تونناسى. بۇعان دەيىن «ازىق-ت ۇلىك كەلىسىمشارت كورپوراتسياسى» تامىز ايىنىڭ سوڭىنا دەيىن كەمىندە 500 مىڭ توننا استىق وتكىزۋ تاپسىرىلعان بولاتىن. باسقارما توراعاسىنىڭ ءبىرىنشى ورىنباسارى يلدار يسماعۇلوۆتىڭ مالىمەتىنشە, قازىرگى تاڭدا 328 مىڭ تونناسى ساتىلدى. تايلاند, پارسى شىعاناعى ەلدەرى, اۋعانستان, ازەربايجان جانە الجيرمەن استىق جەتكىزۋ جونىندە كەلىسسوزدەر جۇرگىزىلىر جاتىر. پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين قالدىق استىقتى وتكىزۋدى جەدەلدەتۋدى تاپسىردى.
سونداي-اق كوكتەمگى دالا جانە جيىن-تەرىم جۇمىستارىنا 5%-دىق جەڭىلدەتىلگەن نەسيەلەندىرۋ بارىسى قارالدى. قارجىلاندىرۋ «اگرارلىق نەسيە كورپوراتسياسى» اق, ەكىنشى دەڭگەيلى بانكتەر, ميكروقارجى ۇيىمدارى, وڭىرلىك ينۆەستيتسيالىق ورتالىقتار, نەسيەلىك سەرىكتەستىكتەر جانە اكك ارقىلى جۇزەگە اسىرىلادى. بارلىعى 7 543 ءوتىنىم ءتۇسىپ, 499,4 ملرد تەڭگە سۇرالدى, ونىڭ ىشىندە 7 485 شارۋاشىلىققا 490,1 ملرد تەڭگە قارجى بەرىلىپ, 7,8 ملن گەكتار ەگىستىك قامتىلدى.
سۋارمالى سۋمەن قامتاماسىز ەتۋ جاعدايى تۇراقتى. الماتى جانە جەتىسۋ وبلىستارىندا ۆەگەتاتسيالىق كەزەڭ قاۋىپسىز ءوتىپ جاتىر, جامبىل وبلىسىندا شۋ جانە تالاس وزەندەرى بويىنشا سۋ بەرۋ كەستەگە ساي جۇرگىزىلىپ جاتىر. اۋىلدىق وكرۋگتەردە باقشا ونىمدەرىن جيناۋ اياقتالىپ, سۋارۋعا دەگەن قاجەتتىلىك ازايدى.
وتىرىس سوڭىندا ۆيتسە-پرەمەر وڭتۇستىك جانە نەگىزگى استىق ءوندىرۋشى وڭىرلەردىڭ وكىلدەرىن تىڭدادى. جاپپاي ەگىن جيناۋ باستالعاننان كەيىن شتاب وتىرىستارى اپتا سايىن وتكىزىلىپ, تۋىندايتىن ماسەلەلەر جەدەل شەشىلەتىن بولادى.
