سەناتور ءتۇسىندىرۋ جۇمىستارىن جۇرگىزدى

«نۇر وتان» پارتياسى وبلىستىق فيليالى عيماراتىندا ەلباسىنىڭ «100 ناقتى قادام» ۇلت جوسپارىن جۇزەگە اسىرۋعا باعىتتالعان پارلامەنت سەناتىنىڭ دەپۋتاتى, سوت جۇيەسى جانە قۇقىق قورعاۋ ورگاندارىنىڭ كونستيتۋتسيالىق زاڭناماسى جونىندەگى كوميتەتىنىڭ مۇشەسى بەكتاس بەكنازاروۆتىڭ قاتىسۋىمەن كوشپەلى وتىرىس ءوتتى.

شاراعا وبلىس اكىمىنىڭ ورىن­باسارى عالي ەسقاليەۆ, وبلىس­تىق ءماسليحاتتىڭ حاتشىسى ءسا­نيا قالدىعۇلوۆا, سۋديالار, پرو­كۋ­راتۋرا مەن ادۆوكاتۋرا قىزمەت­كەرلەرى, وبلىستىڭ قۇقىق قورعاۋ ورگاندارىنىڭ وكىلدەرى قاتىستى.

وتىرىستى وبلىستىق ءماس­لي­حاتتىڭ حاتشىسى ءسانيا قال­دى­عۇلوۆا قىسقاشا ءسوز سويلەپ اشىپ, ۇلت جوسپارىنىڭ ماڭى­زىنا توقتالدى. جيىندا ءسوز العان سەناتور بەكتاس بەكنا­زاروۆ مەم­لەكەت باسشىسى نۇر­سۇلتان نازارباەۆتىڭ ۇلت جوس­پارى – 100 ناقتى قادام بەس ينستي­­تۋت­­تىق رەفورماسىن جۇزەگە اسىرۋ – بۇل جاھاندىق ىشكى سىن-قاتەرلەر­گە جاۋاپ جانە جاڭا تاريحي جاع­داي­لاردا دامىعان 30 مەملەكەتتىڭ قاتارىنا ەنۋ جونىندەگى باياندى باعدارلاما ەكەندىگىن اتاپ ءوتتى. «100 ناقتى قادام» قازاقستان مەملەكەتتىلىگىن نىعايتۋعا, تۋرا جولدان تايماۋعا, كۇردەلى كەزەڭنەن سەنىمدى وتۋگە جاعداي تۋعىزاتىن جانە زاڭ ۇستەمدىگىن قامتاماسىز ەتەتىن بولادى, – دەي كەلىپ, ول قۇقىق قورعاۋ ورعاندارىن رەفورمالاۋعا بايلانىستى بولاتىن وزگەرىستەردى ءتۇسىندىردى. وبلىستىق سوتتىڭ توراعاسى ەرلان ايتجانوۆ ۇلت جوسپارىن جۇزەگە اسىرۋداعى زاڭ ۇستەمدىگىن قامتاماسىز ەتۋ ماسەلەسى جونىندە باياندادى, سوتتىڭ اشىقتىعى مەن جاريالىلىعىنا قاتىستى اتقارىلعان جۇمىستاردى تىلگە تيەك ەتتى. ونىڭ ايتۋىنشا, وبلىستىق سوت بەينە جانە اۋديو قۇرالدارمەن 70 پايىز قامتاماسىز ەتىلگەن, بۇل ءوز كەزەگىندە سوت جۇمىسىنىڭ جاريالىلىعى مەن اشىقتىعىنا العىشارت جاسايدى. ودان كەيىن ءسوز العان وب­لىستىق ىشكى ىستەر دەپارتامەنتى باسشىسىنىڭ ءبىرىنشى ورىنباسارى راحات احانوۆ قۇقىق قورعاۋ ورگان­دارىنداعى وزگەرىستەردى بۇگىنگى جاع­دايمەن ساباقتاستىردى, الداعى ۋاقىتتا اتقارىلار اۋقىم­دى ىستەردى ايتا كەلىپ, بۇل باعىت­تاعى ويلارىن ورتاعا سالدى. اسىرەسە, جەرگىلىكتى بيلىكپەن قويان-قولتىق جۇمىس ىستەۋدىڭ ءتيىم­دىلىگىنە باسا نازار اۋداردى. سەناتور, سونداي-اق, وبلىس ورتالىعىندا قوعامدىق قابىلداۋ وتكىزدى. سودان كەيىن العا جانە حرومتاۋ اۋدانىنىڭ اكتيۆىمەن كەزدەسىپ, ەلباسىنىڭ «100 ناقتى قادام» ۇلت جوسپارىن جۇزەگە اسىرۋعا باعىتتالعان تۇسىنىك جۇمىستارىن جۇرگىزدى.

ساتىبالدى ءساۋىرباي, «ەگەمەن قازاقستان».

اقتوبە وبلىسى.