ەرتىس بويىنداعى ەڭبەك فورۋمى: جۇمىسشى ماماندىقتاردىڭ جاڭا تىنىسىن اشتى

پرەزيدەنت قاسىم-جومارت توقاەۆ دەلەگاتتارعا ۇندەۋ جولداپ, جاستار قوعامنىڭ قوزعاۋشى كۇشى ەكەنىن اتاپ ءوتتى. فورۋمعا قاتىسۋشىلارعا پرەزيدەنتتىڭ ۇندەۋى LED-ەكران ارقىلى كورسەتىلدى.

مەملەكەت باسشىسى جاستار فورۋمى ءوتىپ جاتقان پاۆلو­دار ايماعى ۇلت رۋحانياتىن بايى­تۋعا ولشەۋسىز ەڭبەك سىڭىرگەن كور­نەكتى تۇلعالاردىڭ مەكەنى دەپ اتاپ, سونداي-اق ەلىمىزدەگى ونەركاسىپ ورتالىعىنىڭ ءبىرى ءارى ەل ەكونوميكاسىن وركەندەتۋگە قوسقان ۇلەسى زور ەكەنىن اتاپ ءوتتى.

سونىمەن قاتار پرەزي­دەنت ەلىمىزدە ەڭبەك ادامىنا ءار­دايىم ەرەكشە قۇرمەت كور­سەتىلۋى كەرەكتىگىن ايتتى. مۇنى وسكەلەڭ ۇرپاقتىڭ ساناسىنا ءسىڭىرۋ ماڭىزدىلىعىنا دا نازار اۋداردى.

فورۋم جۇمىسىنا ۇكىمەت باسشىسى­نىڭ ورىنباسارى ەرمەك كوشەرباەۆ پەن پاۆلودار وبلىسىنىڭ اكىمى اسايىن بايحانوۆ قاتىستى. 

– بۇگىن مۇندا مىقتى, باسەكەگە قابى­لەتتى جانە تەحنولوگيالىق جاعىنان دا­مىعان قازاقستاندى قالىپتاستىراتىن جاس­تار جينالىپ وتىر. ەلىمىزدە حالىق­تىڭ ۇشتەن ءبىرى جاستار, ازاماتتاردىڭ ورتاشا جاسى 32 جاستى قۇرايدى جانە بۇل ۇلەس ءوسىپ كەلەدى. سوندىقتان جۇمىسشى ماماندىقتار جىلىن جاريالاۋ ولاردىڭ بەدەلىن ارتتىرۋ جانە تەحنيكالىق مامان­دىقتاردى جاستار اراسىندا تانىمال ەتۋ ءۇشىن ماڭىزدى قادام بولدى. ەل ۇكى­مەتى جاستاردى قولداۋ بويىنشا كەشەن­دى ءىس-شارالار قابىلداپ وتىر. اتاپ ايتقاندا, ستۋدەنتتىك شاكىرتاقىلار ەكى ەسە ۇلعايدى, جاڭادان 17 جاتاقحانا سالى­نىپ, شەتەلدىك كوللەدجدەر مەن ۋني­ۆەر­سيتەتتەردىڭ فيليالدارى اشىلدى. «جاسىل ەل», «جاستار تاجىريبەسى», «ديپلوممەن – اۋىلعا!» باعدارلامالارى ىسكە اسىرىلىپ, جۇمىسشى ماماندارعا ارنالعان جەڭىلدەتىلگەن «ناۋرىز», «وتاۋ» تۇرعىن ءۇي باعدارلامالارى جانە «ناۋ­رىز جۇمىسكەر» جاڭا جوباسى جۇمىس ىستەيدى. «بولاشاق» ستيپەندياسىنا قايتا باعدارلاۋ جۇرگىزىلىپ, گرانتتاردىڭ كەمىندە 60 پايىزى تەحنيكالىق مامان­دىقتارعا بولىنەدى, – دەدى ۆيتسە-پرەمەر.

سۋرەتتى تۇسىرگەن – ەسەنجول يسابەك

ءىس-شارا بارىسىندا ءبىر سالادا كوپ جىلدار ەڭبەك ەتىپ كەلە جاتقان پاۆلودار وبلىسىنداعى ەڭبەك اۋلەتى – امىرەنوۆتەر ماراپاتتالدى. ولار كومىر وندىرەتىن كاسىپورىندا 180 جىلدان استام ۋاقىت ەڭبەك ەتىپ كەلەدى.

– ەڭبەككە دەگەن قۇرمەت ۇرپاقتان-ۇرپاققا بەرىلگەن وتباسىندا ءوستىم. اتام, اكەم, اعالارىم ءومىر بويى ءوڭىردىڭ يگىلىگى جولىندا ايانباي ەڭبەك ەتتى. مەن سولاردىڭ جولىن جالعاستىرىپ جاتقا­نىمدى ماقتان تۇتامىن. ءارى وسى فورۋمدا ءبىزدىڭ, ياعني جاس ماماندار ەلىمىزگە قاجەت ەكەنىمىزدى جانە ونىڭ دامۋىنا ءوز ۇلەسىمىزدى قوسا الاتىنىمىزعا كوز جەتكىزدىم, – دەيدى ەڭبەك ديناستياسىنىڭ جاس وكىلى ەرقانات امىرەنوۆ.

پاۆلودار وبلىسىنىڭ اكىمى اسايىن بايحانوۆ وڭىردە 80 مىڭنان استام ادام ەڭبەك ەتەتىن 1000-نىڭ ۇستىندە ونەر­كاسىپ­تىك كاسىپورىن تىركەلگەنىن, ونىڭ 75 پا­­يىزى جۇمىسشى ماماندىق يەلەرى ەكەنىن اتاپ ءوتتى.

– كەپىلدى جۇمىسقا ورنالاسۋ, لايىق­­تى جالاقى, الەۋمەتتىك پاكەت ماسە­لەسىن قول­­عا الۋ ارقىلى تەحنيكا­لىق ما­مان­دىق­­تاردىڭ جاس ماماندارى ءۇشىن ءبىز ناق­تى جاع­دايلار جاساپ وتىر­مىز. بۇگىنگى فو­­رۋم – بۇل كۇش-جى­گەردى بىرىكتىرۋدىڭ, جا­ڭا يدەيا­لار­مەن الماسۋدىڭ, ەلدىڭ دا­مۋى­نا ىق­پال ەتەتىن ناقتى ۇسىنىستار ەن­­گىزۋ­­­دىڭ بىرەگەي مۇمكىندىگى, – دەدى ءوڭىر باسشىسى.

فورۋمعا جينالعاندار ەكى كۇن بويى تاجىريبە الماسىپ, كاسىبي ءوسۋ جولدارىن كەڭەيتىپ, تابىستى ەڭبەك جولىنىڭ ۇلگىلەرىنە قانىقتى. وتاندىق ءوندىرىستى جاڭعىرتۋ ۇدەرىستەرىنە جاستاردىڭ قاتىسۋىن كۇشەيتۋ, مانساپتىق مۇم­كىن­دىكتەردى كەڭەيتۋ باعىتىنداعى تاقى­رىپتىق سەسسيالار, ترەنينگتەر, پىكىرتالاس الاڭدارىندا كوپتەگەن تىڭ جانە قىزىقتى ماعلۇماتتار ايتىلدى. جاستار پاۆلودار قالاسىنىڭ اسەم جەرلەرىمەن, وندىرىستىك كاسىپورىندارىمەن تانىسىپ, وزدەرى ءۇشىن پايدالى تۇستاردى كوڭىلدەرىنە توقىپ قايتقانى داۋسىز.

جۇمىسشى مامانداردىڭ مارتەبەسىن كوتەرۋ – ەكونوميكالىق تۇراقتىلىق پەن الەۋمەتتىك پروگرەستىڭ باستى فاكتورى رەتىندە جۇمىسشى كاسىپتەرىنىڭ ءرولىن كۇشەيتۋدەگى ستراتەگيالىق قادام. ال جۇمىسشى ماماندىقتار ورىندارىن دامىتۋ – ەل بولاشاعىنا, ونىڭ تەحنولوگيالىق جانە ەكونوميكالىق دامۋىنا سالىنعان ينۆەستيتسيا. بۇل رەتتە ەرتىستىڭ پاۆلودار ءوڭىرى – ونەركاسىبى دامىعان ايماق ەكەنىن ايتا كەتكەن ءجون. ەل ەكونوميكاسىنىڭ ىلگەرىلەۋىنە ايتارلىقتاي مول ۇلەسىن قوسىپ وتىر. جۇمىسشى ماماندىقتارى جىلىندا ءوڭىردىڭ اتقارۋشى بيلىگى قاراپايىم ەڭبەك ادامدارىن ۇلگى ەتىپ, جاستاردىڭ نازارىن سولاي قاراي بۇرۋعا تالپىنىپ كەلەدى.

فورۋمنىڭ العاشقى كۇنى وتكەن پلەنارلىق وتىرىستا مادەنيەت جانە اقپارات ۆيتسە-ءمينيسترى ەۆگەني كوچەتوۆ زامانعا ساي كاسىپتىك-تەحنيكالىق مامان­دىق­تاردى يگەرگەن جاستارعا ءوندىرىس ورىندارىنان سۇرانىس كۇننەن-كۇنگە ءوسىپ كەلە جاتقانىن جەتكىزدى.

– جاستاردىڭ تەحنيكالىق بىلىمگە دەگەن سۇرانىستارىن قاناعاتتاندىرۋ ءۇشىن وتاندىق قۇزىرەتتى ورگاندار ماڭىز­­دى جوبالار مەن باعدارلامالاردى ۇز­بەي اتقارىپ كەلەدى. مەملەكەتتىك قولداۋ­دان بولەك, كوپتەگەن ءىرى كاسىپورىن جاس ماماندارىن قولداپ, جەكە الەۋمەت­تىك باعدارلامادار ءتۇزىپ جاتىر. مۇنىڭ بارلىعى مەملەكەت باسشىسى بەرگەن تاپسىرمالاردىڭ ءوز ورنىمەن ىسكە اسىپ جاتقانىن بىلدىرەدى. بۇل تۇستا پاۆلودار وبلىسى جاستار ساياساتىن دامىتۋدا كوشباسشىلار قاتارىندا ەكەنىن ايتىپ وتكىزىم كەلەدى, – دەدى ە.كوچەتوۆ.

وبلىستىق ءماسليحات توراعاسى يليا تەرەنچەنكو بۇگىندە وبلىستىق دەپۋتاتتار كورپۋسىنىڭ 30 پايىزدان استامى جاستار ەكەنىن اتاپ ءوتتى. ال ءوڭىر بويىنشا بەس ساياسي پارتيا فيليالدارىنىڭ تورتەۋىن جاستار باسقارىپ وتىر.

«حالىقارالىق باعدارلامالار ورتا­­لى­عى» جشس باسقارما توراعاسى ءادىل قۇس­­مانوۆ, فەرمەر جانە «Dala Camp» جوبا­سىنىڭ نەگىزىن قالاۋشى جانى­بەك كەنجەباەۆ, پرەزيدەنت جانىن­داعى جاستار ساياساتى جونىندەگى كەڭەس­تىڭ مۇشەسى, پاۆلودار قالالىق ءماسلي­حاتى­نىڭ دەپۋتاتى گۇلزيرا اتاباەۆا, «بولاشاق» باعدارلاماسىنىڭ ستيپەندياتى, قازاق تىلىندەگى «Aqyl Battle» زيات­كەر­لىك ويىنى­نىڭ ازىرلەۋشىسى ايبو­لات قۇلاتاي جانە باسقالارى ءوز تاجىري­بەلەرىن ءبولىستى.

فورۋم قاتىسۋشىلارىنىڭ ءبىرى الپا­مىس مەرەي وسكەمەندەگى «قازتسينك» جشس-نان كەلىپتى. ايتۋىنشا, التاي قالا­سىنىڭ مالەۆسكي كەنىشىندە كەن تيەگىش تەحنيكانىڭ ءماشينيسى بولىپ ەڭبەك ەتەدى. كاسىپورىندا 7 جىلدان بەرى جۇمىس ىستەيدى.

– بۇرىن مەملەكەتتىك قىزمەتتە, اسكەر­گە شاقىرۋ كوميسسارياتىندا قىز­مەت ەتتىم. ارادا ءبىراز ۋاقىت وتكەن­دە وندىرىسكە بارۋعا بەل بۋدىم. قازىر­گى ۋاقىتتا بۇل شەشىمىمنىڭ دۇرىس بولعانىنا كوزىم جەتىپ وتىر. ەڭبەكاقى­مىز جوعارى, جۇمىس بەرۋشى ارنايى كيىممەن, جۇمىس بارىسىندا تاماقپەن قامتاماسىز ەتەدى. جىلىنا ەكى رەت ەڭبەك دەمالىسىنا جىبەرىپ تۇرادى. ەڭ باستىسى, ءوندىرىس ورنىنىڭ ارقاسىندا ەكى جوعارى ءبىلىمدى يگەردىم. ءبىرى مەتاللۋرگ ماماندىعى بولسا, ەكىنشىسى – دەنە شىنىقتىرۋ پەداگوگى ماماندىعى. ەكەۋىنىڭ دە وقۋ اقىسىن كاسىپورىن تولىق وتەپ بەردى. بيىل ۇلىم ءبىرىنشى سىنىپقا بارعالى جاتىر, ول ءۇشىن دە سەرىكتەستىك قوماقتى ماتەريالدىق كومەك بەرگەلى وتىر, – دەيدى جاس مامان.

ال «ERG» كومپانياسىنىڭ استانا قالاسىنداعى باس كەڭسەسىنىڭ ساراپشىسى, كومپانياداعى جاستار ليگاسى ەلورداداعى كەڭسەسىنىڭ باسشىسى نۇرجان ابدىكەروۆ جاس مامانداردى ءوندىرىس ورنىنا تارتۋ جانە جاستار رەسۋرستارىن دامىتۋعا قاتىستى ءوز ويلارىن ءبولىستى. ونىڭ سوزىنشە, كوپتەگەن جاستار ءۇشىن ءوندىرىس ورىندارىنداعى تەحنيكالىق ماماندىقتار سۇرانىسقا يە ەمەس.

– كوپ جاس وندىرىستە ءالى دە ەسكى تەحنولوگيا قولدانىلىپ, ادامدار شاڭ-توزاڭى بۇرقىراعان, اۋىر جاعدايدا ەڭبەك ەتەدى دەپ ويلايدى. شىن مانىندە, قازىر ءبىزدىڭ كاسىپورىنداردىڭ بارلىعى دەرلىك جاڭا تەحنولوگيامەن جاراقتالعان, وزىق ءادىس-امالدار ەنگىزىلىپ, قىزمەتكەرلەرى­مىز­دىڭ دەنساۋلىعى مەن ومىرىنە نۇقسان كەلتىرەتىن قاۋىپ-قاتەرلەر بارىنشا ازايعان. سوندىقتان جاستاردى ءوندىرىس ورنىمەن ءجيى تانىستىرۋعا, وندىرىسكە ەرتە باستان ۇيرەتۋگە دەن قويىپ وتىرمىز. كەيبىر بەلسەندى جاس جۇمىسشىلاردى ءبىر كۇنگە ۋچاسكە باسشىسى, شەبەر ەتىپ تاعايىنداپ, ءوزىنىڭ مۇمكىندىگىن كورسەتۋگە ەرىك بەرەمىز. مۇنداعى ماقسات – كادرلىق رەزەرۆتى تولىقتىرىپ, HR قىزمەتتى كۇشەيتۋ, عىلىمي-تەحنيكالىق, وندىرىستىك, الەۋمەتتىك جوبالارىمىزعا جاستاردى كوبىرەك شوعىرلاندىرۋ, – دەدى ن.ابدىكەروۆ.

فورۋمنىڭ ەكىنشى كۇنى «پاۆلودار – جۇمىسشى ماماندىقتار ايماعى» كورمەسى, ال كەشكە «Ertis Promenade» ساحناسىندا «جاستار FEST» اۋقىمدى جاستار فەستيۆالى ۇيىمداستىرىلدى. تالانتتى جاستار مەن تانىمال ورىنداۋشىلاردىڭ قاتىسۋىمەن «Open AIR» فورماتىنداعى كونتسەرتتىك باعدارلاما مىڭداعان كورەر­مەندەردى شىعارماشىلىق جانە اشىق ديالوگ اتموسفەراسىنا بىرىكتىردى.

رەسپۋبليكالىق جاستار فورۋمى تەك مەرەكە عانا ەمەس, سونىمەن قاتار مەملەكەتتىك قولداۋدى, كاسىبي جانداردىڭ تاجىريبەسى مەن جاڭا بۋىن ۇرپاقتىڭ ەنەرگياسىن بىرىكتىرگەن اۋقىمدى پىكىرتالاس الاڭىنا اينالدى. ماماندار مۇنداي ءىس-شارالار ەلدىڭ كادرلىق الەۋەتىن قالىپ­تاس­تىرۋعا ىقپال ەتەتىنىن, جۇمىسشى مامان­دىقتاردىڭ بەدەلىن ارتتىرىپ, جاس­تار­دىڭ ەلىمىزدى جاڭعىرتۋعا بەلسەندى قاتىسۋىنا جاعداي جاسايتىنىن ايتادى.

پاۆلودار وبلىسى