وتاندىق «پريانيكي دليا ەيو وتتسا, موەگو پرادەدا, ەيو دەدا» اتتى دەرەكتى ءفيلمى «Sikay Tang Critical Lens Award» جۇلدەسىن جەڭىپ الدى. بۇل سىيلىق كورنەكتى رەجيسسەر جانە مونتاج شەبەرى سيكاي تانگتىڭ قۇرمەتىنە اتالعان. الەۋمەتتىك جانە مادەني تاقىرىپتاردى تەرەڭ زەرتتەلگەن دەرەكتى كارتينالارعا بەرىلەدى. جۇلدە نەبارى ەكىنشى جىل تابىستالىپ وتىرعانىمەن, AAIFF دەرەكتى باعدارلاماسىنىڭ ەڭ بەدەلدى ماراپاتتارىنىڭ ءبىرى سانالادى.
رەجيسسەر الينا مۇستافينانىڭ تۋىندىسى مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرگەن. «پريانيكي دليا ەيو وتتسا, موەگو پرادەدا, ەيو دەدا» كارتيناسىندا ءۇش بۋىن وكىلى اۆتوبيوگرافيالىق ساپارعا اتتانادى. ايەلدەر قازاقستاننان تاتارستانعا, كەيىن پولشا اسىپ ءتۇپ-تامىرىن, اتا-باباسىن ىزدەيدى.
بۇل جوبا بۇعان دەيىن دە حالىقارالىق دەڭگەيدە باعالانعان. تۋىندىنىڭ پۋسان حالىقارالىق كينوفەستيۆالىندە الەمدىك پرەمەراسى, تۋرين كينوفەستيۆالىندە ەۋروپالىق پرەمەراسى ءوتتى, «باستاۋ» فەستيۆالىندە (قازاقستان) «ۇزدىك دەبيۋت» جۇلدەسىن الدى, تەگەرانداعى «Cinema Verite» فەستيۆالىندە «ۇزدىك فيلم» گران-ءپريىن يەلەندى. سونداي-اق «Bolzano Film Festival Bozen» (يتاليا) جانە «ORAI Festival» (اباي, قازاقستان) ارنايى كورسەتىلىمدەرىنە ۇسىنىلدى.
ايتا كەتەيىك, AAIFF 1978 جىلدان بەرى جىل سايىن وتكىزىلىپ كەلەدى. ازيالىق جانە ازيا-امەريكالىق كينەماتوگرافيستەر ءۇشىن ماڭىزدى الاڭ سانالادى. بۇل فەستيۆال الەمگە ەرەكشە وقيعالاردى كورسەتىپ, جاڭاشا كوركەمدىك كوزقاراس قالىپتاستىرادى.
