قوستاناي وبلىسىنىڭ تۇرعىنى قىلمىسكەردى ءىزىن سۋىتپاي ۇستادى

قوستاناي. 5 تامىز. قوستاناي وبلىسى قارابالىق اۋداندىق ىشكى ىستەر ءبولىمىنىڭ باستىعى دەربەس جارماعامبەتوۆ اۋدان ورتالىعىنداعى دۇكەنگە تۇسكەن ءۇش قاراقشىنىڭ ءىزىن سۋىتپاي ۇستاۋعا كومەكتەسكەن ۆيكتور ساۆچەنكوعا العىس حات تاپسىردى. بۇل تۋرالى egemen.kz ءتىلشىسى حابارلادى. كەشكى ساعات 20:00-دە پوليتسيانىڭ كەزەكشىلىك بولىمىنە بەلگىسىز ءۇش ادامنىڭ «ەليت» دۇكەنىن توناپ, قاشىپ كەتكەنى تۋرالى دابىل تۇسەدى. دۇكەنشى ءبىر ادامنىڭ سىرتتا قالىپ, ەكەۋى دۇكەنگە كىرىپ, ءوزىن قورقىتىپ, كاسساداعى اقشانى الىپ كەتكەنىن حابارلايدى. ىشكى ىستەر ءبولىمى بۇكىل قۇرامدى دابىلمەن جەدەل كوتەرەدى. وسى كەزدە قارابالىق تۇرعىنى ۆيكتور ساۆچەنكو «ەليت» دۇكەنىنە قاراي كولىگىمەن كەلە جاتادى. ول كەلە بەرگەندە ءۇش ادامنىڭ دۇكەننەن شىعا كەلگەنىن بايقاپ, ولاردىڭ سۋىت ءجۇرىسىن سەزەدى. دەرەۋ دۇكەنگە كىرىپ, دۇكەنشى بولىپ ىستەيتىن ءوزىنىڭ قايىن ەنەسىنىڭ امان ەكەنىن كورەدى دە, قىلمىسكەرلەردىڭ ارتىنان قۋا جونەلەدى. ەكەۋىنە كوشەدە قۋىپ جەتكەنىمەن, ولار قاشىپ كەتەدى. ءۇشىنشىسىن كولىگىنە وتىرعىزىپ, وقيعا ورنىنا الىپ كەلەدى. پوليتسەيلەر قالعان ەكى ۇرىنى سول تاۋلىكتەن قالدىرماي قولعا ءتۇسىردى. ونىڭ بىرەۋىن ءبىر ۇيدەن, ەكىنشىسىن باسقا ءۇيدىڭ توسەگىنىڭ استىنا تىعىلعان جەرىنەن ۇستاعان. قاراقشىلىق كورسەتكەن ۇشەۋى دە بۇرىن سوتتالعان, 24-26 جاستاعى جىگىتتەر ەكەن. قارابالىق اۋداندىق ىشكى ىستەر ءبولىمىنىڭ باسشىلىعى قىلمىسكەرلەردى ۇستاۋداعى ەرلىك ءىسى ءۇشىن ۆيكتور ساۆچەنكوعا العىس حات تاپسىردى. ءنازيرا جارىمبەتوۆا. دەرەك, سۋرەت: egemen.kz.