بۇل باستاما ۋيليام شەكسپير شىعارمالارىنىڭ زاماناۋي ينتەرپرەتاتسياسىنا ارنالعان ۇزدىك سپەكتاكلدەر مەن تەاتر ۇجىمدارىن ىرىكتەۋدى ماقسات ەتەدى. الەمنىڭ ءار تۇكپىرىنەن ۇسىنىلعان 18 تەاتردىڭ اراسىنان ىرىكتەلگەن ەكى ۇزدىك ۇجىمنىڭ ءبىرى بولىپ الماتى قالاسى مەملەكەتتىك قۋىرشاق تەاترى تاڭدالدى. ونەر ورداسى الماتى قالاسى اكىمدىگىنىڭ قولداۋىمەن ۋيليام شەكسپيردىڭ «رومەو مەن دجۋلەتتا» سپەكتاكلىن قۋىرشاق بەينەسىندە ساحنالاپ, كورەرمەننىڭ ىستىق ىقىلاسىنا بولەندى.
ء«بىز «رومەو مەن دجۋلەتتا» سپەكتاكلىن تاماشالاپ, ەرەكشە اسەرمەن شىقتىق. اۆينونداعى فەستيۆالدىڭ ۇزدىك تۋىندىلارىنىڭ ءبىرى دەپ ايتا الامىن. كوزىمە جاس العان ساتتەر دە بولدى. جوعارعى دەڭگەيدە ساحنالانعان, رەجيسسۋراسى دا, اكتەرلىك ويىنى دا كەرەمەت. بىزگە وسىنداي تۋىندىنى كورۋگە مۇمكىندىك بەرگەندەرىڭىز ءۇشىن العىس بىلدىرەمىز!», دەپ اتاپ ءوتتى «International Shakespeare Festival Craiova» – فەستيۆالىنىڭ ۇيىمداستىرۋشىسى اندرەي ستەفانەسكيۋ.
ايتا كەتەيىك, الداعى جىلى رەجيسسەر دينا جۇمابايدىڭ «رومەو مەن دجۋلەتتا» سپەكتاكلى قازاق تىلىندە الەمدىك ساحناعا جول تارتىپ, جاڭا بيىككە كوتەرىلەدى. شەكسپير مۇراسىن جاڭا كوزقاراسپەن تالقىلايتىن, ءتۇرلى مادەنيەتتەردى بايلانىستىراتىن حالىقارالىق ديالوگ الاڭىنا اينالعان رۋمىنياداعى بۇل فەستيۆال – الماتى قالاسىنىڭ مەملەكەتتىك قۋىرشاق تەاترى ءۇشىن فرانتسياداعى «Off Avignon» جوباسىنىڭ تابىستى ناتيجەسى بولدى.
تەاتر الەمىندەگى ۇزدىك شىعارماشىلىق ۇجىمدارمەن بايلانىس ورناتۋ, كاسىبي تاجىريبە الماسۋ, بولاشاقتا بىرلەسكەن جوبالاردى جۇزەگە اسىرۋعا مۇمكىندىك بەرەدى. وسىنداي كوپتەگەن ماڭىزدى ماقساتتى جۇزەگە اسىرعان «Off Avignon» فەستيۆالى – الماتى قالاسى مەملەكەتتىك قۋىرشاق تەاترىنىڭ فرانتسيا, انگليا, گەرمانيا, يتاليا سىندى ەلدەرمەن مادەني بايلانىسىن كەڭەيتىپ, شىعارماشىلىق كوكجيەگىن جاڭا دەڭگەيگە كوتەرگەن ماڭىزدى كوپىرگە اينالدى.
