اتىراۋدا 272 ملن. تەڭگەنىڭ جۇمىسى اتقارىلماعان

اتىراۋ. 5 تامىز. اتىراۋ وبلىسىنىڭ پروكۋرورلارى اۋىز سۋ جۇيەسىن قامتاماسىز ەتۋگە بولىنگەن قاراجات ەسەبىنەن جالپى قۇنى 272 175 506 تەڭگەنىڭ جۇمىس اۋقىمى اتقارىلماي قالعانىن انىقتادى. بۇل تۋرالى وبلىستىق پروكۋراتۋراعا سىلتەمە جاساعان egemen.kz ءتىلشىسى حابارلادى. ەلباسىنىڭ جولداۋلارىندا, سونىمەن بىرگە, «وڭىرلەردى دامىتۋ-2020» باعدارلاماسىندا حالىقتى ساپالى اۋىز سۋمەن قامتۋ ماسەلەسىنە ەرەكشە كوڭىل ءبولىنىپ وتىر. وسىعان وراي اتىراۋ وبلىسىنىڭ پروكۋراتۋرا ورگاندارى «اق بۇلاق» باعدارلاماسىنىڭ جۇزەگە اسىرىلۋىن ءجىتى باقىلاۋعا الدى. پروكۋراتۋرا قىزمەتكەرلەرى جۇرگىزگەن تەكسەرۋلەر ناتيجەسىندە بيۋدجەت قاراجاتىن نەگىزسىز جۇمساۋ, ەلدى مەكەندەردى اۋىز سۋمەن تولىق قامتاماسىز ەتپەۋ, مەرزىمىندە اياقتالماعان جۇمىستار ءۇشىن ايىپپۇلدار ەسەپتەمەۋ, سانيتارلىق-ەپيدەميولوگيالىق نورمالاردىڭ بۇزىلۋ فاكتىلەرى انىقتالدى. ماسەلەن, يندەر اۋدانىنىڭ ورتالىقتاندىرىلعان جانە ورتالىقتاندىرىلماعان سۋ بەرۋ جۇيەسىندەگى اۋىز سۋ ساپاسىنا زەرتتەۋلەر جۇرگىزىلىپ, ناتيجەسىندە ەلتاي اۋىلىنداعى سۋ تۇنباسىندا حلور قالدىعىنىڭ بولماعانى انىقتالدى. سونىمەن بىرگە, ميكروبيولوگيالىق زەرتتەۋلەردىڭ ناتيجەسىندە سۋ قۇرامىندا جالپى كوليفورم جانە تەرموتولەرانت كوليفورم باكتەريالارىنىڭ بار ەكەندىگى انىقتالعان. «اتىراۋ وبلىسىندا اۋىز سۋ جۇيەسىن قامتاماسىز ەتۋگە بولىنگەن قاراجاتتىڭ ەسەبىنەن جالپى قۇنى 272 175 506 تەڭگەنى قۇرايتىن جۇمىس اۋقىمى اتقارىلماي قالعان», دەلىنگەن وبلىستىق پروكۋراتۋرا تاراتقان حابارلامادا. اتالعان ماسەلە وبلىس پروكۋرورى عالىمجان توعىزباەۆتىڭ توراعالىعىمەن وتكەن القا ماجىلىسىندە كەڭىنەن تالقىعا ءتۇستى. القا ماجىلىسىندە قارالعان ماسەلە بويىنشا وبلىس اكىمىنە جانە وزگە دە ۋاكىلەتتى ورگاندارعا ءتيىستى پروكۋرورلىق ىقپال ەتۋ اكتىلەرى ەنگىزىلەتىن بولدى. جولداسبەك شوپەعۇل. دەرەك: اتىراۋ وبلىستىق پروكۋراتۋراسى. سۋرەت: azh.kz.