فوتو: ۇكىمەت
ۇكىمەت وتىرىسىندا ولجاس بەكتەنوۆ قىركۇيەك ايىندا 115 مىڭ جاڭا وقۋشى ورنىنا ارنالعان 83 جاڭا مەكتەپ اشۋ جوسپارلانعانىن ايتتى. ونىڭ ىشىندە «كەلەشەك مەكتەپتەرى» ۇلتتىق جوباسى اياسىندا 57 ءبىلىم وشاعى پايدالانۋعا بەرىلەدى.
جيىندا ەلىمىزدە ءۇش اۋىسىمدى مەكتەپ ماسەلەسى بىرتىندەپ شەشىمىن تاۋىپ كەلە جاتقانى دا اتاپ ءوتىلدى.
پرەمەر-مينيستر ەلىمىزدىڭ 9 وڭىرىندە نىساندى اياقتاۋ بويىنشا جۇمىستاردى جەدەلدەتۋ قاجەت ەكەنىنە نازار اۋداردى. «سامۇرىق-قازىنا» قورىنا اكىمدىكتەرمەن بىرگە نىسانداردىڭ جاڭا وقۋ جىلىنا دەيىن پايدالانۋعا بەرىلۋىن قامتاماسىز ەتۋ تاپسىرىلدى.
سونىڭ ىشىندە 34 مەكتەپتىڭ قۇرىلىسى سوزىلىپ كەتكەن. بەكتەنوۆ اكىمدەرگە ۋاقتىلى اياقتاۋدى جانە جۇمىس ساپاسىن قاتاڭ باقىلاۋعا الۋدى تاپسىردى.
مەكتەپ قۇرىلىستارى باياۋ جۇرگىزىلىپ جاتقان وڭىرلەر قاتارىندا الماتى قالاسى, اباي, ۇلىتاۋ, باتىس قازاقستان, الماتى, قىزىلوردا, اتىراۋ, اقتوبە جانە شىعىس قازاقستان وبلىستارى بار ەكەنى انىقتالدى.
«اتالعان ءوڭىر اكىمدەرى جوندەۋ جۇمىستارىنىڭ ساپاسى مەن مەرزىمىندە ورىندالۋىن تىكەلەي باقىلاۋىنا السىن. سونىمەن قاتار فيزيكا, حيميا, بيولوگيا, روبوتوتەحنيكا سياقتى ارناۋلى كابينەتتەردى دەر كەزىندە ساتىپ الۋ دا وزەكتى ماسەلە. قىركۇيەك ايىنا دەيىن كەمىندە 200 پاندىك كابينەتتى جابدىقتاۋ قاجەت», دەدى ولجاس بەكتەنوۆ.
پرەمەر-مينيستر بىرىڭعاي قاۋىپسىزدىك جۇيەسىن ەنگىزۋ جونىندەگى پرەزيدەنت تاپسىرماسى ساپالى ءارى بەلگىلەنگەن مەرزىمدە ورىندالۋى كەرەك ەكەنىنە توقتالدى. ءبىلىم بەرۋ مەكەمەلەرىندە ليتسەنزياسى بار كۇزەت, تۋرنيكەتتەر, جەدەل باسقارۋ ورتالىقتارىنا قوسىلعان كامەرالار مىندەتتى تۇردە بولۋى ءتيىس.
«مۇنىڭ بارلىعى وقۋ ورىندارىندا بالالاردىڭ ءومىرى مەن دەنساۋلىعىنىڭ قاۋىپسىزدىگىنە كەپىلدىك بەرەدى. ىشكى ىستەر مينيسترلىگى تەرروريزمگە قارسى قورعاۋ تالاپتارىنا سايكەستىگى تۇرعىسىنان ءبىلىم بەرۋ نىساندارىن تەكسەرۋ جۇمىسىن جالعاستىرۋى قاجەت. بۇگىندە وڭىرلەردەگى جەكەمەنشىك ءبىلىم بەرۋ ۇيىمدارىنىڭ 30%-عا جۋىعى قاجەتتى قۇرال-جابدىقتارمەن قامتاماسىز ەتىلمەگەن. وسىعان نازار اۋدارعان دۇرىس», دەدى ولجاس بەكتەنوۆ.
