قىزىلوردادا پروباتسيا ەسەبىندە تۇرعان سوتتالعان ازامات ەلەكتروندى باقىلاۋ قۇرىلعىسىن ماس كۇيىندە ءۇزىپ تاستاعانى ءۇشىن جازاسىنىڭ قالعان بولىگىن تۇرمەدە وتەيتىن بولدى.
قىزىلوردا قالالىق پروباتسيا قىزمەتىندە تىركەۋدە تۇرعان ر. ەسىمدى ازامات قر قىلمىستىق كودەكسىنىڭ 188-بابى 3-بولىگىنىڭ 3-تارماعى بويىنشا كىنالى دەپ تانىلىپ, 3 جىل 6 اي مەرزىمگە باس بوستاندىعىن شەكتەۋ جازاسىنا كەسىلگەن. وعان پروباتسيالىق باقىلاۋ ورناتىلىپ, ەلەكتروندى بىلەزىك تاعىلعان ەدى.
الايدا ول سوت بەلگىلەگەن مىندەتتەردى جۇيەلى تۇردە ورىنداماي, جازانى وتەۋ ءتارتىبىن بىرنەشە رەت بۇزعان. پروباتسيا قىزمەتكەرلەرىنىڭ ءتورت رەت بەرگەن ەسكەرتۋىنە دە قۇلاق اسپاعان.
– بۇل ازامات جازانى وتەۋ ءتارتىبىن بىرنەشە مارتە بۇزدى. سونىڭ ۇستىنە ماس كۇيىندە بولىپ, ەلەكتروندى قۇرىلعىسىن ءوز ەركىمەن ءۇزىپ تاستاعان. جۇرگىزىلگەن تاربيەلىك شارالار ناتيجە بەرمەگەن سوڭ, ءىس ماتەريالدارى سوتقا جولداندى. سوت قاۋلىسىمەن جازاسىنىڭ وتەلمەگەن بولىگى – 1 جىل 8 ايى – باس بوستاندىعىنان ايىرۋ جازاسىنا اۋىستىرىلىپ, قاجد مەكەمەسىنە جىبەرىلدى. جىل باسىنان بەرى جازانى وتەۋ ءتارتىبىن بىرنەشە رەت بۇزعان 18 سوتتالعان مەكەمەگە جىبەرىلدى, – دەدى مەكەمە قىزمەتكەرى گۇلنۇر بايساريەۆا.
