چەمپيوندار ليگاسى. «استانا» ىرىكتەۋ ءتۋرنيرىنىڭ پلەي-وفف باسەكەسىندە

استانا. 5 تامىز. بۇگىن ۋەفا چەمپيوندار ليگاسى ىرىكتەۋ ءتۋرنيرىنىڭ ءۇشىنشى راۋندىندا «استانا» فينليانديانىڭ حيك كومانداسىن قابىلدادى. «استانا-ارەنا» سپورت كەشەنىندە وتكەن كەزدەسۋدە الاڭ يەلەرى 4:3 ەسەبىمەن جەڭىسكە جەتىپ, ىرىكتەۋ ءتۋرنيرىنىڭ پلەي-وفف باسەكەسىنە جولداما الدى. بۇل تۋرالى egemen.kz حابارلادى. ەلوردالىقتار ويىندى وتە سۇرەڭسىز باستادى. ويىنشىلاردىڭ دەنەسى ءالى قىزىپ ۇلگەرمەگەن تۇستا قوناقتار ەسەپ اشىپ كەتتى. ماتچتىڭ 4-مينۋتىندا حيك-ءتىڭ شابۋىلشىسى وسمان دجاللوۋ مەرگەندىگىمەن كوزگە ءتۇستى. بۇل رەتتە ءبىزدىڭ قورعاۋشىلاردىڭ قاتەلىگىن ايتا كەتكەن ءجون. اپتا بۇرىن حەلسينكيدە وتكەن كەزدەسۋ 0:0 ەسەبىمەن اياقتالعان بولاتىن. سوعان بايلانىستى حيك-ءتىڭ «استانا-ارەنادا» سوققان ءار گولىنىڭ ءباسى جوعارى ەكەنى تۇسىنىكتى. سول سەبەپتى, «استانا» ويىنشىلارى كەلەسى اينالىمعا شىعۋ ءۇشىن تەك جەڭىسكە جەتۋى ءتيىس-ءتىن. ءوز قاقپالارىنا دوپ جىبەرىپ العاننان كەيىن استانالىقتار جيناقىلىق تانىتقانداي بولعان. الايدا, ماتچتىڭ 41-مينۋتىندا تاعى دا ورەسكەل قاتەلىك جىبەرىپ, قارسىلاستاردىڭ ەكىنشى رەت ءبىزدىڭ قاقپانى ءدال كوزدەۋىنە جول بەرىپ قويدى. اتاپ ايتقاندا, حيك ويىنشىلارىنىڭ ءبىرى ءبىزدىڭ ايىپ الاڭعا دوپتى اۋەلەتە اسىردى. پاستىڭ تىم جوعارى بولعانىن ەسكەرگەن الاڭ يەلەرى, سونىڭ ىشىندە قاقپاشى نەناد ەريچ سوڭىنا دەيىن ويناماي, توقتاپ قالدى. ال سوڭعى ساتكە دەيىن شابۋىلداعان دجاللوۋ تۋرا الاڭ سىزىعىنىڭ بويىنان دوپتى كەيىن قايتارىپ قانا قويماي, ءوز ارىپتەسىنە باسىمەن تاماشا پاس شىعارىپ بەردى. مۇنداي مۇمكىندىكتى ءمۇلت جىبەرمەگەن دجيدەن باا ەسەپتى ەسەلەدى. ۇزىلىسكە ءبىر مينۋت قالعان كەزدە «استانا» شابۋىلشىسى پاتريك تۆۋماسي ايىپ الاڭىنىڭ سىرتىنان سوققى جاساپ, ەسەپ ايىرماسىن قىسقارتتى. ەكىنشى تايمدى الاڭ يەلەرى وتە بەلسەندى باستادى. 46-مينۋتتا حيك ويىنشىلارىنىڭ ءبىرى ءوز ايىپ الاڭىندا قولىمەن ويناپ, ەرەجەگە قايشى ارەكەت جاسادى. كەزدەسۋدىڭ باس تورەشىسى الون ەفەت ويلانباستان ون ءبىر مەترلىك نۇكتەنى كورسەتتى. بۇل رەتتە تاماشا سوققىسىمەن كوزگە تۇسكەن روحەر كانياس تارازى باسىن تەڭەستىردى. ارادا 9 مينۋت ۋاقىت وتكەندە دميتري شومكو وتە ادەمى سوعىلعان گولدىڭ اۆتورى اتانىپ, «استانانى» ەسەپتە العا شىعاردى. كەزدەسۋدىڭ 70-مينۋتىندا تۆۋماسي الاڭنان قۋىلىپ, ءبىزدىڭ كوماندا قالعان ۋاقىتتا 10 ويىنشىمەن ويناۋعا ءماجبۇر بولدى. ءبىر فۋتبولشىسى ارتىق قوناقتار باسىمدىققا يە بولىپ, شابۋىل شەبىن كۇشەيتتى. ماتچتىڭ 86-مينۋتىندا دەگەندەرىنە جەتتى. تورەشى ەندى ءبىزدىڭ قاقپاعا پەنالتي بەلگىلەپ, ەرفان زەنەليدىڭ ناتيجەلى سوققى جاساۋىنا مۇمكىندىك بەردى. دەگەنمەن, العاشقى تايمداعى قاتەلىكتەن ناتيجە شىعارعان استانالىقتار 93-مينۋتتا ءتورتىنشى دوپتى سوعىپ, كلۋب تاريحىنداعى ماڭىزدى جەڭىسكە قول جەتكىزدى. بۇل جەڭىسىنەن كەيىن «استانا» كەم دەگەندە ەۋروپا ليگاسىنىڭ توپتىق كەزەڭىنە جولداما العانىن ايتا كەتەيىك. ۋەفا چەمپيوندار ليگاسى. ىرىكتەۋ ءتۋرنيرىنىڭ ءۇشىنشى راۋندى. «استانا» (استانا, قازاقستان) – حيك (حەلسينكي, فينليانديا) 4:3 (1:2) 5 تامىز. استانا. «استانا-ارەنا» سپورت كەشەنى. 20 000 كورەرمەن. تورەشىلەر: الون ەفەت, روي حاسسان, ساگي مازامبەر ء(بارى دە – يزاريل). «استانا»: نەناد ەريچ, مارين انيچيچ, برانكو يليچ (جۋنيور كابانانگا 46), ەۆگەني پوستنيكوۆ, نەمانيا ماكسيموۆيچ, گەورگي جۋكوۆ, تاڭات نوسەرباەۆ (ابزال بەيسەبەكوۆ 60), دميتري شومكو, روحەر كانياس, باۋىرجان جولشيەۆ, پاتريك تۆۋماسي. حيك: دانيەل ەرلۋند, دجيدەن باا, ماركۋس حەيككينەن, ۆالتتەري مورەن, راسمۋس شۋللەر, ەرفان زەنەلي, گي موۋسسي, سەباستيان سورسا, اتومۋ تاناكا, مايك حاۆەنار, وسمان دجاللوۋ. گولدار: پاتريك تۆۋماسي 44, روحەر كانياس 47, پەنالتي, دميتري شومكو 56, ەۆگەني پوستنيكوۆ 90+3 – وسمان دجاللوۋ 4, دجيدەن باا 41, ەرفان زەنەلي 86, پەنالتي. ەسكەرتۋلەر: برانكو يليچ 45 – ۆالتتەري مورەن 75. الاڭنان قۋىلدى: پاتريك تۆۋماسي 70. ەلامان قوڭىر. دەرەك: egemen.kz. سۋرەت: footboom.kz.