سۋرەت: senate.parlam.kz
كولىك, تسيفرلاندىرۋ, عىلىم مەن ءبىلىم بەرۋ سالالارىنداعى ءوزارا ءىس-قيمىلعا, سونداي-اق تۋريزم مەن مادەني بايلانىستاردى نىعايتۋعا دا ەرەكشە نازار اۋدارىلدى.
ۆيتسە-سپيكەر جاقىپ اسانوۆ العىسوزىندە تاجىكستاننىڭ جاقىن ءارى سەنىمدى سەرىكتەس رەتىندەگى ەرەكشە ءرولىن اتاپ ءوتتى. دەپۋتاتتىڭ ايتۋىنشا, ەكى حالىقتى تەرەڭ تاريحي جانە مادەني ورتاق قۇندىلىق بايلانىستىرادى.
«تاجىكستان بىزگە تەك ماڭىزدى ستراتەگيالىق ارىپتەس ەمەس, سونىمەن قاتار وتە جاقىن مەملەكەت جانە سەنىمدى وداقتاس. ەكى حالقىمىزدى عاسىرلار قويناۋىنان باستاۋ الاتىن دوستىق, ورتاق مادەنيەت پەن رۋحاني قۇندىلىقتار بىرىكتىرەدى. ەلدەرىمىز اراسىندا بارلىق دەڭگەيدە تىعىز ساياسي بايلانىس ورناعان, ەكونوميكالىق ىنتىماقتاستىق بەلسەندى دامىپ كەلەدى, مادەني-گۋمانيتارلىق قارىم-قاتىناستار دا نىعايىپ كەلەدى. مەملەكەت باسشىلارى بەلگىلەگەن تىعىز ءوزارا ءىس-قيمىلدىڭ جوعارى دەڭگەيى, ءسوزسىز, قازاقستان مەن تاجىكستاننىڭ زاڭ شىعارۋ ورگاندارى اراسىنداعى قاتىناستار ارقىلى دا ساقتالۋعا ءتيىس», دەدى ج.اسانوۆ.
ال تاجىك تاراپى پارلامەنتارالىق ديالوگتى ەكىجاقتى قاتىناستاردى دامىتۋداعى ماڭىزدى قۇرال رەتىندە اتاپ ءوتتى. مادجليسي ميللي مادجليسي ولي توراعاسىنىڭ ءبىرىنشى ورىنباسارى احمادزودا رادجاب ەكى ەل اراسىنداعى ءوزارا قۇرمەتكە, سەنىمگە جانە وڭىرلىك تۇراقتىلىق پەن تاتۋ كورشىلىك قاعيداتتارىنا نەگىزدەلگەن ىنتىماقتاستىقتىڭ ورنىقتى سەرپىنىن ەرەكشە اتادى.
جيىندا 2025–2027 جىلدارعا ارنالعان پارلامەنتارالىق ءوزارا ءىس-قيمىلدىڭ جاڭا «جول كارتاسى» ۇسىنىلدى. بۇل قۇجات ەكى ەل اراسىنداعى ىنتىماقتاستىقتى تەرەڭدەتۋگە باعىتتالعان ناقتى ءىس-شارالاردى قامتىپ, زاڭ شىعارۋشى ورگاندار دەڭگەيىندە ورنىقتى بايلانىستاردىڭ ودان ءارى دامۋىنا سەپتىگىن تيگىزەدى.
