سۋرەت: kaz.inform.kz
جاڭا جۇيە وسى جىلدىڭ 12 قازانىنان باستاپ, كەلەسى جىلدىڭ ساۋىرىنە دەيىن جۇمىس ىستەيدى.
EES (Entry/Exit System) ەۋروپالىق وداقتىڭ ورتالىقتاندىرىلعان بيومەتريالىق اقپاراتتىق جۇيەسى, شەنگەن ايماعىنىڭ شەكاراسىن كەسىپ وتەتىن ءۇشىنشى ەل ازاماتتارىنىڭ كىرۋ, شىعۋ (كەز كەلگەن 180 كۇندىك كەزەڭ ىشىندە 90 كۇنگە دەيىن) جانە كىرۋدەن باس تارتۋ فاكتىلەرىن اۆتوماتتى تۇردە تىركەۋگە ارنالعان. بۇل تسيفرلى جۇيە ءداستۇرلى تولقۇجات ءمورىنىڭ ورنىنا قولدانىلادى.
«EES شەكارادان ءوتۋ كۇنى مەن ورنى, ءوتۋ ساناتى (كىرۋ/شىعۋ/باس تارتۋ), بيومەتريالىق دەرەكتەر (12 جاستان اسقان ادامدار ءۇشىن ساۋساق ىزدەرى جانە بەت الپەتتىڭ سۋرەتى), جەكە باسىن كۋالاندىراتىن قۇجات (پاسپورت) سەكىلدى دەرەكتەردى جيناپ, ساقتايدى. مۇنداعى اقپارات ءۇش جىلعا دەيىن ساقتالادى. EES ۆيزاسى بار, ۆيزادان بوساتىلعان ازاماتتارعا دا قولدانىلادى جانە ەو كوشى-قون ەرەجەلەرىنىڭ ساقتالۋىن باقىلاۋدى كۇشەيتۋگە باعىتتالعان», دەلىنگەن ەۋروپالىق كوميسسيانىڭ رەسمي سايتىندا.
EES جۇيەسىن ەۋرووداقتىڭ يرلانديا مەن كيپردەن باسقا بارلىق ەلدەرى قولدانادى. سونداي-اق ەو قۇرامىنا كىرمەيتىن, بىراق شەنگەن ايماعىن بولىسەتىن نورۆەگيا, يسلانديا, شۆەيتساريا, ليحتەنشتەين جاڭا جۇيەنى پايدالانادى. جالپى 29 ەل وسى جۇيەگە قوسىلماق.
نەگىزى بۇل تسيفرلاندىرىلعان جۇيە وتكەن جىلدىڭ قاراشاسىندا ىسكە قوسىلادى دەپ جوسپارلانعان. گەرمانيا, فرانتسيا, نيدەرلاند سەكىلدى ەلدەر دايىن بولماي, كەيىنگە شەگەرىلگەن. مۇنى ىسكە اسىرۋ ءار ەلدىڭ لوگيستيكالىق جانە تەحنيكالىق دايىندىعىنا بايلانىستى كەزەڭ-كەزەڭىمەن جۇزەگە اسىرىلادى. «شەكارا ورگاندارى شەكارادان وتكەن ءۇشىنشى ەل ازاماتتارىنىڭ دەرەكتەرىن كەزەڭ-كەزەڭىمەن تىركەپ, EES بارلىق شەكارالىق وتكىزۋ پۋنكتتەرىندە تولىعىمەن ورنالاستىرىلادى», دەپ ءتۇسىندىردى بريۋسسەلدە ەۋروكوميسسيانىڭ كوشى-قون ماسەلەلەرى جونىندەگى كوميسسارى ماگنۋس برۋننەر.
EES ەو-عا كىرمەيتىن ەلدەردىڭ بارلىق ازاماتتارىنا, سونىڭ ىشىندە ۆيزاسىز كىرە الاتىن اقش, ۇلىبريتانيا, سەربيا, گرۋزيا سەكىلدى ەلدەردىڭ ازاماتتارىنا قاتىستى. ءتارتىپ بۇزاتىندارعا كەلەسى جولى شەنگەن ايماعىنداعى ەلدەرگە كىرۋگە تىيىم سالىنۋى مۇمكىن.
وسىلايشا ەك قۇجاتتار مەن جەكە باسىن كۋالاندىراتىن الاياقتىق جاعدايلارىن جۇيەلى تۇردە انىقتاپ, زاڭسىز كوشى-قوننىڭ الدىن الۋعا, ەو ازاماتتارىنىڭ قاۋىپسىزدىگىن قامتاماسىز ەتۋگە ىقپال ەتەدى دەپ سەنىم ءبىلدىرىپ وتىر. سونداي-اق ەك ساياحاتشىلاردىڭ جەكە دەرەكتەرىن قورعاۋعا كەپىلدىك بەرىپ, قۇپيالىلىق قاتاڭ ساقتالادى دەپ مالىمدەدى.
