قىزىلوردادا ءموبيلدى بال پاۆيلونى جۇمىس ىستەيدى

قىزىلوردا. 5 تامىز. قىزىلوردادا ءموبيلدى بال پاۆيلونى جۇمىس ىستەيدى. جوبانى جۇزەگە اسىرۋعا وبلىستىق كاسىپكەرلەر پالاتاسى كومەكتەستى. بۇل تۋرالى egemen.kz ءتىلشىسى حابارلادى. بال اراسىن ءوسىرۋدى ءوزىنىڭ سۇيىكتى ىسىنە اينالدىرعان قىزىلوردالىق باحىت ايتماعانبەتوۆ «جۇمىسپەن قامتۋ – 2020 جول كارتاسى» باعدارلاماسىمەن تانىسىپ, كەڭەس الۋ ماقساتىندا كاسىپكەرلەر پالاتاسىنا كەلەدى. ونداعىلار الدىمەن كاسىپكەرگە مەملەكەتتىك قولداۋ تۇرلەرىنە قاتىستى كەڭەس بەرىپ, سودان كەيىن بيزنەس جوسپارىن ازىرلەۋگە كومەكتەسكەن. جوبا «اۋىل شارۋاشىلىعىن قارجىلاي قولداۋ قورى» ارقىلى قارجىلاندىرىلدى. قازىرگى ۋاقىتتا كاسىپكەر  شەڭگەلدىڭ بالشىرىنىن جينايتىن جەرگىلىكتى سارى ارالاردى وسىرۋدە. جالپى, ايماقتا بال ارا شارۋاشىلىعىمەن اينالىسۋشىلار سانى كوپ ەمەس. وسى رەتتە, باقىت ايتماعانبەتوۆ سكايپ ارقىلى رەسەي, ۋكرايناداعى ارىپتەستەرىمەن حابارلاسىپ, كەڭەس الىپ وتىرادى. ەرجان بايتىلەس. دەرەك, سۋرەت: egemen.kz.