كەزدەسۋ بارىسىندا قوسىلعان قۇن سالىعى, كورپوراتيۆتىك جانە جەكە تابىس سالىعىنا قاتىستى وزگەرىستەرگە ەرەكشە نازار اۋدارىلدى. قاتىسۋشىلارعا ەكى جىلدان استام ۋاقىت بويى ازىرلەنگەن جاڭارتىلعان كودەكستىڭ باستى تۇجىرىمدامالارى تانىستىرىلدى. اتاپ ايتقاندا, ەسەپ بەرۋ نىساندارىن وڭايلاتۋ جانە ەسەپتىلىكتى ازايتۋ, ارنايى سالىق رەجىمىن جاڭارتۋ, سالىق سالۋ تاسىلدەرىن قايتا قاراۋ, اۋىل شارۋاشىلىعى تاۋار وندىرۋشىلەرى ءۇشىن ققس جەڭىلدىكتەرىن 70%-دان 80%-عا دەيىن ۇلعايتۋ, جوسپارلى سالىق تەكسەرۋلەرىن الىپ تاستاۋ, سونداي-اق سالىق ەسەپتىلىگىن قايتارىپ الۋعا تىيىم ەنگىزۋ اڭگىمە ارقاۋىنا اينالدى.
«كاسىپكەرلەردەن, «اتامەكەن» ۇلتتىق كاسىپكەرلەر پالاتاسىنان جانە سالالىق قاۋىمداستىقتاردان كوپتەگەن ۇسىنىس ءتۇستى. سەناتتا كودەكستى پىسىقتاۋ كەزىندە ولاردىڭ باسىم بولىگى ەسكەرىلدى. ءبىزدىڭ مىندەتىمىز – زاڭداردى قابىلداپ قانا قويماي, ولاردىڭ تاجىريبەدە ءتيىمدى قولدانىلۋىن قامتاماسىز ەتۋ. ءبىز نورمالاردىڭ ورىندالۋىن قاداعالاۋدى جالعاستىرىپ, ۇكىمەتپەن بىرگە قوسالقى اكتىلەردى ازىرلەۋگە قاتىسامىز», دەدى ە.بولگەرت.
سونداي-اق سەنات ماجىلىسكە جىبەرگەن تۇزەتۋلەر تۋرالى دا اقپارات بەرىپ, پارلامەنت بيزنەستى جاڭا سالىقتىق رەتتەۋ جاعدايلارىنا كوشۋ ۇدەرىسىندە قولداۋ ءۇشىن كاسىپكەرلەرمەن اشىق ديالوگتى جالعاستىرا بەرەتىنىن ايتتى.
سەناتورلاردىڭ ايماققا ساپارلارى اياسىندا دەپۋتاتتار سەرىك شايداروۆ پەن سوۆەتبەك مەدەۋباەۆ ۇلىتاۋ وبلىسىنداعى ينفراقۇرىلىمدىق جانە الەۋمەتتىك ماڭىزى بار نىسانداردىڭ جاعدايىمەن تانىستى. ولار ساتباەۆ قالاسىنداعى «Kazakhmys Distribution» جشس-نا قاراستى №1 جىلۋ ەلەكتر ورتالىعىنا بارىپ, ستانسانىڭ قازىرگى جۇمىسى, وندىرىستىك ۇدەرىستەرى مەن جابدىقتارىنىڭ جاي-كۇيى, سونداي-اق ءۇشىنشى كوتەرىلىمدەگى سورعى ستانساسى مەن №1 ماگيسترالدى جىلۋ جەلىسىن جاڭعىرتۋ جوبالارىنىڭ جۇزەگە اسىرىلۋى جونىندە اقپارات الدى.
ساپار بارىسىندا حالىقتى ساپالى اۋىزسۋمەن قامتاماسىز ەتۋ ماسەلەسى دە باستى نازاردا بولدى. سەناتورلار «ۋيتاس-ايدوس» سۋ العىشىنداعى ەكىنشى كوتەرىلىمدەگى سورعى ستانساسىن جاڭعىرتۋ جانە جەزقازعان قالاسىنداعى شارۋاشىلىق-اۋىزسۋ تازارتۋ جۇيەسى سۋ قۇبىرىنىڭ قۇرىلىسى بارىسىمەن تانىستى.
سونداي-اق جەزقازعان قالاسىندا «Kazakhmys Energy» جشس-نا قاراستى جىلۋ ەلەكتر ورتالىعىندا بولىپ, الداعى جىلىتۋ ماۋسىمىنا دايىندىق بارىسىن كوردى. بۇدان بولەك, شارۋاشىلىق-اۋىزسۋ تازارتۋ نىساندارىنىڭ جاي-كۇيىنە جانە كەڭگىر سۋ قويماسىنىڭ ەكولوگيالىق جاعدايىنا ەرەكشە كوڭىل ءبولىندى.
«جىلىتۋ ماۋسىمىنا دايىندىق – حالىقتىڭ ءومىر ساپاسىنا تىكەلەي اسەر ەتەتىن ماسەلە. اسىرەسە ساتباەۆ جىلۋ ستانساسىندا ءتۇتىن گازدارىن تازارتۋ جۇيەسىنىڭ ورناتىلىپ جاتقانى ماڭىزدى. بۇعان دەيىن بىزگە قالا تۇرعىندارىنان ەكولوگيالىق جاعدايعا بايلانىستى الاڭداۋشىلىق بىلدىرگەن وتىنىشتەر تۇسكەن. بۇگىنگى قابىلدانىپ جاتقان شارالار – سول سۇرانىستارعا جاۋاپ ءارى زياندى قالدىقتاردى ازايتۋ جولىنداعى ناقتى قادام», دەدى س.مەدەۋباەۆ.
سونىمەن قاتار سەناتورلار وبلىستىق ءماسليحاتتىڭ تۇراقتى كوميسسياسىنىڭ وتىرىسىنا قاتىسىپ, سەناتتىڭ زاڭ شىعارۋ قىزمەتى تۋرالى بايانداپ, وڭىرلىك ماسەلەلەردى شەشۋدە جان-جاقتى قولداۋ كورسەتۋگە دايىن ەكەندەرىن ءبىلدىردى.
