فورۋم قازاقستان حالقى اسسامبلەياسىنىڭ «ەلدەسۋ جانە تاتۋلاسۋ» جوباسى اياسىندا 28 شىلدە مەن 8 تامىز ارالىعىندا ءوتىپ جاتقان ەتنومەدياتسياعا ارنالعان اقپاراتتىق-اعارتۋشىلىق مارافوننىڭ باستى باسقوسۋى سانالادى. مارافون باعدارلاماسىنا ساي كوشپەلى ترەنينگتەر, دوڭگەلەك ۇستەلدەر, پودكاستتار مەن ەتنومەدياتسياعا ارنالعان اۆتورلىق ارنايى كۋرستىڭ تانىستىرىلىمدارى وتكىزىلەدى.
فورۋمعا ماڭعىستاۋ وبلىسىنىڭ اكىمى ن.قيلىباي, پرەزيدەنت اكىمشىلىگى قحا حاتشىلىعىنىڭ مەڭگەرۋشىسى م.ءازىلحانوۆ, سونداي-اق رەسپۋبليكالىق, وڭىرلىك ەتنومەدياتسيا ورتالىقتارىنىڭ جەتەكشىلەرى, ەلىمىزدىڭ ءار وڭىرىنەن كەلگەن دەلەگاتتار, ەتنومەدياتورلار, اقساقالدار مەن انالار كەڭەسىنىڭ مۇشەلەرى, ۇكىمەتتىك ەمەس ۇيىم وكىلدەرى مەن ءماسليحات دەپۋتاتتارى, جەرگىلىكتى مەملەكەتتىك ورگان وكىلدەرى قاتىستى.
قازاقستان حالقى اسسامبلەياسىنىڭ ءحححىV سەسسياسىندا پرەزيدەنت ق.توقاەۆ: «قازاقستان رەسپۋبليكاسىنىڭ مادەنيەت جانە اقپارات, ىشكى ىستەر, ادىلەت مينيسترلىكتەرى مۇددەلى مەملەكەتتىك ورگاندارمەن, استانا, الماتى, شىمكەنت قالالارىنىڭ, وبلىستاردىڭ اكىمدەرىمەن بىرلەسىپ, قازاقستان حالقى اسسامبلەياسىنىڭ ەتنومەدياتسيا سالاسىنداعى جۇمىسىنا جان-جاقتى قولداۋ كورسەتسىن, «ەلدەسۋ جانە تاتۋلاسۋ» جوباسىنىڭ اۋقىمىن كەڭەيتسىن», دەپ تاپسىرما بەرگەن بولاتىن. سونداي-اق مەملەكەت باسشىسى: «ەتنوسارالىق تۇسىنىسپەۋشىلىكتەردىڭ الدىن الۋدا ماڭىزدى ءرول اتقاراتىن قحا-نىڭ ەتنومەدياتسيا ينستيتۋتىنا توقتالعىم كەلەدى. كەيىنگى ۋاقىتتا اسسامبلەيا قىزمەتىندەگى ساراپشىلىق قۇرامنىڭ ساپاسى جاڭا دەڭگەيگە كوتەرىلدى», دەپ اتاپ ءوتتى.
«مەملەكەت باسشىسى قاسىم-جومارت توقاەۆتىڭ بۇۇ باس حاتشىسى انتونيۋ گۋتەرريشپەن كەزدەسۋىندە باس حاتشى قازاقستانداعى ەتنوسارالىق تاتۋلىق پەن قوعامدىق اۋىزبىرشىلىككە جوعارى باعا بەردى. ءبىز ءبىر-بىرىمىزگە قولداۋ كورسەتىپ, ورتاق ماقساتقا جۇمىلساق قانا ءوڭىرىمىزدىڭ, ەلىمىزدىڭ الەۋەتىن ارتتىرا الامىز. اۋىزبىرشىلىك پەن ءوزارا تۇسىنىستىك بار جەردە عانا ناتيجە دە, دامۋ دا بولادى. سوندىقتان ىنتىماعىمىزدى بەكەمدەپ, ونى بارىنشا دامىتۋىمىز كەرەك», دەدى ماڭعىستاۋ وبلىسىنىڭ اكىمى ن.قيلىباي.
پرەزيدەنت اكىمشىلىگى قحا حاتشىلىعىنىڭ مەڭگەرۋشىسى م.ءازىلحانوۆ ۇلتارالىق تاتۋلىقتى ساقتاۋ, قازىرگى قوعامداعى كەزدەسەتىن كەيبىر ماسەلەلەر مەن ولاردىڭ الدىن الۋ, اتقارىلعان جۇمىستار مەن الداعى جوسپارلار تۋرالى كەڭىنەن باياندادى. ماڭعىستاۋ وبلىستىق ءماسليحاتىنىڭ حاتشىسى, قازاقستان حالقى اسسامبلەياسىنىڭ وڭىرلىك ەتنومەدياتسيا كەڭەسىنىڭ توراعاسى, فورۋم مودەراتورى ج.ماتاەۆ مەملەكەت دامۋىنداعى ەتنومەدياتسيانىڭ ماڭىزىنا, جەرگىلىكتى دەڭگەيدە اتقارىلعان بىرقاتار جۇمىستارعا توقتالدى.
پرەزيدەنت جانىنداعى مەملەكەتتىك باسقارۋ اكادەمياسىنىڭ ۆيتسە-رەكتورى ءا.ماساليموۆانىڭ «قحا ەتنومەدياتسيا ينستيتۋتىن دامىتۋداعى مەملەكەتتىك باسقارۋ اكادەمياسى» تاقىرىبىنداعى, مادەنيەت جانە اقپارات مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى ج.ءالجانوۆانىڭ «مەدياتسيانى دامىتۋدىڭ نەگىزگى تاسىلدەرى» تاقىرىبىنداعى, وزگە دە قاتىسۋشىلاردىڭ ماڭىزدى باياندامالارى تىڭدالىپ, وڭىرلەردەگى ەتنومەدياتسيا ينستيتۋتىنىڭ دامۋ تاجىريبەسى, ەتنوسارالىق قاتىناستاردى رەتتەۋدەگى ءتيىمدى ادىستەر مەن پراكتيكالىق كەيستەر, ەتنومەدياتورلاردىڭ كاسىبي دايارلىعى مەن وقىتۋ باعدارلامالارىنىڭ ءرولى ءسوز بولدى. قاتىسۋشىلار ەتنوسارالىق جانجالداردىڭ الدىن الۋ الگوريتمدەرى, قوعاممەن سىندارلى ءوزارا ءىس-قيمىل جاساۋ جولدارى, حالىقارالىق تاجىريبەلەر, ەلىمىزدە مەدياتسيانى دامىتۋعا ارنالعان نەگىزگى تاسىلدەر تۋرالى پىكىر الماستى.
ەلىمىزدىڭ ءار وڭىرىندە فورۋم وتكىزۋدى داستۇرگە اينالدىرعان اسسامبلەيالىقتاردىڭ بۇل ماڭعىستاۋدا ەكىنشى رەت باسقوسۋى. سول تۇرعىدا بۇل باعىتتا ماڭعىستاۋ وبلىسىندا اتقارىلعان جۇمىستار بارىسى تانىستىرىلدى. توقتالار بولساق, وڭىردە ەتنومەدياتسيا باعىتىندا جۇزەگە اسىپ جاتقان جوبانىڭ ءبىرى – «اسسامبلەيا. پارلامەنت. ءماسليحات» جوباسى.
– جوبا شەڭبەرىندە ماڭعىستاۋ وبلىستىق ءماسليحاتى قازاقستان حالقى اسسامبلەياسىمەن تىعىز بايلانىستا جۇمىس جۇرگىزىپ جاتىر. اتالعان جوبا اياسىندا وبلىس, اۋدان, قالا دەپۋتاتتارىنان قحا-نىڭ دەپۋتاتتىق توبى قۇرىلىپ, اتالعان توپتىڭ جۇمىس جوسپارىنا سايكەس ەتنومەدياتورلارمەن بىرلەسكەن قابىلداۋ جۇرگىزىلىپ كەلەدى. بيىل اقتاۋ قالاسىنىڭ تۇركى الەمىنىڭ مادەني استاناسى بولۋىنا وراي, ماڭعىستاۋ وبلىسىنىڭ ەتنومەدياتسياسىن دامىتۋ, شەتەلدەگى ارىپتەستەرمەن تاجىريبە الماسۋ جۇمىستارى جوسپارلاندى. الماتى قالا-
سىندا ۇلتتىق قاۋىپسىزدىك كوميتەتى اكادەمياسى بازاسىندا از ۋاقىت ارالىعىندا 6 ەتنومەدياتور ءوز بىلىكتىلىكتەرىن شىڭدادى. سونداي-اق ەتنومەدياتورلاردىڭ بىلىكتىلىگىن ارتتىرۋ ماقساتىندا 30 ەتنومەدياتور جالپى جانە ارنايى كۋرستاردان ءوتىپ, «پاراسات» مەدياتسيا جانە قۇقىق ورتالىعىنىڭ سەرتيفيكاتىن الدى, – دەدى ماڭعىستاۋ وبلىستىق ءماسليحاتىنىڭ حاتشىسى, قازاقستان حالقى اسسامبلەياسىنىڭ وڭىرلىك ەتنومەدياتسيا كەڭەسىنىڭ توراعاسى ج.ماتاەۆ.
«ەلدەسۋ جانە تاتۋلاسۋ» جوباسى اياسىندا جەرگىلىكتى قۇقىق قورعاۋ ورگاندارىمەن تىعىز بايلانىستا جۇمىس جۇرگىزۋ دە دۇرىس جولعا قويىلعان. فورۋم بارىسىندا ەتنومەدياتسيانى بەيبىت ديالوگتىڭ ءتيىمدى قۇرالى رەتىندە دامىتۋ, مەدياتورلاردى دايارلاۋ, قۇقىقتىق اعارتۋ, ۆەدومستۆوارالىق ىنتىماقتاستىقتى جەتىلدىرۋ ماسەلەلەرى قاراستىرىلىپ, «جالپى مەدياتسيا كۋرسى» بويىنشا سەرتيفيكاتتالعان وقىتۋ ناتيجەلەرى مەن «ەتنوسارالىق سالاداعى قاقتىعىستاردىڭ الدىن الۋ جانە ولاردى رەتتەۋ جونىندەگى مەدياتسيا» (ەتنومەدياتسيا) تاقىرىبىنداعى ارنايى كۋرستىڭ تۇساۋكەسەرى, وڭىرلىك تاجىريبەلەر مەن ساراپشىلاردىڭ باياندامالارى قامتىلاتىن پانەلدىك سەسسيا ۇيىمداستىرىلدى.
فورۋمدا ەتنوسارالىق تاتۋلىق پەن قوعامدىق كەلىسىمدى نىعايتۋعا قوسقان ۇلەسى ءۇشىن بىرقاتار ازامات قازاقستان حالقى اسسامبلەياسىنىڭ ارنايى ماراپاتتارىنا يە بولدى.
اسسامبلەيانىڭ جۇمىسى, ەتنومەدياتورلاردىڭ دەڭگەيى جينالىستار مەن ماراپاتتار كولەمىنەن ەمەس, ەل اراسىنداعى الاۋىزدىقتى اۋىزدىقتاۋىنان, ۇلتتىق ار-نامىسقا ءتىل تيگىزۋشىلەردى تارتىپكە سالۋىنان, كەرەك دەسە زاڭعا ساي ءتيىستى جازاسىن بەرۋدەن كورىنەدى. سوندىقتان اتالعان ۇيىمنىڭ بەلسەندىلىگى مەن بەدەلى ءاردايىم سىن ساتىسىندا تۇرادى.
ماڭعىستاۋ وبلىسى
