وندا كولىك ءمينيسترى نۇرلان ساۋرانباەۆ, قارجى ءمينيسترىنىڭ مىندەتىن اتقارۋشى ەرجان ءبىرجانوۆ, ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى ەرلان الداجۇمانوۆتىڭ باياندامالارى تىڭدالدى.
قارجى مينيسترلىگىنىڭ مالىمەتىنشە, بيىلعى جوسپاردا ەۋرازيالىق ەكونوميكالىق وداقتىڭ سىرتقى شەكارالارىنداعى (قحر, وزبەكستان رەسپۋبليكاسى, تۇرىكمەنستان) 9 وتكىزۋ پۋنكتىن رەكونسترۋكتسيالاۋ جۇمىستارى تۇر. بۇگىندە ولاردىڭ 4-ەۋىندە: قاپلانبەك, اتامەكەن, قالجات, الاكول پۋنكتتەرىندە جۇمىستار اياقتالدى. بەس نىساندى جاڭعىرتۋ جۇمىستارى جىل سوڭىنا دەيىن ءوز مارەسىنە جەتپەك. «جىبەك جولى» جولاۋشىلار وتكىزۋ پۋنكتىن رەكونسترۋكتسيالاۋ جوسپاردان تىس جۇرۋدە, اياقتالۋى كەلەسى جىلدىڭ ءبىرىنشى جارتىجىلدىعىندا كوزدەلىپ وتىر.
جاڭعىرتۋ جۇمىستارى كەزىندە التى جولاقتى كىرمە جولدار, ەلەكتروندىق قاداعالاۋ جۇيەلەرىمەن قوسا العاندا, بارلىق قىزمەت ءۇشىن بىرىڭعاي ينفراقۇرىلىم قۇرۋدى كوزدەيتىن جاعداي جاساۋعا باسا نازار اۋدارىلدى.
باياندامالاردى تىڭداعان پرەمەر-مينيستر كەدەن قىزمەتىنىڭ, سونداي-اق رەسەي فەدەراتسياسى مەن قىرعىزستان رەسپۋبليكاسى شەكارالارىنداعى اۆتوموبيل وتكىزۋ پۋنكتتەرىن جوندەۋ مەرزىمدەرىنىڭ كەشىكتىرىلۋىنە بايلانىستى سالالىق مينيسترلىكتەر جۇمىسىن سىنعا الدى.
ولجاس بەكتەنوۆ قارجى مينيسترلىگى مەملەكەتتىك كىرىستەر كوميتەتى مەن كولىك مينيسترلىگى اۆتوموبيل جولدارى كوميتەتىنىڭ توراعالارىن جۇمىستى ءتيىستى دەڭگەيدە ۇيىمداستىرماعانى ءۇشىن جاۋاپكەرشىلىككە تارتۋدى تاپسىردى.
سونىمەن قاتار مينيسترلىكتەردىڭ جاۋاپتى باسشىلارى جەرگىلىكتى جەرلەردە جۇمىستى ۇيلەستىرۋ ءۇشىن وڭىرلەرگە جىبەرىلدى.
كەدەن قىزمەتىنىڭ كادر قۇرامىنا, اسىرەسە وتكىزۋ پۋنكتتەرىنە قاتىستى تالاپتاردى قاتاڭداتۋ, سونداي-اق جابدىقپەن جاراقتاندىرۋ جانە ينتەرنەت جەلىسىنە قولجەتىمدىلىكتى قامتاماسىز ەتۋ ماسەلەلەرى بويىنشا مىندەتتەر قويىلدى.
كولىك, قارجى مينيسترلەرىنە وتكىزۋ پۋنكتتەرىن رەكونسترۋكتسيالاۋ بارىسى تۋرالى پرەمەر-مينيسترگە اپتا سايىن ەسەپ بەرۋ تاپسىرىلدى.
