سۋرەت: atr.kz
جول ءتورت جىلدا جوندەلەدى
«وڭىردە جول ينفراقۇرىلىمى جۇرگىزىلمەگەن ەلدى مەكەندەر قىزىلقوعا, يساتاي جانە قۇرمانعازى اۋدانىندا بار. قىزىلقوعا اۋدانىنىڭ ورتالىعى – ميالىدان تايسويعان اۋىلىنا باراتىن جولدىڭ قۇرىلىسى اياقتالدى. ال يساتاي اۋدانىندا قىزىلۇي جانە جاسقايرات اۋىلدارىنا جول سالۋ قاجەت. قىزىلۇي اۋىلىنا دەيىنگى جولدى سالاتىن مەردىگەر انىقتالدى. بيىل جول قۇرىلىسى باستالادى», دەيدى سەرىك شاپكەنوۆ.
اكىم دەرەگىنە قاراعاندا, قۇرمانعازى اۋدانىنداعى № 7 رازەزد-اسان-بالقۇدىق-سۇيىندىك باعىتىنا قاتىنايتىن جولدىڭ ۇزىندىعى – 282 شاقىرىم. جولدىڭ كەيبىر تۇسىندا سور بار. كەي اۋماعىن قۇم كومكەرگەن.
«قۇرمانعازى اۋدانىنىڭ ازعىر وڭىرىندەگى اۋىلداردا 7 مىڭعا جۋىق ادام تۇرادى. بۇل اۋىلدارعا باراتىن جول كەڭەس داۋىرىندە دە سالىنبادى. بيىل سول جولدىڭ 0-36 شاقىرىمى ارالىعىن جوندەۋدى باستاپ, كەلەسى جىلى ءبىتىرۋىمىز كەرەك. بىراق جولدىڭ بويىندا سور جانە قۇمدى جەرلەر بار. سوندىقتان تەحنيكالىق شەشىمدەردى كۇتىپ قالدىق», دەدى.
جوباعا سايكەس, جول قۇرىلىسىن ءتورت كەزەڭگە ءبولۋ ۇيعارىلىپتى: العاشقىسى – 0-36 شاقىرىم ارالىعى, ەكىنشىسى – 36-98, ءۇشىنشىسى – 98-180, سونان سوڭ 180-282 شاقىرىمىن جوندەۋ كوزدەلىپ وتىر. قازىر ءبىرىنشى كەزەڭگە سايكەس, 10 شاقىرىم جولدا جۇمىس ءجۇرىپ جاتىر. جولدىڭ نەگىزگى تابانى قىرىلىپ-تەگىستەلىپ, اسفالت توسەۋگە دايىندالىپتى.
رەسەيگە تىكە شىعاتىن جول سالىنۋى مۇمكىن
بولاشاقتا كورشىلەس باتىس قازاقستان وبلىسىنىڭ رەسەيمەن شەكاراسىنداعى وتكىزۋ پۋنكتىنە دەيىن جول سالۋ جايى ويلاستىرىلىپ جاتىر.
ء«بىز سۇيىندىك اۋىلىنا دەيىن سوزىلاتىن جولدان تىكەلەي شەكاراداعى وتكىزۋ پۋنكتىنە جول سالۋ ماسەلەسىنە نازار اۋدارىپ وتىرمىز. بۇل جوسپارىمىزدى ىسكە اسىرا الساق, كورشى ەلمەن بايلانىستى ودان ءارى جانداندىراتىن كۇرەتامىر بولار ەدى. بىراق بۇل ماسەلەنى وڭ شەشۋ تەك وزىمىزگە عانا بايلانىستى ەمەس. سول سەبەپتى, ازعىر وڭىرىنەن رەسەي شەكاراسىنا دەيىن تىكەلەي جول سالۋدى استراحان وبلىسىنىڭ باسشىلارىمەن كەزدەسۋدە كوتەردىم», دەدى س.شاپكەنوۆ.
اۋىزسۋ تاپشىلىعى تۋىنداي ما؟
ءوڭىر باسشىسىنىڭ پىكىرىنشە, كورشى ەلمەن شەكاراداعى اۋىلداردىڭ تۇيتكىلى تەك جول ماسەلەسىمەن شەكتەلمەيدى. ەلەكتر ەنەرگياسى دا كورشى ەلدەن الىنادى.
«قازىر قوياندى سۋ قۇبىرىمەن ازعىر وڭىرىندەگى اۋىلدارعا اۋىزسۋ بەرىلەدى. بولاشاقتا سۋ تاپشىلىعى بولۋى مۇمكىن دەگەن ماسەلە تۋىنداپ وتىر. سوندىقتان وڭىردەگى قوياندى, تايسويعان جەراستى سۋ كوزدەرىنە زەرتتەۋ جۇرگىزۋدى, ماسەلەن, قوسىمشا ۇڭعىمالار قازۋدى قاراستىرا باستادىق. بۇل ءبىر جاعىنان شەكاراداعى اۋىلداردا تۇرعىنداردىڭ الەۋمەتتىك جاعدايىنا ىقپال ەتەدى. ەكىنشىدەن, شەكاراداعى اۋىلداردان تۇرعىنداردىڭ كوشىپ كەتۋىنە توقتاۋ سالادى. شەكاراداعى اۋىلداردى بوس قالدىرماۋ ءۇشىن تۇرعىندارعا جاعداي جاساۋىمىز قاجەت», دەيدى وبلىس اكىمى.
قۇرمانعازى اۋدانىنداعى قوياندى كەن ورنىنان جەراستى سۋى 10-27 مەتر تەرەڭدىكتەن الىنادى. مۇندا ۇڭعىمالاردىڭ دەبيتى – 2,3-5,4 ليتردەن 8 ليترگە دەيىن. سۋدىڭ مينەرالدىلىعى 0,4-1,5-تەن 1,7-4,7 گ/ليترگە دەيىن قۇبىلىپ تۇرادى. كەن ورنىندا بۇرىن سۋ بەرەتىن 16 ۇڭعىما بولعان. ودان تاۋلىگىنە 7,2 مىڭ تەكشە مەتر سۋ الىنعان ەكەن. ال 2023 جىلى قوياندى توپتىق سۋ قۇبىرى ءۇشىن 6 ۇڭعىما قازىلعان. بۇل قۇبىرمەن بالقۇدىق, سۇيىندىك, ازعىر, اسان اۋىلدارىنا سۋ جەتكىزىلەدى. اكىمدىك مالىمەتىنشە, سۇيىندىك, اسان, ۇشتاعان اۋىلدارىنا ماگيسترالدى سۋ قۇبىرىنىڭ جەلىسى جۇرگىزىلگەن.
اتىراۋ وبلىسى
