ۇزدىك گەوگرافتار
وتكەن اپتادا وزات وقۋشىلارىمىز IGeO–2025 حالىقارالىق گەوگرافيا وليمپياداسىندا تاريحي جەتىستىككە قول جەتكىزىپ, ءتورت مەدالدى جەڭىپ الدى. تايلاندتا وتكەن بۇل بايقاۋدىڭ ناتيجەسىندە ءبىزدىڭ بالالار ەكى التىن, ەكى كۇمىس مەدالدى ولجالاپ, اتالعان سايىسقا قاتىسقان 47 مەملەكەتتىڭ اراسىندا جالپىكوماندالىق ەسەپتە ەكىنشى ورىندى يەلەندى.
بۇل – ۇلكەن جەتىستىك. قاراعاندى وبلىسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى تالعات بايبوسىنوۆ پەن قوستاناي وبلىسىنداعى نازارباەۆ زياتكەرلىك مەكتەبىنىڭ 10-سىنىپ وقۋشىسى اندرەي ەنباحتوۆ التىننان القا تاقسا, اقتوبە وبلىسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ءاليحان قالماعامبەتوۆ پەن جەتىسۋ وبلىسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى بولات اقجول كۇمىس مەدالعا قول جەتكىزىپ, ەل مەرەيىن اسقاقتاتتى. ولارعا جەتەكشىلىك ەتكەن – حالىقارالىق, رەسپۋبليكالىق وليمپيادالاردىڭ جەڭىمپازدارى اباي دۇيسەن مەن رۋستام ۋاليەۆ. سايىستىڭ بارلىق كەزەڭىنە ۇلتتىق قۇرامانى دايىنداۋدى رەسپۋبليكالىق عىلىمي-پراكتيكالىق «دارىن» ورتالىعى ۇيىمداستىردى.
ايتا كەتەيىك, قازاقستان IGeO وليمپياداسىنا 2012 جىلدان بەرى قاتىسىپ كەلەدى. وسى ۋاقىت ارالىعىندا ءبىزدىڭ وقۋشىلار 5 التىن, 4 كۇمىس جانە 7 قولا مەدالدى جەڭىپ العان.
ينفورماتيكا مىقتىلارى
بوليۆيانىڭ سۋكرە قالاسىندا وتكەن IOI–2025 حالىقارالىق ينفورماتيكا وليمپياداسىندا وزات وقۋشىلارىمىز ءتورت مەدالعا قول جەتكىزىپ, 87 مەملەكەتتىڭ اراسىنان جالپىكوماندالىق ەسەپتە 14-ورىننىڭ تۇعىرىنان كورىندى.
ەكى كەزەڭنىڭ قورىتىندىسىندا قازاقستان قۇراماسى ءۇش كۇمىس, ءبىر قولا مەدالدى قانجىعالادى. اتاپ ايتار بولساق, سەمەي قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى اكەجان اسقار, الماتى قالاسىنداعى فيزيكا-ماتەماتيكا مەكتەبىنىڭ 11-سىنىپ وقۋشىسى ماكسيم تسوي, قىزىلوردا وبلىسىنداعى ء«بىلىم-يننوۆاتسيا» ليتسەيىنىڭ 10-سىنىپ وقۋشىسى مانسۇر ماماداحۋنوۆ ەكىنشى ورىنعا يە بولسا, الماتى قالاسىنىڭ №165 مامانداندىرىلعان مەكتەپ-ليتسەيىنىڭ 9-سىنىپ وقۋشىسى داۋجان بەكەتوۆ قولا مەدالعا قول جەتكىزدى. قۇراما جەتەكشىلەرى – Astana IT University-ءدىڭ باس جاتتىقتىرۋشىسى تەمىرلان ساتىلحانوۆ جانە الماتى IITU ۋنيۆەرسيتەتىنىڭ سپورتتىق باعدارلامالاۋ بويىنشا جاتتىقتىرۋشىسى ايبار قۋانىشباي.
ايتا كەتەيىك, ينفورماتيكادان حالىقارالىق وليمپيادا (IOI) العاش رەت 1989 جىلى بولگاريادا وتكىزىلدى. ۇلتتىق قۇراما بۇل بەدەلدى جارىسقا 1998 جىلدان تۇراقتى تۇردە قاتىسىپ كەلەدى. وسى ۋاقىت ارالىعىندا ءبىزدىڭ وقۋشىلار بارلىعى 75 مەدالدى جەڭىپ الدى.
